ໄຊຈຳພອນ ສຳເລັດເກັບກຳຂໍ້ມູນພົ້ນທຸກ ແລະການພັດທະນາ

  ຫ້ອງວ່າການເມືອງໄຊຈໍາພອນ ແຂວງບໍລິຄໍາໄຊຮ່ວມກັບຫ້ອງການກະສິກຳ ແລະປ່າໄມ້ເມືອງຈັດກອງປະຊຸມເຜີຍການແຜ່ຜັນຂະຫຍາຍຜົນການເກັບກຳຂໍ້ມູນການພົ້ນທຸກ ແລະການພັດທະນາປະຈຳປີ 2019 ຕາມດຳລັດ 348/ລບ ຂອງເມືອງໄຊຈຳພອນ, ຂຶ້ນທີ່ຫ້ອງວ່າການປົກຄອງເມືອງ ໃນວັນທີ 20 ຕຸລາ 2020, ໂດຍເປັນປະທານຂອງທ່ານ ອຸດົມໄຊຍວນຕາຮອງເລຂາພັກເມືອງໄຊຈຳພອນ.
  ທ່ານ ກຽດຕິສັກ ແສນວົງສາຮອງຫົວໜ້າຫ້ອງການກະສິກຳ ແລະປ່າໄມ້ເມືອງໄຊຈຳພອນໄດ້ຂຶ້ນຜ່ານບົດລາຍງານຜົນການຈັດຕັ້ງຜັນຂະຫຍາຍດຳລັດ 348/ລບ ກ່ຽວກັບມາດຖານພົ້ນທຸກ ແລະມາດຖານພັດທະນາຂອງເມືອງໄຊຈຳພອນວ່າ: ການຈັດຕັ້ງປະຕິບັດດຳລັດ 348 ໄດ້ມີຄະນະຊີ້ນຳ, ກອງເລຂາ, ຄະນະຮັບຜິດຊອບ 6 ກຸ່ມວຽກ ແລະນັກເດີນສຳຫຼວດທັງໝົດ 11ຄົນ, ຍິງ 0 ຄົນ, ໄດ້ເລີ່ມປະຕິບັດມາແຕ່ເດືອນພຶດສະພາຫາເດືອນກັນຍາ 2019 ໃນການເດີນສຳຫຼວດ, ເກັບກຳ ແລະວິເຄາະ-ວິໄຈຂໍ້ມູນພ້ອມສະຫຼຸບສັງລວມເຂົ້າໃນຖານຂໍ້ມູນຊຶ່ງປະຈຸບັນໄດ້ສຳເລັດ 100%. ທົ່ວເມືອງໄຊຈຳພອນ ມີ 17 ບ້ານ, 1.707 ຄອບຄົວ, ພົນລະເມືອງ 10.641 ຄົນ, ຍິງ 5.184 ຄົນໃນນັ້ນ ຄອບຄົວພົ້ນທຸກ 691 ຄອບຄົວ ກວມ 40, 48%, ຄອບຄົວພັດທະນາ 540 ຄອບຄົວກວມ 31,63%.
  ໃນກອງປະຊຸມຍັງໄດ້ມີການປະກອບຄຳຄິດເຫັນ ແລກປ່ຽນຖອດຖອນບົດຮຽນຮ່ວມກັນກັບຂະແໜງການຕ່າງໆຕໍ່ກັບບົດລາຍງານທັງນີ້ກໍ່ເພື່ອຊອກໃຫ້ເຫັນບັນຫາທີ່ຄ້າງຄາວາງແຜນການຢ່າງມີຈຸດສຸມແກ້ໄຂໃຫ້ຖືກຈຸດເຮັດແນວໃດໃຫ້ປະຊາຊົນໄດ້ທຳການຜະລິດເປັນສິນຄ້າສ້າງລາຍຮັບໃຫ້ຫຼາຍກາຍເປັນຄອບຄົວພົ້ນທຸກ ແລະພັດທະນາໄປເທື່ອລະກ້າວ.

----

ໜັງສືພິມ ເສດຖະກິດ-ສັງຄົມ

แชร์