ທຳລາຍສິນຄ້າລັກລອບນຳເຂົ້າ

  ພະແນກຕໍາຫຼວດປ້ອງກັນເສດຖະກິດຫ້ອງຕໍາຫຼວດ ປກສ ນະຄອນຫຼວງວຽງຈັນ ໄດ້ສົມທົບກັບພະແນກອຸດສະຫະກໍາການຄ້າ ນວ ທໍາລາຍສິນຄ້າປະເພດພືດຜັກທີ່ນໍາເຂົ້າບໍ່ຖືກຕ້ອງ ແລະບໍ່ໄດ້ຮັບການກວດກາລວມມີ: ຜັກບົ່ວໃບຈໍານວນ 109 ຖົງ, ມີນໍ້າໜັກ 1,090 ກິໂລກຣາມ; ຜັກກາດນາ 14 ຖົງ, ມີນໍ້າໜັກ 140 ກິໂລ ກຣາມ ແລະໝາກລິ້ນໄມ້ 114 ຖົງ, ມີນໍ້າໜັກ 912 ກິໂລກຣາມ.

   ພິທີທໍາລາຍດັ່ງກ່າວໄດ້ຈັດຂຶ້ນຢູ່ເດີ່ນຫ້ອງຕໍາຫຼວດ ປກສ ນວ, ໃນຕອນບ່າຍວັນທີ 15 ຕຸລາ 2020 ໂດຍມີ ພັທ ຄໍາພອນພົມມະຈັນ ຮັກສາການຫົວໜ້າພະແນກ ຕໍາຫຼວດປ້ອງກັນເສດຖະກິດຫ້ອງຕໍາຫຼວດ ປກສ ນວ ພ້ອມຄະນະ ແລະພາກສ່ວນທີ່ກ່ຽວຂ້ອງເຂົ້າຮ່ວມ.

   ສຳລັບສິນຄ້າທີ່ທຳລາຍໃນຄັ້ງນີ້, ພັທ ຄໍາພອນ ພົມມະຈັນ ຮັກສາການຫົວໜ້າພະແນກຕໍາຫຼວດປ້ອງກັນເສດຖະກິດຫ້ອງຕໍາຫຼວດ ປກສ ນວ ໄດ້ໃຫ້ຮູ້ວ່າ: ໃນວັນທີ 14 ຕຸລາ 2020 ເວລາ 14:00 ໂມງ, ເຈົ້າໜ້າທີ່ພະແນກຕໍາຫຼວດປ້ອງ ກັນເສດຖະກິດໄດ້ອອກຕິດຕາມກວດກາ ຕາມການລາຍງານຂອງພົນລະເມືອງດີພົບເຫັນລົດກະບະຮຸ່ນໄດຄັນສີຂາວ, ໝາຍເລກທະບຽນ ກສ7284 ກຳແພງນະຄອນ ກໍາລັງມຸ່ງໜ້າໄປທາງເຂດບ້ານວັດຈັນ ເມືອງຈັນທະບູລີ. ເຈົ້າໜ້າທີ່ຈິ່ງສະແດງຕົວເຂົ້າກວດກາພົບວ່າ: ໃນທ້າຍລົດມີສິນຄ້າປະເພດພືດຜັກທີ່ນໍາເຂົ້າບໍ່ຖືກຕ້ອງ, ບໍ່ມີເອກະສານອະນຸຍາດຈາກພາກສ່ວນທີ່ກ່ຽວຂ້ອງ. ສະນັ້ນ,ເຈົ້າໜ້າທີ່ຈິ່ງນໍາລົດຄັນດັ່ງກ່າວ ມາຫ້ອງຕຳຫຼວດ ປກສ ນວ ເພື່ອກວດກາຕົວຈິງ.

  ສໍາລັບຜູ້ກະທໍາຜິດ, ເຈົ້າໜ້າທີ່ຕໍາຫຼວດປ້ອງກັນເສດຖະກິດໄດ້ເຮັດບົດບັນທຶກສຶກສາອົບຮົມກ່າວເຕືອນ ແລະປັບໄໝຕາມລະບຽບກົດໝາຍ.

แชร์