ໂຮງຮຽນຫຼາຍແຫ່ງເມືອງໂຂງ ໄດ້ຮັບອຸປະກອນການສຶກສາ

  ທ້າຍອາທິດຜ່ານມາທີ່ໂຮງ ຮຽນປະຖົມສົມບູນບ້ານທ່າຄໍ້ເມືອງໂຂງແຂວງຈຳປາສັກກະຊວງການຕ່າງປະເທດນຳໂດຍທ່ານ ທອງຜ່ານ ສະຫວັນເພັດຮອງລັດຖະມົນຕີກະຊວງການຕ່າງປະເທດພ້ອມຄະນະຈາກສູນກາງ, ມີທ່ານ ພູວັນ ສີສຸພົນຮອງເລຂາພັກເມືອງ, ທ່ານ ສົມລິດແພງ ເພັດດາວັນຫົວໜ້າຫ້ອງການສຶກສາທິ ແລະກີລາເມືອງໄດ້ນຳເອົາອຸປະກອນການສຶກສາ ແລະອຸປະກອນກີລາລວມມູນຄາ 25 ລ້ານກວ່າກີບໄປມອບໃຫ້ກັບບັນດາໂຮງຮຽນຕ່າງໆທີ່ນອນໃນເປົ້າໝາຍ ແລະເຫັນວ່າຍັງຂາດເຂີນບໍ່ພຽງພໍຕໍ່ກັບຄວາມຕ້ອງການໃນເວລາສ້າງກິດຈະກຳ.

   ໂອກາດນີ້ທ່ານ ບຸນລ່ຽມ ໂງນກະເສີມສຸກປະທານແນວໂຮມບ້ານທ່າຄໍ້ໄດ້ຜ່ານບົດສະຫຼຸບໂດຍຫຍໍ້ວ່າ: ໂຮງຮຽນປະຖົມສົມບູນທ່າຄໍ້ສ້າງ ຂຶ້ນເມື່ອປີ 1967 ເມື່ອກ່ອນເປັນພຽງໂຮງຮຽນມູນລະປະຖົມ, ມີ 3 ຂັ້ນຮຽນ (ປ1-ປ5), ຮອດປີ 1975 ພັກລັດຖະບານມີນະໂຍບາຍຂະຫຍາຍຕາໜ່າງການສຶກສາ; ສະນັ້ນໂຮງຮຽນແຫ່ງນີ້ຈຶ່ງໄດ້ປັບປຸງສ້າງອາຄານຮຽນຫຼັງ ໃໝ່ ແລະປະກອບດ້ວຍ 5 ຂັ້ນຮຽນ (ປ1 ຮອດ ປ5) ມີຄູສອນ 5 ຄົນຈຶ່ງໄດ້ສ້າງເປັນໝວດໂຮງຮຽນປະຖົມສົມບູນທ່າຄໍ້ໃນປີ 1982 ເປັນຕົ້ນມາ; ປີ 2010 ຂະຫຍາຍໃຫ້ມີຫ້ອງຮຽນສຳລັບເດັກກ່ອນໄວຮຽນຕື່ມຄືຫ້ອງອະນຸບານ 1 ຫ້ອງຈົນມາຮອດປະຈຸບັນບ້ານທ່າຄໍ້ມີປະຊາກອນທັງໝົດ 1.808 ຄົນ, ຍິງ 987 ຄົນ, ໃນນັ້ນເດັກໃນເກນອາຍຸ 4-5 ປີມີ 50 ກວ່າຄົນ, ຍິງ 30 ກວ່າຄົນ, ໄດ້ເຂົ້າໂຮງຮຽນອະນຸບານ 30 ກວ່າຄົນ, ຍິງ 20 ຄົນ, ສະເລ່ຍອັດຕາເຂົ້າຮຽນ 59,32%,  ເດັກໃນເກນອາຍຸ 6-10  ປີມີ 170 ກວ່າຄົນ, ຍິງ 90 ກວ່າຄົນ, ສະເລ່ຍອັດຕາເຂົ້າຮຽນ 98,87%.

----

ໜັງສສືພິມ ເສດຖະກິດ-ສັງຄົມ

แชร์