ເຈດີບີ ມອບເຄື່ອງຊ່ວຍເຫຼືອໄພນໍ້າຖ້ວມສະຫວັນນະເຂດ

ໃນວັນທີ 21 ຕຸລາ 2020 ທີ່ສໍານັກງານອົງການປົກຄອງແຂວງສະຫວັນນະເຂດທະນາຄານຮ່ວມພັດທະນາ ຫຼື JDB ໄດ້ມອບເຄື່ອງຊ່ວຍເຫຼືອໃຫ້ຜູ້ປະສົບໄພນໍ້າຖ້ວມທີ່ແຂວງສະຫວັນນະເຂດຊຶ່ງມອບໂດຍທ່ານ ຖາວອນ ອ້ວນມາລາ ຄະນະຜູ້ບໍລິຫານທະນາຄານຮ່ວມພັດທະນາ,ໄດ້ນໍາເອົາເຄື່ອງຊ່ວຍເຫຼືອມາຊ່ວຍຜູ້ປະສົບໄພນໍ້າຖ້ວມ.

ເຄື່ອງທີ່ນໍາໄປມອບໃນຄັ້ງນີ້ມີນໍ້າດື່ມ JDB 2.000 ແຟັກ, ໝີ່ໄວໆ 100 ແກັດໃຫຍ່, ປາກະປ໋ອງ 40 ແກັດ,ລວມມູນຄ່າ 100 ລ້ານກີບ ເພື່ອເປັນສ່ວນນື່ງໃນການປະກອບສ່ວນບັນເທົາທຸກໃຫ້ແກ່ປະຊາຊົນບັນດາເຜົ່າທີ່ໄດ້ຮັບຜົນກະທົບທັງໝົດ 8 ຕົວເມືອງ, ໄດ້ຮັບຜົນກະທົບໜັກທີ່ສຸດແມ່ນ: ເມືອງເຊໂປນ, ເມືອງນອງ, ເມືອງສອງຄອນ ແລະເມືອງຈໍາພອນ, ສ່ວນເມືອງວີລະບູລີ, ເມືອງຊົນນະບູລີ, ເມືອງທ່າປາງທອງ, ເມືອງພີນແມ່ນໄດ້ຮັບຜົນກະທົບປານກາງ. ດັ່ງນັ້ນທະນາຄານຮ່ວມພັດ ທະນາຈຶ່ງໄດ້ສົ່ງນໍ້າໃຈໄປບັນເທົາທຸກ,ຕາງໜ້າແຂວງສະຫວັນນະເຂດກ່າວຮັບໂດຍທ່ານ ທ່ອນແກ້ວ ພຸດທະໄກຍະລາດ ຮອງເຈົ້າແຂວງສະຫວັນນະເຂດທ່ານໄດ້ສະແດງຄວາມຂອບອົກຂອບໃຈ ແລະຮູ້ບຸນຄຸນມາຍັງທ່ານ ເອກະພັນ ພະພິທັກ ປະທານສະພາບໍລິຫານທະນາຄານຮ່ວມພັດທະນາທີ່ມີນໍ້າໃຈອັນປະເສີດຊ່ວຍເຫຼືອປະຊາຊົນທີ່ປະສົບໄພຄັ້ງນີ້ ແລະໄດ້ອວຍພອນໄຊອັນປະເສີດໃຫ້ການດໍາເນີນທຸລະກິດຂອງທະນາຄານຮ່ວມພັດທະນາມີຜົນກໍາໄລຂຶ້ນໄປເລື້ອຍໆ ເພື່ອສີບຕໍ່ຊ່ວຍເຫຼືອສັງຄົມລາວຕໍ່ ໄປ, ເຄື່ອງຊ່ວຍເຫຼືອໃນຄັ້ງນີ້ແມ່ນຈະໄດ້ນໍາໄປແຈກຢາຍໃຫ້ປະຊາຊົນທີ່ໄດ້ຮັບຜົນກະທົບຈາກໄພນໍ້າຖ້ວມ.

   ຫຼັງຈາກນັ້ນ ທ່ານ ທ່ອນແກ້ວ ພຸດທະໄກຍະລາດ ກໍ່ໄດ້ມອບໃບຍ້ອງບໍໃຫ້ແກ່ທະນາຄານຮ່ວມພັດທະນາທີ່ມີຜົນງານປະກອບສ່ວນຊ່ວຍເຫຼືອໄພນໍ້າຖ້ວມໃນຄັ້ງນີ້ຫວັງຢ່າງຍິງວ່າໂອກາດໜ້າຈະໄດ້ຮັບການຊ່ວຍເຫຼືອດ້ານອື່ນອີກ.

ຂ່າວ: ຄໍາຕົ້ນ ວໍລະຈັກ 

ຮູບພາບ: ໜັງສືພິມເສດຖະກິດ-ສັງຄົມ

แชร์