ເມືອງຫົງສາຫາລືວຽກງານທະບຽນສານ

  ໃນວັນທີ 20 ຕຸລາ 2020 ເມືອງຫົງສາແຂວງໄຊຍະບູລີໄດ້ຈັດກອງປະຊຸມປຶກສາຫາລືວຽກງານທະບຽນສານລະຫວ່າງລັດ ແລະບັນດາບໍລິສັດ ຢູ່ພາຍໃນເມືອງທີ່ສະໂມສອນເມືອງໂດຍການເປັນປະທານຂອງທ່ານ ສົມສີ ພົມມະຈັນປະທານກວດກາພັກ-ລັດເມືອງ, ເຂົ້າຮ່ວມຮັບຟັງມີຄະນະປະຈໍາເມືອງ, ກໍາມະການພັກເມືອງ, ຫົວໜ້າ-ຮອງຫົວໜ້າຫ້ອງການ, ມີຫົວໜ້າ-ຕາງໜ້າບໍລິສັດຜູ້ຮັບເໝົາໂຄງການຕ່າງໆທົ່ວເມືອງ, ພ້ອມດ້ວຍພະນັກງານຫ້ອງການຍຸຕິທຳເມືອງເຂົ້າຮ່ວມ.

  ທ່ານ ວັນໄຊ ຢົວລໍວື ຫົວໜ້າຫ້ອງການຍຸຕິທໍາເມືອງໄດ້ຂຶ້ນເຜີຍແຜ່ເອກະສານຄໍາສັ່ງເລກທີ 126/ ຈຂ.ຊຍ, ລົງວັນທີ 8 ພຶດສະພາ 2020 ວ່າດ້ວຍການເພີ່ມທະວີຄວາມເອົາໃຈໃສ່ຕໍ່ວຽກງານທະບຽນສານ, ຄໍາສັ່ງເລກທີ 463/ ຈມ.ຫສ, ລົງວັນທີ 29 ກໍລະກົດ 2020, ວ່າດ້ວຍການເພີ່ມທະວີຄວາມເອົາໃຈໃສ່ຕໍ່ວຽກງານທະບຽນສານຢູ່ເມືອງຫົງສາ, ແຈ້ງການເລກທີ 464/ ຈມ.ຫສ, ລົງວັນທີ 29 ກໍລະກົດ 2020 ເຖິງບໍລິສັດໄຟຟ້າຫົງສາຈໍາກັດ ແລະບໍລິສັດຜູ້ຮັບເໝົາໃນການນໍາເອົາສັນຍາແຮງງານ, ສັນຍາຮັບເໝົາ, ສັນຍາເຊົ່າ, ສັນຍາປະເພດອື່ນໆໄປຢັ້ງຢືນເພື່ອຄວາມຖືກຕ້ອງນໍາອົງການທະບຽນສານໃຫ້ສອດຄ່ອງກັບກົດໝາຍຂອງສປປ ລາວ, ນອກນັ້ນຍັງໄດ້ເຜີຍແຜ່ບາງມາດຕາຂອງກົດໝາຍວ່າດ້ວຍທະບຽນສານ ແລະບາງມາດຕາຂອງກົດໝາຍແຮງງານ, ພ້ອມທັງແນະນໍາວິທີການປະກອບເອກະສານ, ສັນຍາແຕ່ລະປະເພດເພື່ອນໍາໄປຈົດທະບຽນສານ.

  ຈຸດປະສົງເພື່ອຊຸກຍູ້ໃຫ້ເອົາໃຈໃສ່ປະຕິບັດສິດ ແລະພັນທະຂອງຕົນຕາມການຕົກລົງໃນສັນຍາທັງສອງຝ່າຍ, ກໍລະນີຫາກມີຂໍ້ຂັດແຍ່ງ    ເກີດຂຶ້ນກໍ່ສາມາດມາດແກ້ໄຂໄດ້ຢ່າງວ່ອງໄວ, ຖືກຕ້ອງຕາມສັນຍາ ແລະຖືກຕ້ອງຕາມກົດໝາຍ, ເປັນການປົກປ້ອງສິດ ແລະຜົນປະໂຫຍດຂອງຄູ່ສັນຍາຕາມກົດໝາຍ, ກໍລະນີຫາກເກີດຂໍ້ຂັດແຍ່ງຮ້າຍແຮງຈົນຄູ່ສັນຍາບໍ່ສາມາດແກ້ໄຂກັນເອງໄດ້ເມື່ອສົ່ງໄປຫາພາກ ສ່ວນທີ່ກ່ຽວຂ້ອງ ຫຼື ສານແກ້ໄຂເພື່ອໃຫ້ຖືກຕ້ອງຕາມຄວາມເປັນຈິງ, ເຮັດໃຫ້ສັງຄົມມີຄວາມສະຫງົບ, ຄວາມເປັນລະບຽບຮຽບຮ້ອຍ, ຮັບປະກັນຄວາມຍຸຕິທໍາ ແລະໄດ້ຮັບຜົນປະໂຫຍດຕາມການຕົກລົງກັນໄວ້ໃນສັນຍາ.

  ໃນຕອນທ້າຍກອງປະຊຸມຜູ້ເຂົ້າຮ່ວມໄດ້ຮັບຟັງການມີຄໍາເຫັນໂອ້ລົມຈາກທ່ານປະທານກອງປະຊຸມ ແລະໃຫ້ທິດຊີ້ນໍາພ້ອມກັນນຳເອົາເນື້ອໃນຈິດໃຈກອງປະຊຸມຄັ້ງນີ້ໄປຜັນຂະຫຍາຍຢູ່ໃນຂອບເຂດຄວາມຮັບຜິດຊອບຂອງຕົນໄດ້ຮັບຮູ້ ແລະຈັດຕັ້ງປະຕິບັດຢ່າງເຂັ້ມງວດ.

----

ຂ່າວ: ບຸນປອນ

แชร์