ໄຊສົມບູນ ໄຂກອງປະຊຸມໃຫຍ່ຄັ້ງທີ I ຂອງອົງຄະນະພັກແຂວງ

   ກອງປະຊຸມໃຫຍ່ຜູ້ແທນອົງຄະນະພັກ ແຂວງໄຊສົມບູນ ຄັ້ງທີ I ໄດ້ໄຂຂຶ້ນຢ່າງເປັນທາງການໃນຕອນເຊົ້າຂອງວັນທີ 22 ຕຸລາຜ່ານມາທີ່ສະໂມສອນ ເມືອງອະນຸວົງ ແຂວງໄຊສົມບູນຊຶ່ງດໍາເນີນພາຍໃຕ້ການເປັນປະທານຂອງ ສະຫາຍ ພົຕ ຄຳລຽງ ອຸທະໄກສອນ ເລຂາຄະນະບໍລິຫານງານພັກແຂວງ, ເຈົ້າແຂວງໄຊສົມບູນ ໂດຍເປັນກຽດເຂົ້າຮ່ວມຂອງ ສະຫາຍນາງ ປານີ ຢາທໍ່ຕູ້ ກຳມະການກົມການເມືອງສູນກາງພັກ, ປະທານສະພາແຫ່ງຊາດພ້ອມນີ້ກໍມີຄະນະຈັດຕັ້ງສູນກາງພັກ, ຄະນະກວດກາສູນກາງພັກ, ອະດີດການນຳແຂວງ, ພະນັກງານປະຕິວັດອາວຸໂສ, ຜູ້ຊົງຄຸນວຸດທິ, ນັກທຸລະກິດຜູ້ປະກອບການ ແລະຜູ້ແທນສົມບູນຈຳນວນ 123 ສະຫາຍ ທີ່ເປັນຕົວແທນໃຫ້ແກ່ສະມາຊິກພັກທົ່ວແຂວງຈໍານວນທັງໝົດ 3.914 ສະຫາຍເຂົ້າຮ່ວມ.

 ໃນວາລະກອງປະຊຸມດັ່ງກ່າວ ສະຫາຍ ພົຕ ຄຳລຽງ ອຸທະໄກສອນ ໄດ້ຂຶ້ນກ່າວໄຂກອງປະຊຸມຢ່າງເປັນທາງການພ້ອມທັງຜ່ານຮ່າງບົດລາຍງານການເມືອງຂອງຄະນະບໍລິຫານງານພັກແຂວງຊຶ່ງສະຫາຍໄດ້ຕີລາຄາໃຫ້ເຫັນເຖິງໝາກຜົນຄວາມສຳເລັດໃນການຈັດຕັ້ງປະຕິບັດມະຕິກອງປະຊຸມຕົວແທນສະມາຊິກພັກໃນໄລຍະ 5 ປີຜ່ານມາຊຶ່ງຄະນະພັກແຕ່ລະຂັ້ນໄດ້ເອົາໃຈໃສ່ຢ່າງຕັ້ງໜ້າໃນການສຶກສາອົບຮົມນຳພາການເມືອງ-ແນວຄິດ ຈັດຕັ້ງເຊື່ອມຊຶມແນວທາງນະໂຍບາຍບັນດາມະຕິ,ຄຳສັ່ງຂອງພັກ, ລະບຽບກົດໝາຍຂອງລັດພ້ອມທັງເສີມຂະຫຍາຍມູນເຊື້ອທີ່ເປັນເອກະລັກ, ເຕົ້າໂຮມຄວາມສາມັກຄີເປັນປຶກແຜ່ນ, ເຊີດຊູນໍ້າໃຈຮັກຊາດ, ຮັກລະບອບໃໝ່, ປະຕິບັດແນວທາງປ່ຽນແປງໃໝ່ທີ່ມີຫຼັກການຂອງພັກໂດຍສຸມໃສ່ຫັນພະນັກງານລົງກໍ່ສ້າງຮາກຖານການເມືອງພັດທະນາຊົນນະບົດຮອບດ້ານເພື່ອແກ້ໄຂຄວາມທຸກຍາກຂອງປະຊາຊົນຄຽງຄູ່ກັນນັ້ນກໍໄດ້ສຸມໃສ່ການຈັດຕັ້ງປະຕິບັດແຜນພັດທະນາເຂດຈຸດສຸມໃຈກາງ ແລະແກ້ໄຂຄວາມບໍ່ສະຫງົບເຮັດໃຫ້ແຂວງໄຊສົມບູນມີສະຖຽນລະພາບທາງ ດ້ານການເມືອງຢ່າງໜັກແໜ້ນ, ສັງຄົມມີຄວາມສະຫງົບປອດໄພຕິດພັນກັບການແກ້ໄຂຄວາມທຸກຍາກຂອງປະຊາຊົນໂດຍການປຸກລະດົມຂົນຂວາຍດຶງດູດເອົານັກລົງ ທຶນທັງພາຍໃນ ແລະຕ່າງປະເທດເຂົ້າມາມາລົງທຶນປະກອບສ່ວນພັດທະນາແຂວງນັບມື້ນັບຫລາຍຂຶ້ນ.

