45 ບ້ານ ເມືອງເຊໂປນ ຮັບຜົນກະທົບໜັກຈາກນໍ້າຖ້ວມ

  ຂປລ. ນັບແຕ່ວັນທີ 7-20 ຕຸລາ 2020 ຜ່ານມາ, ເນື່ອງຈາກມີຝົນຕົກໜັກຕິດຕໍ່ກັນຫຼາຍວັນເຮັດໃຫ້ປະຊາຊົນ 45 ບ້ານ, ມີ 2.310 ຫຼັງຄາ, ຈໍານວນພົນ 14.590 ຄົນ ຢູ່ເມືອງເຊໂປນ ແຂວງສະຫວັນນະເຂດ ໄດ້ຮັບຜົນກະທົບຢ່າງໜັກຈາກໄພພິບັດນໍ້າຖ້ວມ; ນັ້ນຍັງມີເສັ້ນທາງ, ຂົວ, ໂຮງຮຽນ, ສຸກສາລາ, ເສົາໄຟ ຟ້າ, ລະບົບພື້ນຖານໂຄງລາງຈໍານວນໜຶ່ງ ແລະສັດລ້ຽງຖືກນໍ້າຖ້ວມເສຍຫາຍເຊັ່ນດຽວກັນ,ປະຈຸບັນນໍ້າໄດ້ບົກແຫ້ງຫຼາຍແລ້ວທາງເມືອງກໍາລັງລົງຕິດຕາມຄວາມເສຍ ຫາຍ ແລະສືບຕໍ່ຊ່ວຍເຫຼືອບັນເທົາທຸກຢ່າງຕໍ່ເນື່ອງ.

   ເມືອງເຊໂປນ ແມ່ນໜຶ່ງໃນ 8 ເມືອງ ຂອງແຂວງສະຫວັນນະເຂດ ທີ່ໄດ້ຮັບຜົນກະທົບຢ່າງໜັກຈາກໄພພິບັດນໍ້າຖ້ວມຊຶ່ງສາມາດເກັບກໍາຂໍ້ມູນຄວາມເສຍຫາຍເບື້ອງ ຕົ້ນຕໍ່ຊັບສິນຂອງລັດ ແລະປະຊາຊົນໄດ້ຈໍານວນຫຼາຍເປັນຕົ້ນແມ່ນປະຊາຊົນຖືກນໍ້າຖ້ວມ 45 ບ້ານ,ມີ 2.310 ຫຼັງຄາ,ມີ 2.525 ຄອບຄົວ,ພົນລະເມືອງ14.590 ຄົນ, ໃນນັ້ນບ້ານທີ່ໄດ້ຍົກຍ້າຍອອກມີ 27 ບ້ານ, ມີ 1.817 ຄອບບຄົວມີ 11.298 ຄົນ, ເຮືອນຫັກເປ່ເພ 55 ຫຼັງ, ເຮືອນຖືກນໍ້າໄຫຼຊຸ 37 ຫຼັງ ຢູ່ບ້ານແກ້ງຫົວປາ (ຄຸ້ມວັງຄົດ) ແລະບ້ານລະອໍ; ນອກນັ້ນຍັງຖ້ວມເລົ້າເຂົ້າ 69 ຫຼັງ; ຖ້ວມວັດ 4 ແຫ່ງ; ເຮືອເສຍ 19 ລໍາ ແລະສັດລ້ຽງຂອງປະຊາຊົນຈໍານວນໜຶ່ງ. ສ່ວນບ້ານ ແລະຄອບຄົວທີ່ໄດ້ຮັບຜົນກະທົບທາງດ້ານກະສິກຳເຊັ່ນນໍ້າຖ້ວມນາ 39 ບ້ານ, ເນື້ອທີ່ນາ 1.768 ເຮັກຕາ, ໄຮ່ເຂົ້າ 958 ເຮັກຕາ, ສວນໄມ້ອຸດສາຫະກໍາ 717 ເຮັກ

