ເຈົ້າເມືອງຊົນນະບູລີ ມອບເຄື່ອງໃຫ້ປະຊາຊົນທີ່ຖືກນໍ້າຖ້ວມ

  ດ້ວຍຄວາມເປັນຫ່ວງເປັນໄຍຂອງການນໍາພັກ-ລັດເວົ້າລວມເວົ້າສະເພາະກໍ່ຄືການນໍາຂອງເມືອງຊົນນະບູລີທີ່ມີຕໍ່ພໍ່ແມ່ປະຊາຊົນທີ່ໄດ້ຮັບຜົນກະທົບຈາກໄພພິບັດນໍ້າຖ້ວມດັ່ງນັ້ນມາໃນຕອນເຊົ້າຂອງວັນທີ 21 ຕຸລາ 2020 ການນໍາຂອງເມືອງຊົນນະບູລີໄດ້ລົງມອບເຄື່ອງຊ່ວຍ ເຫຼືອ ແລະໃຫ້ກໍາລັງໃຈພໍ່ແມ່ປະຊາຊົນທີ່ໄດ້ຮັບຜົນກະທົບຈາກໄພພິບັດນໍ້າຖ້ວມຊຶ່ງໄດ້ແບ່ງເປັນ 2 ຈຸດ: ໃນການລົງມອບເຄື່ອງຊ່ວຍເຫຼືອຈຸດທີ 1 ນໍາໂດຍທ່ານ ສຸວິໄລ ຫຼວງຊະລາດເຈົ້າເມືອງຊົນນະບູລີພ້ອມດ້ວຍຄະນະຕ້ານໄພພິບັດຂັ້ນເມືອງກໍາລັງ ປກຊ-ປກສ ໄດ້ລົງມອບເຄື່ອງຊ່ວຍເຫຼືອໃຫ້ປະຊາຊົນບ້ານນາໜອງຜໍາ ແລະບ້ານດົງບູນ, ສ່ວນຈຸດທີ 2 ນໍາໂດຍທ່ານ ພູຂົງ ພັນທະວະດີຮອງເຈົ້າເມືອງຊົນນະບູລີພ້ອມຄະນະກໍາໄດ້ລົງມອບເຄື່ອງຊ່ວຍເຫຼືອປະຊາຊົນບ້ານບຶງຊ້າງ, ບ້ານວັງໂຄນຄໍາ ແລະຢູ່ສູນພັກຊົ່ວຄາວບ້ານດົງຫົງຄໍາ.

  ໃນການລົງມອບເຄື່ອງຊ່ວຍເຫຼືອໃຫ້ພໍ່ແມ່ປະຊາຊົນທີ່ປະຊົບໄພນໍ້າຖ້ວມໃນຄັ້ງນີ້ ທ່ານ ສຸວິໄລ ຫຼວງຊະລາດເຈົ້າເມືອງຊົນນະບູລີກໍ່ໄດ້ສະ ແດງຄວາມເປັນຫ່ວງເປັນໄຍຕໍ່ອໍານາດການປົກຄອງ ແລະພໍ່ແມ່ປະຊາຊົນຈົ່ງພ້ອມກັນອົດທົນຜ່ານຜ່າວິກິດນີ້ໄປພ້ອມກັນ ແລະອີກຢ່າງໜຶ່ງທີ່ທ່ານເປັນຫ່ວງທີ່ສຸດກໍ່ຄືບັນຫາສຸຂະພາບຂອງປະຊາຊົນເພາະໃນຊ່ວງນໍ້າຖ້ວມນີ້ພະຍາດທີ່ມັກເກີດມີພະຍາດຖອກທ້ອງ, ໄຂ້ຫວັດ, ຕີນເປື່ອຍ, ຕາແດງ ແລະອື່ນໆດັ່ງນັ້ນທາງອໍານາດການປົກຄອງຕ້ອງຕິດຕາມຖ້າມີກໍລະນີເຈັບເປັນແມ່ນໃຫ້ປະສານຫາສາທາລະນະສຸກເມືອງເພາະຈະໄດ້ໃຫ້ການຊ່ວຍເຫຼືອໄດ້ຢ່າງທັນການສ່ວນເຄື່ອງທີ່ນໍາມາມອບໃນຄັ້ງນີ້ລວມມີນໍ້າດື່ມ, ປ໋ອງປາ, ໝີ່ ແລະຢາປົວພະຍາດ.