   ຈາກຜົນງານດັ່ງກ່າວໄດ້ປະກອບສ່ວນສຳຄັນເຮັດໃຫ້ເສດຖະກິດຂອງແຂວງຂະຫຍາຍຕົວຢ່າງຕໍ່ເນື່ອງດ້ວຍອັດຕາສະເລ່ຍ 6,99%ຕໍ່ປີ, ລາຍຮັບສະເລ່ຍໃສ່ຫົວຄົນບັນລຸໄດ້ 11 ລ້ານກວ່າກີບຕໍ່ຄົນຕໍ່ປີ, ໂຄງການລົງທຶນຂອງລັດມີທັງໝົດ 202 ໂຄງການ, ທົ່ວແຂວງມີເນື້ອທີ່ປູກເຂົ້າທັງໝົດ 11,7 ພັນເຮັກຕາ, ສະເລ່ຍສະມັດຕະ ພາບໄດ້ 2,4 ໂຕນ ຕໍ່ເຮັກຕາ, ສັດລ້ຽງມີທັງໝົດ 3,4 ແສນໂຕ ນອກຈາກນັ້ນຍັງໄດ້ເອົາໃຈໃສ່ລົງຊຸກຍູ້ສົ່ງເສີມຜະລິດກະສິກຳເປັນສິນຄ້າຂອງປະຊາຊົນອັນພົ້ນເດັ່ນແມ່ນການປູກຢາງພາລາ, ມັນຕົ້ນ ແລະໝາກກ້ຽງ.

  ປະຈຸບັນທົ່ວແຂວງມີຄອບຄົວພົ້ນທຸກ 6.526 ຄອບຄົວ ເທົ່າກັບ 42,31%, ແກ້ໄຂຄອບຄົວທຸກຍາກໄດ້ 711 ຄອບຄົວ, ຄອບຄົວທຸກຍາກຍັງເຫຼືອ 1.098 ຄອບ ຄົວ ເທົ່າກັບ 7,12%, ປະຈຸບັນຍັງເຫຼືອບ້ານທຸກຍາກ 10 ບ້ານ, ເມືອງທຸກຍາກຍັງ 4 ເມືອງ, ມີຄອບຄົວພັດທະນາ 7.799 ຄອບຄົວ ເທົ່າກັບ 50,57%, ສ້າງບ້ານພັດທະນາໄດ້ 4 ບ້ານ ລວມທັງໝົດທົ່ວແຂວງມີບ້ານພັດທະນາທັງໝົດ 19 ບ້ານ ເທົ່າກັບ 21,35%.

  ຫຼັງຈາກນັ້ນກອງປະຊຸມໄດ້ຮັບຟັງການຜ່ານແຜນພັດທະນາເສດຖະກິດ-ສັງຄົມ 5 ປີ ຄັ້ງທີ II ຈາກສະຫາຍ ພອຍຄຳ ຮຸ່ງບຸນຍວງ ຮອງເລຂາພັກແຂວງ, ຮອງເຈົ້າແຂວງໄຊສົມບູນທັງໄດ້ຮັບຟັງການປະກອບຄໍາເຫັນຈາກບັນດາສະຫາຍທີ່ຕາງໜ້າພະແນກການ ແລະ ບັນດາເມືອງຈຳນວນໜຶ່ງດ້ວຍໝາກຜົນຄວາມສຳເລັດ ແລະຄວາມຮັບຜິດຊອບສູງ.

  ກອງປະຊຸມໃຫຍ່ຂອງຜູ້ແທນອົງຄະນະພັກແຂວງໄຊສົມບູນໃນຄັ້ງນີ້ຍັງຈະໄດ້ພ້ອມກັນຕີລາຄາກ່ຽວກັບຜົນສຳເລັດໃນການຈັດຕັ້ງປະຕິບັດມະຕິກອງປະຊຸມສະມາຊິກພັກຂອງແຂວງໃນໄລຍະ 5 ປີ ຜ່ານມາພ້ອມຍົກໃຫ້ເຫັນຜົນສຳເລັດ, ຈຸດດີ, ຈຸດອ່ອນ ແລະຂໍ້ຄົງຄ້າງພ້ອມທັງບົດຮຽນທີ່ຖອດຖອນໄດ້ຕໍ່ຈາກນັ້ນກອງປະຊຸມຍັງຈະໄດ້ດຳເນີນການປ່ອນບັດຄັດເລືອກເອົາຄະນະບໍລິຫານງານພັກແຂວງຊຸດໃໝ່ພ້ອມທັງປ່ອນບັດເລືອກເອົາຜູ້ແທນສົມບູນ, ສຳຮອງຕາງໜ້າເຂົ້າຮ່ວມກອງປະຊຸມໃຫຍ່ຄັ້ງທີ XI ຂອງສູນກາງພັກ, ສ່ວນຕອນທ້າຍກອງປະຊຸມຍັງຈະໄດ້ຮັບຟັງການໂອ້ລົມຂອງ ສະຫາຍ ນາງ ປານີ ຢາທໍ່ຕູ້ ກຳມະການກົມການເມືອງສູນກາງພັກ,ປະທານສະພາແຫ່ງຊາດຕື່ມອີກ, ສຳລັບກອງປະຊຸມຄັ້ງນີ້ແມ່ນຈະດຳເນີນໄປຈົນເຖິງວັນທີ 23 ຕຸລາ ຈຶ່ງຈະສຳເລັດ.

แชร์