ຕາ, ສວນພືດຜັກຕ່າງໆ 52 ເຮັກຕາ, ໜອງປາ 274 ໜອງ. ຜົນກະທົບທາງດ້ານສາທາລະນະສຸກ: ສຸກສາລາຖືກນໍ້າຖ້ວມມີ 4 ແຫ່ງ,ມີພະຍາດເກີດຂຶ້ນ 1.642 ກໍລະນີໃນນັ້ນຖອກທ້ອງ 67 ກໍລະນີ, ໝວດອາການຄ້າຍຄືໄຂ້ຫວັດ 439 ກໍລະນີ, ພະຍາດຜິວໜັງ(ຕີນເປື່ອຍ) 1.070 ກໍລະນີ, ພະຍາດຕາແດງ 66 ກໍລະນີ; ມີວິດຖ່າຍຖືກນ້ຳຖ້ວມ 1.135 ໜ່ວຍ; ນໍ້າສ້າງ ແລະ ນໍ້າບາດານທີ່ຖືກນໍ້າຖ້ວມ 492 ບໍ່; ໂຮງຮຽນປະຖົມຖືກຖ້ວມທັງໝົດ 21 ແຫ່ງ, ໂຮງຮຽນ ມຕ/ມປ2 ແຫ່ງ. ນອກນີ້ຍັງມີເສັ້ນທາງ, ເສົາໄຟຟ້າ ແລະລະບົບຊົນລະປະທານປະຕູນໍ້າຖືກນໍ້າຖ້ວມເສຍຫາຍຈໍານວນໜຶ່ງສ່ວນມູນຄ່າຄວາມເສຍ ຫາຍຄະນະກໍາມະການຕ້ານໄພພິບັດຂັ້ນເມືອງກໍາລັງຂຸ້ນຂ້ຽວເກັບກໍາຂໍ້ມູນ ແລະໃຫ້ການຊ່ວຍເຫຼືອເບື້ອງຕົ້ນເຊັ່ນ: ໄດ້ມອບໝີ່, ນໍ້າດື່ມ,ປ໋ອງປາ, ເຂົ້າສານ ແລະເຄື່ອງໃຊ້ທີ່ຈໍາເປັນຕ່າງໆ.

   ສະພາບເສັ້ນທາງທີ່ໄດ້ຮັບຜົນກະທົບໜັກແຕ່ແຍກເມືອງນອງເຂດບ້ານສະທຶມໄປຫາຈຸດສຸມກະຕູບ-ແດນວິໄລຍາວ 46 ກິໂລແມັດ, ແຕ່ແຍກທາງເລກ 9 ບ້ານດົງສະຫວັນ ຫາ ຈຸດສຸມລະໂກ ຍາວ 41 ກິໂລແມັດ, ແຕ່ຈຸດສຸມລະໂກ ຫາ ດ່ານຕະລຸງ1,4 ກິໂລແມັດ, ແຕ່ຈຸດສຸມລະໂກຫາບ້ານໃໝ່ຜາບັງຍາວ 46 ກິໂລແມັດ, ແຕ່ສາມແຍກຄ້າຍທະຫານ ບ້ານສະແລນ ຫາ ດ່ານບ້ານໃໝ່ 6 ກິໂລແມັດ, ແຕ່ແຍກທາງ 28A ຫາ ຈຸດສຸມລາດຫໍ້ 16 ກິໂລແມັດ, ຜາບັງ ບ້ານກະດໍ ຍາວ 25 ກິໂລ ແມັດ, ບ້ານກະດໍ ຫາ ສາມແຍກຄ້າຍທະຫານ 14 ກິໂລແມັດ, ຂົວຈົມຂາດ 2 ແຫ່ງ; ແຕ່ສາມແຍກຄ້າຍທະຫານຫາບ້ານລະວິງ 23,.4 ກິໂລແມັດ, ແຕ່ສາມແຍກຄ້າຍທະຫານ ຫາ ຈຸດສຸມຊຽງຕູບ 18 ກິໂລແມັດ. ສ່ວນຜົນກະທົບທາງດ້ານໄຟຟ້າ: ເສົາໄຟຟ້າຫັກລົ້ມ 4 ຕົ້ນ, ງົດໃຊ້ໄຟຟ້າ 26 ບ້ານ, ໝໍ້ນັບໄຟຖືກນໍ້າຖ້ວມ 19 ໜ່ວຍ. ສໍາຫລັບການປ່ອຍກະແສໄຟຟ້າແຕ່ບ້ານສະແລນ ຫາ ຈຸດສຸມລະໂກມີ7 ບ້ານ ແລະຄ້າຍທະຫານ 2 ຄ້າຍ ບໍ່ສາມາດນໍາໃຊ້ໄຟຟ້າໄດ້.

แชร์