ນາຊາຍທອງ ປະເມີນຜົນງານ 9 ເດືອນ

  ກອງປະຊຸມຄົບຄະນະບໍລິຫານງານພັກເມືອງນາຊາຍທອງເປີດກວ້າງຄັ້ງທີ 2 ສະໄໝທີ VII ໄດ້ຈັດຂຶ້ນໃນວັນທີ 20 ຕຸລາ 2020 ທີ່ສະໂມສອນເມືອງນາຊາຍທອງນະຄອນຫຼວງວຽງຈັນເປັນປະທານຂອງທ່ານ ວຽງຄໍາ ສີຫາໂຄດເຈົ້າເມືອງນາຊາຍທອງ, ມີຄະນະປະຈໍາພັກເມືອງ, ກໍາມະການພັກພ້ອມດ້ວຍເລຂາໜ່ວຍພັກຫ້ອງການອ້ອມຂ້າງເຂົ້າຮ່ວມ.
ກອງປະຊຸມຄັ້ງນີ້ໄດ້ພ້ອມກັນຄົ້ນຄວ້າປຶກສາຫາລື ແລະຕົກລົງບັນຫາຕ່າງໆຄື: ຜ່ານຮ່າງບົດສະຫຼຸບຕີລາຄາການຊີ້ນໍາ-ນໍາພາວຽກງານຂອງຄະນະບໍລິຫານງານພັກເມືອງນາຊາຍທອງສະໄໝທີ VI ເຊື່ອມຕໍ່ກັບສະໄໝທີ VII ໃນໄລຍະ 9 ເດືອນຜ່ານມາ ແລະທິດທາງແຜນການ 3 ເດືອນທ້າຍປີ 2020 ໂດຍສະເພາະແມ່ນຊອກຫາຈຸດດີທີ່ຍາດມາໄດ້ພ້ອມກັນນັ້ນກໍ່ຊອກໃຫ້ເຫັນຈຸດອ່ອນຂໍ້ຄົງຄ້າງຫຼາຍສາເຫດທີ່ເຮັດບໍ່ໄດ້ດີເພື່ອປັບປຸງແກ້ໄຂດັ່ງນັ້ນຈະຕ້ອງເພີ່ມທະວີການນໍາພາຂອງການນໍາແຕ່ລະຂັ້ນເພື່ອຈັດຕັ້ງປະຕິບັດມະຕິທີ່ໄດ້ຮັບຮອງໃຫ້ໄປສູ່ການຈັດຕັ້ງປະຕິບັດຕົວຈິງໃຫ້ເກີດຜົນສໍາເລັດຕາມລະດັບຄາດໝາຍເປັນຕົ້ນ: ຂົງເຂດວຽກງານ ປກຊ-ປກສ: ສືບຕໍ່ປົກປັກຮັກສາສະຖຽນລະພາບ ທາງດ້ານການເມືອງໃຫ້ມີຄວາມໜັກແໜ້ນເຂັ້ມແຂງສັງຄົມມີຄວາມສະຫງົບປອດໄພ ແລະເປັນລະບຽບຮຽບຮ້ອຍເອົາໃຈໃສ່ແກ້ໄຂບັນຫາປາກົດການຫຍໍ້ທໍ້ຕ່າງໆໃຫ້ຫຼຸດລົງຢ່າງຈະແຈ້ງຂົງເຂດເສດຖະກິດ: ສືບຕໍ່ດໍາເນີນນະໂຍບາຍສົ່ງເສີມກໍາລັງແຮງຂອງທຸກພາກສ່ວນເສດຖະ ກິດເຂົ້າໃນການພັດທະນາເສດຖະກິດ-ສັງຄົມຢ່າງແຂງແຮງຈັດຕັ້ງປະຕິບັດແຜນພັດທະນາເສດຖະ ກິດ-ສັງຄົມໃຫ້ຂະຫຍາຍຕົວດ້ວຍຈັງ ຫວະໄວຕໍ່ເນື່ອງ ແລະໝັ້ນທ່ຽງຮອດປີ 2025 ໃຫ້ບັນລຸໃນຈັງຫວະ 7-8% ຕໍ່ປີລາຍໄດ້ສະເລ່ຍຕໍ່ຫົວຄົນບັນລຸ 29,77 ລ້ານກີບຕໍ່ຄົນຕໍ່ປີ ຂົງເຂດວັດທະນະທໍາ-ສັງຄົມ: ໃຫ້ໄດ້ຮັບການຂະຫຍາຍຕົວທາງດ້ານປະລິມານ ແລະຄຸນນະພາບໂດຍຕິດພັນກັບການສ້າງຄວາມສີວິໄລທາງດ້ານວັດຖຸໄປຄຽງຄູ່ກັບການສ້າງຄວາມຈະເລີນທາງດ້ານຈິດໃຈຢ່າງກົມກຽວຖືເອົາການພັດທະນາຊັບພະຍາກອນມະນຸດເປັນບູລິມະສິດທີ່ສໍາຄັນເຮັດໃຫ້ຄຸນນະພາບທາງດ້ານການສຶກສາມີການຫັນປ່ຽນຢ່າງຕັ້ງໜ້າຄຸນນະພາບຊີວິດ ແລະການເຂົ້າເຖິງການບໍລິການທາງດ້ານສາທາລະນະສຸກຂອງປະຊາຊົນໄດ້ຮັບການປັບປຸງຍົກລະດັບດີຂຶ້ນກວ່າເກົ່າ.
  ການດໍາເນີນກອງປະຊຸມຄັ້ງນີ້ເພື່ອເປັນບ່ອນອີງໃຫ້ແກ່ການສືບຕໍ່ຊີ້ນໍາ-ນໍາພາຄວາມຮັບຜິດຊອບຂອງຄະນະປະຈໍາພັກຂອງຄະນະພັກຂອງສ່ວນບຸກຄົນທີ່ບັນດາສະຫາຍໄດ້ປະກອບມານັ້ນຈະຕ້ອງໄດ້ພ້ອມກັນສູ້ຊົນບູລະນະປັບປຸງໃຫ້ມີການຫັນປ່ຽນໃນຕໍ່ໜ້າໃຫ້ບັນດາສະຫາຍຮັກ ສາໄດ້ຄວາມສາມັກຄີອັນເປັນປຶກແຜ່ນພາຍໃນພັກໃຫ້ເຂັ້ມແຂງກວ່າເກົ່າຮັກສາຄວາມກະຕືລືລົ້ນຄວາມຕັດສິນໃຈເພື່ອປະຕິບັດມະຕິ X ຂອງສູນກາງພັກໃຫ້ບັນລຸປະຕິບັດມະຕິ VI ຂອງອົງຄະນະພັກນະຄອນຫຼວງວຽງຈັນກໍ່ຄືມະຕິ VII ຂອງອົງຄະນະພັກເມືອງນາຊາຍທອງໃຫ້ປາກົດຜົນເປັນຈິງ.

----

ຂ່າວ: ແພງຕາ 

แชร์