ຈຳພອນ 16 ບ້ານ ຖືກຜົນກະທົບນໍ້າຖ້ວມ

   ເມືອງຈຳພອນ ມີ 16 ບ້ານຖືກຜົນກະທົບນໍ້າຖ້ວມນັບແຕ່ວັນທີ 13-21 ຕຸລາ 2020 ຜ່ານມາ ເນື່ອງຈາກມີຝົນຕົກໜັກຕໍ່ເນື່ອງກັນຫຼາຍວັນລະດັບນໍ້າເຊກອກເພີ່ມຂຶ້ນວັດແທກໄດ້ 10,02 ແມັດ ເຮັດໃຫ້ປະຊາຊົນ 16 ບ້ານ, 1.066 ຫຼັງຄາ, ຈຳນວນພົນລະເມືອງ 4.057 ຄົນ ຢູ່ເມືອງຈຳພອນ ແຂວງສະຫວັນນະເຂດໄດ້ຮັບຜົນກະທົບພ້ອມນັ້ນຍັງເສັ້ນທາງ, ໂຮງຮຽນ, ສຸກສາລາ, ລະບົບພື້ນຖານໂຄງລ່າງຈຳນວນໜຶ່ງສັດລ້ຽງ ແລະເຂົ້ານາປີຂອງປະຊາຊົນ.

  ອີງຕາມຂໍ້ມູນເບື້ອງຕົ້ນຈາກຫ້ອງການແຮງງານ ແລະສະຫວັດດີການສັງຄົມເມືອງຈຳພອນໃຫ້ຮູ້ວ່າ: ເມືອງຈຳພອນຕິດກັບນໍ້າເຊກອກໃນນັ້ນລະດັບເຕືອນໄພ 7,50 ແມັດ, ເຂດອັນຕະລາຍ 8,00 ແມັດ ໃນໄລຍະວັນທີ 13-21 ຕຸລາ 2020 ໄດ້ມີຝົນຕົກໜັກຕໍ່ເນື່ອງກັນຫຼາຍວັນລະດັບນໍ້າເຊກອກເພີ່ມຂຶ້ນວັດແທກໄດ້ 10,02 ແມັດ ເຮັດໃຫ້ປະຊາຊົນ 16 ບ້ານ, 1.066 ຫຼັງຄາ, ຈໍານວນພົນລະເມືອງ 4.057 ຄົນ, ຈຳນວນທີ່ໄດ້ຍົກຍ້າຍໄປຢູ່ນຳພີ່ນ້ອງ, ໄປຢູ່ສູນພັກຊົ່ວຄາວມີ 3 ບ້ານຄື: ບ້ານແກ້ງກອກເໜືອ, ແກ້ງກອກດົງ ແລະຫົວເມືອງ, ມີ 26 ຄອບຄົວ, ຈຳນວນພົນລະເມືອງ 241 ຄົນ ພ້ອມນັ້ນຍັງມີເນື້ອທີ່ນາປີຂອງປະຊາຊົນຖືກນໍ້າຖ້ວມມີ 6.884 ເຮັກຕາ, ເນື້ອທີ່ເສຍຫາຍ 4.585 ເຮັກຕາ.

  ນອກນັ້ນຍັງໄດ້ຖ້ວມເສັ້ນທາງມີ 10 ບ້ານ, ຊົນລະປະທານຖືກເສຍຫາຍ 1 ແຫ່ງ, ຝາຍອ່າງເກັບນໍ້າຫ້ວຍທະຍຸງບ້ານໂນນວິໄລວັນ: ມີອ່າງເກັບນໍ້າ 5 ແຫ່ງ, ຄູກັນ ນໍ້າ 1 ແຫ່ງ, ປະຕູນໍ້າ 2 ແຫ່ງ ແລະ ຖ້ວມລະບົບນໍ້າຄ່ອງເໝືອງ 6 ແຫ່ງ, ຖ້ວມໜອງປາ 197 ໜອງ, ງົວຕາຍ 6 ໂຕ, ນໍ້າໄຫຼ່ເຂົ້າໂຮງຮຽນ 3 ແຫ່ງ ປະຈຸບັນເມືອງໄດ້ລະດົມກຳລັງແຮງງານໄປເກັບກ່ຽວເຂົ້າຊ່ວຍປະຊາຊົນ, ມອບເຂົ້າສານ,ອາຫານແຫ້ງເພື່ອຊ່ວຍເຫຼືອຕອບສະໜອງບັນເທົາທຸກລວມທັງເຄື່ອງໃຊ້ອຸປະໂພກ ແລະເງິນສົດ.

 

แชร์