1 ປີຜ່ານມາ ຄສຊ ແຂວງສາລະວັນ ເອົາໃຈໃສ່ຄົ້ນຄວ້າວຽກງານຫຼາຍດ້ານ

   ໃນວັນທີ 19 ຕຸລາ 2020, ຄະນະສະມາຊິກສະພາແຫ່ງຊາດ (ຄສຊ) ປະຈຳເຂດເລືອກຕັ້ງທີ 14 ສະຫຼຸບການເຄື່ອນໄຫວວຽກງານໃນໄລຍະ 1 ປີຜ່ານມາ, ໂດຍໃຫ້ກຽດເຂົ້າຮ່ວມຂອງທ່ານ ຄຳເຫຼັກ ອິນດາວົງ ປະທານສະພາປະຊາຊົນ ແຂວງສາລະວັນ, ມີທ່ານ ຄຳສິງ ໄຊສົມແພງ ຮອງຫົວໜ້າຄະນະຮັບຜິດຊອບວຽກງານເຂດເລືອກຕັ້ງສະພາແຫ່ງຊາດ, ທ່ານ ທອງດີ ຈັນທະວົງ ຮອງຫົວໜ້າຄະນະສະມາຊິກສະພາແຫ່ງຊາດປະຈຳເຂດເລືອກຕັ້ງທີ 14, ມີບັນດາສະມາຊິກສະພາແຫ່ງຊາດ ແລະສະມາຊິກສະພາປະຊາຊົນແຂວງເຂົ້າຮ່ວມ.

   ທ່ານ ສາຍສະໝອນ ອິນທິເສນ ເລຂາທິການທັງເປັນສະມາຊິກສະພາແຫ່ງຊາດປະຈຳເຂດເລືອກຕັ້ງທີ14 ໄດ້ສະຫຼຸບການເຄື່ອນໄຫວວຽກງານໃນໄລຍະ 1 ປີຜ່ານມາແມ່ນໄດ້ປະຕີບັດຕາມພາລະບົດບາດ, ສິດ ແລະ ໜ້າທີ່ຂອງຕົນຕາມກົດໝາຍຂອງສະພາແຫ່ງຊາດກຳນົດອອກໂດຍສະເພາະແມ່ນການປະຕິບັດໃນ 3 ພາລະບົດ ບາດສິດ ແລະໜ້າທີ່, ການຄົ້ນຄວ້າການປະກອບຄຳຄິດຄຳເຫັນໃສ່ຮ່າງກົດໝາຍຢູ່ຂັ້ນທ້ອງຖິ່ນ,ການຕີລາຄາການຄົ້ນຄວ້າ ແລະມີຄໍາເຫັນຂອງ ສສຊ ແມ່ນໄດ້ຮັບຂໍ້ມູນພື້ນຖານ ແລະບັນຫາຕົວຈິງຢູ່ຮາກຖານ, ໄດ້ນຳເອົາຮ່າງກົດໝາຍຂອງສະພາແຫ່ງຊາດລົງເຄື່ອນໄຫວທາບທາມກຸ່ມເປົ້າໝາຍ ໄດ້ 2 ຄັ້ງ ຈຳນວນ 4 ສະບັບ, ລົງຕິດ ຕາມກວດກາການເຄື່ອນໄຫວຕາມແຜນປີປົກກະຕິ, ໄດ້ສ້າງແຜນເຄື່ອນໄຫວຕາມມະຕິຂອງສະພາແຫ່ງຊາດເພື່ອລົງຕິດຕາມບັນຫາທີ່ມີຫາງສຽງຂອງສັງຄົມ, ຄຽງຄູ່ກັນນັ້ນອີງໃສ່ຄຳສະເໝີຂອງອົງການປົກຄອງ ຫຼືວຽກເຄັ່ງຮ້ອນຂອງຮາກຖານ ແລະໄດ້ນຳເອົາມະຕິສຳຄັນຕ່າງໆລົງເຜີຍແຜ່ ແລະເກັບກໍາເອົາຄໍາຄິດຄໍາເຫັນຄໍາສະເໜີຄວາມຂັດຂ້ອງໝອງໃຈຂອງປະຊາຊົນ, ຈັດສຳມະນາ ແລະຝຶກອົບຮົມຕາມຫົວຂໍ້ຕ່າງໆໃນແຕ່ລະເປົ້າໝາຍ ແລະສ້າງນິຕິກຳເພື່ອເປັນບ່ອນອີງໃນການເຄື່ອນໄຫວວຽກງານອື່ນໆຕື່ມອີກ. ນອກຈາກນັ້ນກໍ່ຍັງຕີລາຄາຈຸດດີ, ຈຸດອ່ອນ, ຂໍ້ຄົງຄ້າງ ແລະການຖອດຖອນບົດຮຽນເພື່ອນຳໄປຈັດຕັ້ງປະຕິບັດໃນຕໍ່ໜ້າໂດຍສະເພາະການປະກອບ ຄຳຄິດຄຳເຫັນໃສ່ຮ່າງກົດໝາຍ,ການຕິດຕາມກວດກາ,ການລົງພົບປະປະຊາຊົນ ແລະການສ້າງນິຕິກຳຕ່າງໆ ເພື່ອເຮັດໃຫ້ການເຄື່ອນໄຫວມີຄວາມສະດວກ, ຖືກຕ້ອງ ແລະສອດຄ່ອງ.


 ຈາກນັ້ນຜູ້ເຂົ້າຮ່ວມກໍ່ພ້ອມກັນປະກອບຄຳຄິດຄຳເຫັນໃສ່ບົດລາຍງານການເຄື່ອນໄຫວໃນໄລຍະ 1 ປີ ຜ່ານມາເພື່ອໃຫ້ເຫັນໄດ້ຈຸດດີ, ຂໍ້ຄົງຄ້າງ ແລະນຳໄປຈັດຕັ້ງປະຕິ ບັດໃຫ້ໄດ້ຮັບຜົນສຳເລັດເປັນກ້າວໆ.

----------------

ຂ່າວ: ທິດລານີ ໂຄດໂຍທາ 

ຮູບພາບ: #ຫນັງສືພິມເສດຖະກິດສັງຄົມ

แชร์