  ສະຖານະການລ່າສຸດຂອງສະພາບນໍ້າຖ້ວມທີ່ເມືອງຊົນນະບູລີລະດັບນໍ້າເຊຊັງຊອຍແມ່ນຍັງເພີ່ມຂຶ້ນຢ່າງຕໍ່ເນື່ອງວັດແທກໄດ້ 11,82 ແມັດ, ບ້ານທີ່ໄດ້ຮັບຜົນກະທົບມີ 43 ບ້ານ, ເພີ່ມຂຶ້ນ 2 ບ້ານ ມີ 4.284 ຫຼັງຄາເຮືອນ, ມີພົນລະ ເມືອງ 29.493 ຄົນ, ຍິງ 14.622 ຄົນ, ເນື້ອທີ່ຖືກຖ້ວມ 7.085 ເຮັກຕາ, ສວນພືດຜັກ 176 ເຮັກຕາ, ໜອງປາ 361 ໜອງ, ຊົນລະປະທານ 9 ແຫ່ງ, ປະຕູນໍ້າ 3 ແຫ່ງ, ນໍ້າສ້າງຕື້ນ 105 ບໍ່, ນໍ້າບາດານ 233 ບໍ່, ວິດຖ່າຍ 1.142 ໜ່ວຍ, ກ້ອກນໍ້າປະປາຊຸມຊົນ 150 ກ້ອກ, ໂຮງຮຽນຖືກກະທົບຕ້ອງໂຈະການຮຽນມີ 23 ແຫ່ງ, ເສັ້ນທາງຖືກຖ້ວມ ແລະຕັດຂາດການສັນຈອນມີ 12 ເສັ້ນ, ບ້ານທີ່ຕ້ອງລະງັບການໃຊ້ໄຟຟ້າຊົ່ວຄາວເພື່ອຄວາມປອດໄພມີ 13 ບ້ານ, ວັດຖືກຖ້ວມມີ 13 ແຫ່ງ.

 ສໍາລັບການຍົກຍ້າຍໃຫ້ການຊ່ວຍເຫຼືອປະຊາຊົນເຂົ້າພັກເຊົ່າທີ່ສູນພັກເຊົ້າຊົ່ວຄາວໃນມື້ນີ້ຢູ່ສູນສະໂມສອນຂອງເມືອງ ມີ 18 ຄອບຄົວ, ມີພົນລະເມືອງ 91 ຄົນ ຍິງ 56 ຄົນ, ພັກຢູ່ເຮືອນພີ່ນ້ອງໃນຂອບເຂດບ້ານໂນນສະຫວ່າງມີ 17 ຄອບຄົວ, ມີພົນລະເມືອງ 83 ຄົນ ຍິງ 47 ຄົນ, ຢູ່ສູນບ້ານດົງຫົງຄໍາ ມີ 39 ຄອບຄົວ ມີພົນລະເມືອງ 156 ຄົນ ຍິງ 89 ຄົນ, ສູນບ້ານໜອງຜື ມີ 11 ຄອບຄົວມີພົນລະເມືອງ 73 ຄົນ, ຍິງ 53 ຄົນ, ພັກຢູ່ສາລາບ້ານມີ 6 ຄອບຄົວ, ມີພົນລະເມືອງ 20 ຄົນ, ຍິງ 10 ຄົນ, ພັກຢູ່ເຮືອນພີ່ນ້ອງມີ 15 ຄອບຄົວ, ມີພົນລະ ເມືອງ 70 ຄົນ, ຍິງ 75 ຄົນ ແລະຢູ່ສູນໂຮງຮຽນມໍຕົ້ນບ້ານໂນນຄູ້ມີ 2 ຄອບຄົວ, ມີພົນລະເມືອງ 11 ຄົນ, ຍິງ 6 ຄົນ, ມາໃນປະຈຸບັນນີ້ ສິ່ງທີ່ເມືອງຊົນນະບູລີມີຄວາມຕ້ອງການຄວາມຊ່ວຍເຫຼືອຈາກສັງຄົມຢ່າງຮີບດ່ວນທີ່ສຸດແມ່ນ: ນໍ້າດື່ມ, ເຂົ້າສານ, ອາຫານແຫ້ງ, ນໍ້າມັນເຊື້ອໄຟ, ຢາປົວພະຍາດ ແລະເຄື່ອງອຸປະໂພກ-ບໍລິໂພກ ແລະອື່ນໆ.

 ----  

ໜັງສືພິມ ເສດຖະກິດ-ສັງຄົມ

แชร์