ປະຊາຊົນເມືອງຊົນນະບູລີ ຫຼາຍກວ່າ 24 ພັນຄົນ ໄດ້ຮັບຜົນກະທົບຈາກນໍ້າຖ້ວມ

 ຈາກການລາຍງານຂໍ້ມູນຂອງກອງເລຂາຕ້ານໄພພິບັດຂັ້ນເມືອງໃນຄັ້ງວັນທີ 19 ຕຸລາ 2020 ກ່ຽວກັບສະພາບໄພນໍ້າຖ້ວມໃນທົ່ວເມືອງຊົນນະບູລີໄດ້ໃຫ້ຮູ້ວ່າ: ໃນປະ ຈຸບັນນີ້, ເມືອງຊົນນະບູລີກໍາລັງປະສົບກັບໄພນໍ້າຖ້ວມຢ່າງໜັກໜ່ວງຊຶ່ງມີບ້ານທີ່ໄດ້ຮັບຜົນກະທົບທັງໝົດ 40 ບ້ານ, ມີ 3.668 ຫຼັງຄາ, ມີພົນລະເມືອງ 24.450 ຄົນ, ຍິງ 12.388 ຄົນ, ເນື້ອທີ່ຖືກຖ້ວມ 5.735 ເຮັກຕາ, ສວນພືດຜັກຖືກຖ້ວມ 176 ເຮັກຕາ, ໜອງປາ 235 ໜອງ, ລະບົບຊົນລະປະທານ 9 ແຫ່ງ, ປະຕູນໍ້າ 3 ແຫງ, ໂຮງຮຽນທີ່ໄດ້ຮັບຜົນກະທົບ ແລະຕ້ອງໂຈະການຮຽນຊົ່ວຄາວມີ: ໂຮງຮຽນປະຖົມ 9 ແຫ່ງ, ໂຮງຮຽນມູນລະປະຖົມ 6 ແຫ່ງ,ມັດທະຍົມຕົ້ນ 2 ແຫ່ງ, ລວມທັງໝົດ 17 ແຫ່ງ, ບ້ານທີ່ຕ້ອງລະງັບການໃຊ້ໄຟຟ້າຊົ່ວຄາວເພື່ອຄວາມປອດໄພມີ 9 ບ້ານຄື: ບ້ານບຶງຊ້າງ, ກອງປະທຸມວັນ, ບ້ານທ່າຄໍາເຫຼື້ອມ, ບ້ານດອນຍາໂນງ, ບ້ານໜອງສອງຫ້ອງ, ບ້ານເມືອງໂຮງ, ບ້ານດົງໜອງແຄນ ແລະບ້ານຕັ່ງຫວາຍນໍ້າ.

  ນອກຈາກນີ້ກໍ່ມີເສັ້ນທາງຖືກຖ້ວມ ແລະຕັດຂາດການສັນຈອນມີ: ເສັ້ນທາງບ້ານນາໜອງຜໍາຫາດົງບູນ, ເສັ້ນທາງບຶງຊ້າງຫາບ້ານໂຄກຫົວຊ້າງ, ເສັ້ນທາງບ້ານໂຄກຫົວຊ້າງຫາບ້ານທ່າຄໍາເຫຼື້ອມ, ເສັ້ນທາງບ້ານທ່າຄໍາເຫຼື້ອມຫາບ້ານດອນຍາໂນງ, ເສັ້ນທາງບ້ານຕັ່ງຫວາຍນໍ້າຫາບ້ານກະລືມວັງແຂ້, ເສັ້ນທາງຈຸດສຸມຕັ່ງຫວາຍຫາກະ ທອງເຊ, ເສັ້ນທາງບ້ານກະທອງ ເຊຫາບ້ານນາຈານໃຫຍ່, ເສັ້ນທາງບ້ານກອງປະທຸມວັນຫາເມືອງຊົນນະບູລີ, ເສັ້ນທາງໂພໄຊຄູນຫາ ບ້ານດົງຫວາຍ, ເສັ້ນທາງບ້ານ ດົງຫວາຍຫາບ້ານໜອງຜື,ເສັ້ນທາງບ້ານກະຫຼາງຫາບ້ານຕໍາປອງ, ເສັ້ນທາງບ້ານຕັ່ງຫວາຍໂຄກ ຫາບ້ານໂພໄຊຄູນ, ເສັ້ນທາງແຕ່ຂົ້ວຫ້ວຍນ້ໍາດີ້ງຫາບ້ານໄຊສົມບູນ, ເສັ້ນທາງແຕ່ຂົ້ວຫ້ວຍເຊວັນຫາບ້ານໜອງເບັນ, ເສັ້ນທາງແຕ່ຂົ້ວຫ້ວຍຕະຫຼຶງຫາບ້ານນາບົງ ແລະເສັ້ນທາງແຕ່ຂົ້ວຫ້ວຍເປາະຫາບ້ານອາຫໍ.

  ປະຈຸບັນ, ການນໍາຂອງເມືອງຊົນນະບູລີ ພ້ອມດ້ວຍຄະນະຕ້ານໄພພິບັດຂັ້ນເມືອງ, ອົງການຈັດຕັ້ງມະຫາຊົນ, ກໍາລັງ ປກຊ-ປກສ ສົມທົບກັບກໍາລັງກອງຮ້ອຍຄໍ 35 ໄດ້ລົງໃຫ້ການຊ່ວຍເຫຼືອອົບພະຍົບປະຊາຊົນ, ຂົນວັດຖຸເຄື່ອງຂອງຕ່າງໆອອກຈາກພື້ນທີ່ສ່ຽງເພື່ອຄວາມປອດໄພທາງດ້ານຊີວິດ ແລະຊັບສີນຂອງປະຊາຊົນນອກນີ້, ກໍ່ຍັງໄດ້ໃຊ້ເຮືອຊ່ວຍເຫຼືອປະຊາຊົນໃນການຂົນເຂົ້າຜ່ອນໃນເຂດບ້ານທີ່ໄດ້ຮັບຜົນກະທົບມີຈຳນວນ 80 ຄອບຄົວ ໂດຍມາຮອດປະຈຸບັນນີ້, ລະດັບນໍ້າແມ່ນຍັງເພີ່ມຂຶ້ນຢ່າງຕໍ່ເນື່ອງ ແລະໄຫຼເຂົ້າຖ້ວມເນື້ອທີ່ນາຮົ້ວສວນ ແລະອາດຈະໄຫຼເຂົ້າຖ້ວມບ້ານເຮືອນຂອງປະຊາຊົນຕື່ມອີກ. ສ່ວນຄວາມເສຍຫາຍແມ່ນຈະໄດ້ລາຍງານຕື່ມອີກພາຍຫຼັງ; ສຳລັບສິ່ງທີ່ຈຳເປັນ ແລະທາງເມືອງຕ້ອງການຄວາມຊ່ວຍເຫຼືອໃນປະຈຸບັນແມ່ນເຂົ້າສານ, ອາຫານແຫ້ງ, ນໍ້າດື່ມ, ຢາປົວພະຍາດ ແລະເຮືອເພື່ອຊ່ວຍເຫຼືອປະຊາຊົນທີ່ໄດ້ຮັບຜົນກະທົບຈາກໄພນໍ້າຖ້ວມ.

---------------

ຂ່າວ: ເມືອງຊົນນະບູລີ 

ຮູບພາບ: #ຫນັງສືພິມເສດຖະກິດສັງຄົມ

แชร์