ອ້າງເປັນຜູ້ຕາງໜ້າໄຟຟ້າລາວ ຫຼອກລວງເອົາເງິນປະຊາຊົນເສຍຫາຍ 60 ລ້ານກວ່າກີບ

   ເຈົ້າໜ້າທີ່ພະແນກຕຳຫຼວດ ປກສ ເມືອງ ແລະແຂວງໄຊຍະບູລີ ໄດ້ກັກຕົວ ທ້າວ ໄຊຄຳ ມຸງຄຸນ ອາຍຸ 46 ປີ ອາຊີບປະຊາຊົນ ບ້ານໃໝ່ໜອງຄວາຍ ເມືອງວຽງຄຳ ແຂວງວຽງຈັນ ມາດຳເນີນການສືບສວນ-ສອບສວນ ເມື່ອວັນທີ 4 ກໍລະກົດ 2020 ຜ່ານມາໃນຂໍ້ຫາສໍ້ໂກງຊັບພົນລະເມືອງຜົນເສຍຫາຍ 63,2 ລ້ານກີບ.

  ຜ່ານການສືບສວນ-ສອບສວນ ທ້າວ ໄຊຄໍາ ມຸງຄຸນ ໄດ້ໃຫ້ສາລະພາບຕໍ່ເຈົ້າໜ້າທີ່ວ່າໃນໄລຍະປີ 2018–2019 ຕົນເອງໄດ້ເດີນທາງອອກຈາກບ້ານໃໝ່ໜອງຄວາຍໄປແຂວງໄຊຍະບູລີ ໂດຍມີຈຸດປະສົງເພື່ອເຄື່ອນໄຫວຕົວະຍົວະຫຼອກລວງເອົາເງິນປະຊາຊົນໂດຍໃຊ້ຮູບການອ້າງວ່າຕົນເອງເປັນຜູ້ຕາງໜ້າໃຫ້ບໍລິສັດໄຟຟ້າລາວ ຂອງບໍລິ ສັດເອກະຊົນລົງກວດກາຕິດຕັ້ງໄຟຟ້າເຂົ້າເຮືອນໃຫ້ປະຊາຊົນຢູ່ເຂດເມືອງພຽງ ແລະເມືອງໄຊຍະບູລີໂດຍນຳໃຊ້ລົດກະບະວີໂກສີປອນເງິນໝາຍເລກທະບຽນ ກດ5339 ກຳແພງນະຄອນ ເປັນພາຫານະຮັບໃຊ້ໃນການເຄືອນໄຫວຢູ່ແຕ່ລະບ້ານຊຶ່ງເບື້ອງຕົ້ນໄດ້ລົງສຳພາດຫົວໜ່ວຍຄອບຄົວ, ພ້ອມທັງລະດົມໃຫ້ແຕ່ລະຄອບຄົວທີ່ມີເງື່ອນໄຂຕິດຕັ້ງໄຟຟ້າເຂົ້າເຮືອນຕ້ອງໄດ້ຈ່າຍຄ່າຕິດຕັ້ງລ່ວງໜ້າພາຍຫຼັງໄດ້ເງິນຈາກການຕົວະຍົວະຫຼອກລວງມາກໍ່ໄດ້ໃຊ້ຈ່າຍຈົນໝົດ.

   ຕໍ່ມາປະຊາຊົນຜູ້ຖືກເສຍຫາຍຈຶ່ງໄດ້ແຈ້ງຄວາມຕໍ່ອຳນາດການປົກຄອງບ້ານ ແລະເຈົ້າໜ້າທີ່ກ່ຽວຂ້ອງລົງກວດກາຕົວຈິງ, ໃນທີ່ສຸດກໍພົບວ່າທ້າວ ໄຊຄໍາ ມຸງຄຸນ ມີພຶດຕິກໍາເຄື່ອນໄຫວຕົວະຍົວະຫຼອກລວງເອົາເງິນນໍາປະຊາຊົນດ້ວຍຮູບການອ້າງວ່າເປັນຜູ່ຕາງໜ້າບໍລິສັດ ໄຟຟ້າລາວ ຂອງບໍລິສັດ ເອກະຊົນໃຫ້ລົງຕິດຕັ້ງໄຟຟ້າເຂົ້າເຮືອນປະຊາຊົນຊຶ່ງຜູ້ເສຍຫາຍຢູ່ເມືອງພຽງ ມີ 2 ບ້ານ ຈໍານວນ 3 ຄອບຄົວ ແລະຢູ່ເມືອງໄຊຍະບູລີ ມີ 11 ບ້ານ ຈໍານວນ30 ຄອບຄົວຜົນເສຍຫາຍເປັນເງິນ 63,2 ລ້ານກີບ. ເຈົ້າໜ້າທີ່ຈິ່ງໄດ້ກັກຕົວຜູ່ກ່ຽວ,ພ້ອມດ້ວຍພາຫະນະລົດໃຫຍ່ 1ຄັນ ມາດໍາເນີນຄະດີໃນຂໍ້ຫາສໍ້ໂກງຊັບພົນລະເມືອງເມື່ອວັນທີ 4ກໍລະກົດ 2020ຜ່ານມາ. 

แชร์