ມອບ-ຮັບ ໜ້າທີ່ຫົວໜ້າ ຍທຂ ເມືອງທ່າແຕງ

  ຫ້ອງການໂຍທາທິການ ແລະຂົນສົ່ງ (ຍທຂ) ເມືອງທ່າແຕງຈັດພິທີມອບຮັບໜ້າທີ່ຫົວໜ້າຫ້ອງການລະຫວ່າງຜູ້ເກົ່າ ແລະຜູ້ໃໝ່ໃນວັນທີ 20 ຕຸລາ 2020 ໂດຍແມ່ນທ່ານ ເພັດສະໝອນ ຈັນທະວິໄຊ ຮອງຫົວໜ້າຫ້ອງການ ຍທຂ ເມືອງທ່າແຕງທັງເປັນຫົວໜ້າເຂດຈຸດສຸມພັດ ທະນາທີ 4 ຜູ້ເກົ່າເປັນ ຫົວໝ້າຫ້ອງການ ຍທຂ ເມືອງທ່າແຕງຕາມຂໍ້ຕົກລົງສະ ບັບເລກທີ 223/ຈມ ແລະທ່ານ ບົວໄຂ ໄຊຍະວົງ ຫົວໜ້າຫ້ອງການ ຍທຂ ເມືອງຜູ້ເກົ່າ ໄປຮັບໜ້າທີ່ໃໝ່ຢູ່ຫ້ອງວ່າການປົກຄອງ ເມືອງທ່າແຕງ, ຕາມຂໍ້ຕົກລົງເລກທີ 222/ຈມ, ໂດຍຊ່ອງໜ້າທ່ານ ສຸພົນ ໄຊສະຫງ່າຮອງເຈົ້າເມືອງໆ ທ່າແຕງ, ທ່ານ ທອງເທບ ສຸລິໂຍຮອງຫົວໜ້າພະແນກ ຍທຂ ແຂວງເຊກອງພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

  ທ່ານ ບົວໄຂ ໄຊຍະວົງ ຫົວໜ້າຫ້ອງການໂຍທາທິການ ແລະຂົນສົ່ງເມືອງທ່າແຕງຜູ້ເກົ່າກ່າວວ່າ: ຕະຫຼອດໄລຍະ 21 ປີແຕ່ປີ 1999-2020 ໄດ້ຈັດຕັ້ງປະຕິບັດທຸກວຽກງານທີ່ປິ່ນອ້ອມຢູ່ພາຍໃນຫ້ອງການເປັນປົກກະຕິໂດຍນໍາເອົາທ່າແຮງທີ່ບົ່ມຊ້ອນ ແລະວິຊາສະເພາະເຂົ້າພັດທະນາຢ່າງຂາດຕົວໃນການເຄື່ອນໄຫວຕາມພາລະບົດບາດ, ສິດ ແລະໜ້າທີ່ຊຶ່ງເຮັດໃຫ້ຈໍານວນ 47 ບ້ານທົ່ວເມືອງທ່າແຕງກ້າວສູ່ພັດ ທະນາພື້ນຖານໂຄງລ່າງໃນແຕ່ໄລຍະຢ່າງເປັນຮູບປະທໍາ, ເຮັດໃຫ້ເສັ້ນທາງໄປມາຫາສູ່ເປັນໜ້າເພິ່ງພໍໃຈ,ຊີວິດການເປັນຢູ່ຂອງປະຊາຊົນນັບມື້ນັບດີຂຶ້ນອັນພົ້ນເດັ່ນໄດ້ມີເສັ້ນທາງເຂົ້າເຖິງຊົນນະບົດໂດຍສະເພາະເສັ້ນທາງເລກທີ 7615 ແຕ່ແຍກບ້ານໂກງ-ໜງກັນ-ດອນຊາອອກໃສ່ບ້ານກໍາກອກ, ມີຄວາມຍາວເກືອບ 23 ກິໂລແມັດໄດ້ຮັບທຶນສະໜັບສະໜູນຈາກໂຄງການ ADB ມູນຄ່າ 3 ລ້ານກວ່າໂດລາສະຫະລັດ, ມາ ຮອດປະຈຸບັນມີເສັ້ນທາງທົ່ວເມືອງທ່າແຕງມີທັງໝົດ 53 ເສັ້ນ, ເທົ່າ ກັບ 717,89 ກິໂລແມັດ (ບໍ່ນັບເສັ້ນທາງຫຼວງແຫ່ງຊາດ), ທາງຫຼວງຂອງເມືອງມີ 4 ເສັ້ນ, ມີຄວາມຍາວ 61,85 ກິໂລແມັດ, ທາງຊົນລະປະທານມີ 17 ເສັ້ນ, ຍາວ 72,19 ກິໂລແມັດ (ປູຢາງ 3,3 ກິໂລ ແມັດ) ທາງເທສະບານເມືອງມີ 25 ເສັ້ນ, ຍາວ 15,95 ກິໂລແມັດ(ປູຢາງ 4,3 ກິໂລແມັດ), ທາງສະເພາະມີ 7 ເສັ້ນ, ຍາວ 21,90 ກິໂລແມັດ, ມີຂົວຈໍານວນ 8 ແຫ່ງ, ໃນນັ້ນຂົວເບຕົງມີ 1 ແຫ່ງ, ຂົວເບເລ 7 ແຫ່ງ.

  ນອກນີ້ບັນດາວຽກງານເຄຫາ, ຜັງເມືອງ, ນໍ້າປະປາ, ຂົນສົ່ງ, ການເງິນລວມໄປເຖິງການຄຸ້ມຄອງຊັບສິນຢູ່ພາຍໃນຫ້ອງການໂຍທາທິການ ແລະຂົນສົ່ງເມືອງເຫັນວ່າມີຄວາມຮັບຜິດຊອບໂດຍກົງຢ່າງເຂັ້ມງວດ.

----

ຂ່າວ: ພອນ ບຸນອຸທິດ

แชร์