ບຸນທາດຫຼວງວຽງຈັນປີນີ້ ຈັດສະເພາະເປັນປະເພນີ

  ພິທີຖະແຫຼງຂ່າວກ່ຽວກັບການຈັດງານບຸນນະມັດສະການພະທາດຫຼວງວຽງຈັນປະຈໍາປີ 2020 ໄດ້ຈັດຂຶ້ນໃນວັນທີ 21 ຕຸລາ 2020 ທີ່ນະຄອນຫຼວງວຽງຈັນພາຍໃຕ້ການເປັນປະທານຮ່ວມຂອງຄະນະຮັບຜິດຊອບຈັດງານບຸນນະມັດສະການພະທາດຫຼວງວຽງຈັນປະຈໍາປີ 2020 ໂດຍມີພາກສ່ວນກ່ຽວຂ້ອງ ແລະສື່ມວນຊົນເຂົ້າຮ່ວມ.

  ທ່ານ ນາງ ວິໄລວອນ ຈັນທະລາສີ ຫົວໜ້າພະແນກຖະແຫຼງຂ່າວ, ວັດທະນະທຳນະຄອນຫຼວງວຽງຈັນກ່າວວ່າ: ງານບຸນນະມັດສະການພະທາດຫຼວງວຽງຈັນປະຈໍາປີ 2020 ນີ້ແມ່ນໄດ້ຖືເອົາປະເພນີເປັນຕົ້ນຕໍສ່ວນການຈັດຕະຫຼາດນັດວາງສະແດງສິນຄ້າ ແລະການຂາຍເຄື່ອງດື່ມ (ທີ່ມີທາດເຫຼົ້າ) ແລະງານບັນເທີງຕ່າງໆແມ່ນໃຫ້ໂຈະກ່ອນ, ສໍາລັບຮ້ານຂາຍອາຫານ, ເຄື່ອງດື່ມ (ທີ່ບໍ່ມີທາດເຫຼົ້າ), ຮ້ານຂາຍດອກໄມ້, ທູບ-ທຽນ ເພື່ອບູຊາແມ່ນເຫັນດີໃຫ້ວາງຂາຍໂດຍໃຫ້ເວັ້ນໄລຍະຫ່າງ ແລະມີຫຼາຍຈຸດທັງນີ້ກໍເພື່ອປ້ອງກັນການແຜ່ລະບາດຂອງພະຍາດໂຄວິດ-19, ຊຶ່ງງານດັ່ງກ່າວ ແມ່ນຈະຈັດໃນລະຫວ່າງວັນທີ 29-31 ຕຸລາ 2020 (ກໍານົດໃຫ້ 3 ວັນ) ໂດຍມີລາຍລະອຽດຄື: ມື້ຂຶ້ນ 13 ຄໍ່າເດືອນ 12 ລາວກົງກັບວັນທີ 29 ຕຸລາ 2020 ພິທີຄອບໄຄວ່ ແລະແຫ່ຜາສາດເຜິ້ງ, ມື້ຂຶ້ນ 14 ຄໍ່າເດືອນ 12 ລາວກົງກັບວັນທີ 30 ຕຸລາ 2020 ພິທີແຫ່ລູກຄີ ແລະແຂ່ງຂັນປະເພນີຕີຄີ, ມື້ຂຶ້ນ 15 ຄໍ່າເດືອນ 12 ລາວກົງກັບວັນທີ 31 ຕຸລາ 2020 ພິທີຕັກບາດ ແລະວຽນທຽນ, ສ່ວນຮູບແບບການຕັກບາດໃນຕອນເຊົ້າແມ່ນຈະມີການຈໍາກັດ ແລະຈັດຢູ່ສະເພາະແຕ່ເດີ່ນສະໜາມຫຼວງ, ໂດຍກໍາກັບການວາງບາດຄູບາໃຫ້ມີໄລຍະຫ່າງທີ່ເໝາະສົມ.

  ທ່ານ ນາງ ວິໄລວອນ ຈັນທະລາສີຍັງໄດ້ຮຽກຮ້ອງມາຍັງພໍ່ແມ່ປະຊາຊົນ ແລະມວນຊົນທີ່ຈະເຂົ້າມາທ່ຽວຊົມ ຫຼື ມາກາບໄຫວ້ພະທາດຫຼວງ ໃຫ້ໃສ່ຜ້າອັດປາກ-ດັງ ແລະມີເຈວລ້າງມືພົກຕິດໂຕມານຳ, ສ່ວນຜູ້ທີ່ບໍ່ສະບາຍ ຫຼື ມີໄຂ້ແມ່ນຢາກໃຫ້ຫຼີກລຽງ ແລະບໍ່ຢາກໃຫ້ມາໃນສະຖານ ທີ່ແອອັດເພື່ອປ້ອງກັນການແຜ່ລະບາດຂອງພະຍາດໂຄວິດ-19 ແລະພະຍາດຕິດຕໍ່ອື່ນໆ, ພ້ອມກັນນີ້, ເພື່ອຮັບປະກັນຄວາມສະຫງົບ, ຄວາມເປັນລະບຽບຮຽບຮ້ອຍ, ຄວາມບໍ່ສະອາດງາມຕາໃນຂອບເຂດການຈັດງານບຸນປະເພນີນະມັດສະການພະທາດຫຼວງຈົ່ງພ້ອມກັນຮັກ ສາສິ່ງແວດລ້ອມບໍ່ໃຫ້ຖິ້ມຂີ້ເຫຍື້ອຊະຊາຍຈົ່ງຖິ້ມໃສ່ບ່ອນທີ່ເພິ່ນກຳນົດໄວ້ໃຫ້.

----

ໜັງສືພິມ ເສດຖະກິດ-ສັງຄົມ

แชร์