ຂ່າວດ່ວນ!! ສປປ ລາວ ພົບຜູ້ຕິດເຊື້ອໂຄວິດ-19 ອີກ 1 ຄົນ ເປັນກໍລະນີນຳເຂົ້າຈາກປະເທດທີ່ມີການລະບາດ

  ຄະນະສະເພາະກິດໂຄວິດ-19 ຖະແຫຼງຂ່າວ ສປປ ລາວ ພົບຜູ້ຕິດເຊື້ອໂຄວິດ-19 ອີກ 1 ຄົນ ນັກສຶກສາລາວຮຽນຢູ່ ສ ຣັດເຊຍ ເດີນທາງມາຮອດ ສປປ ລາວ ໃນວັນທີ 18 ຕຸລາ ແລະ ໄດ້ຖືກເກັບຕົວຢ່າງເພື່ອກວດຫາເຊື້ອພະຍາດໂຄວິດ-19 ແລ້ວສົ່ງເຂົ້າຈຳກັດບໍລິເວນຢູ່ສູນທີ່ຄະນະສະເພາະກິດກຳນົດໄວ້, ວັນທີ 20 ຕຸລາ 2020 ຜົນກວດແມ່ນພົບເຊື້ອພະຍາດໂຄວິດ-19.

   ໃນວັນພຸດທີ 21 ຕຸລາ 2020 ທ່ານ ຮສ. ດຣ. ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກ, ຫົວໜ້າກອງເລຂາຄະນະສະເພາະກິດເພື່ອປ້ອງ ກັນ, ຄວບຄຸມ ແລະແກ້ໄຂການລະບາດຂອງພະຍາດໂຄວິດ-19 ພ້ອມດ້ວຍ ທ່ານ ດຣ.ຣັດຕະນະໄຊ ເພັດສຸວັນ ຫົວໜ້າກົມຄວບຄຸມພະຍາຕິດຕໍ່ໄດ້ຖະແຫຼງຂ່າວປະຈໍາວັນວ່າ: ໃນວັນທີ 20 ຕຸລາ 2020 ໄດ້ເກັບຕົວຢ່າງມາກວດວິເຄາະທັງໝົດ 303 ຄົນ, ໃນນັ້ນມີແຮງງານລາວມາແຕ່ໄທ 117 ຕົວຢ່າງ,ແຮງງານຈີນ 13 ຕົວຢ່າງ ແຮງງານຫວຽດນາມ 55 ຕົວຢ່າງ, ແຮງງານໄທ 18 ຕົວຢ່າງ ແລະບຸກຄົນທົ່ວໄປທີ່ບໍ່ມີອາການ 100 ຕົວຢ່າງ.

   ຜົນກວດວິເຄາະທັງໝົດແມ່ນແມ່ນພົບຜູ້ຕິດເຊື້ອຈຳນວນ 1 ຕົວຢ່າງ, ເປັນເພດຊາຍ ອາຍຸ 23 ປີ, ສັນຊາດລາວ, ອາໄສຢູ່ເມືອງຈັນທະບູລີ ນະຄອນຫຼວງວຽງຈັນ, ອາຊີບນັກສຶກສາລາວຮຽນຢູ່ ສ ຣັດເຊຍ, ຜູ້ກ່ຽວຈຳກັດບໍລິເວນຢູ່ສູນທີ່ຄະນະສະເພາະກິດກຳນົດໄວ້ ແລະຢູ່ໃນຫ້ອງຄົນດຽວ.

   ຕາມການບອກເລົ່າຂອງຜູ້ກ່ຽວ: ວັນທີ 2-3 ກັນຍາ 2020 ຜູ້ກ່ຽວມີອາການໄຂ້, ໄອ, ເມື່ອຍ ແລະດັງບໍ່ໄດ້ກິ່ນ, ຜູ້ກ່ຽວໄດ້ຈຳກັດບໍລິເວນຕົນເອງຢູ່ຫ້ອງໃນຫໍພັກ ແລະບໍ່ໄດ້ໄປພົບແພດ. ປະມານ 1 ອາທິດ ຜູ້ກ່ຽວມີອາການດີຂຶ້ນແຕ່ຍັງສືບຕໍ່ມີອາການດັງບໍ່ໄດ້ກິ່ນ.

ວັນທີ 6 ຕຸລາ 2020 ຜູ້ກ່ຽວມີຈຸດປະສົງຢາກເດີນທາງກັບ ສປປ ລາວ, ຈຶ່ງໄດ້ເດີນທາງໄປກວດຢູ່ໂຮງໝໍ.
ວັນທີ 9 ຕຸລາ 2020 ຜົນກວດພົບເຊື້ອພະຍາດໂຄວິດ-19, ຈຶ່ງໄດ້ເດີນທາງໄປຈຳກັດບໍລິເວນຕົນເອງຢູ່ສູນ, ທາງໂຮງຮຽນຈຶ່ງໄດ້ແຈ້ງສະຖານທູດລາວປະຈໍາຣັດເຊຍ.
ວັນທີ 12 ຕຸລາ 2020 ຜົນກວດພົບບໍ່ພົບເຊື້ອພະຍາດໂຄວິດ-19, ຜູ້ກ່ຽວຈຶ່ງໄດ້ເດີນທາງກັບມາຫໍພັກເພື່ອກຽມໂຕຂຶ້ນຍົນບິນກັບ ສປປ ລາວ.
ວັນທີ 14 ຕຸລາ 2020 ເດີນທາງອອກຈາກຫໍພັກໄປເມືອງມົດສະກູສ ຣັດເຊຍ.

ວັນທີ 15 ຕຸລາ 2020ເດີນທາງອອກຈາກເມືອງມົດສະກູສ ຣັດເຊຍ ມາຫາ ປາຣີ, ປະເທດຝຣັ່ງ.
ວັນທີ 16 ຕຸລາ 2020 ເດີນທາງອອກຈາກ ປາຣີປະເທດຝຣັ່ງ ມາຮອດ ອິນຊອນສ ເກົາຫຼີ ໃນວັນທີ 17 ຕຸລາ.
ວັນທີ 17 ຕຸລາ 2020 ເດີນທາງອອກຈາກອິນຊອນ ສ ເກົາຫຼີ ມາສະໜາມບິນວັດໄຕ.
ວັນທີ 18 ຕຸລາ 2020 ມາຮອດ ສປປ ລາວ ໄດ້ຖືກເກັບຕົວຢ່າງເພື່ອກວດຫາເຊື້ອພະຍາດໂຄວິດ-19.
ວັນທີ 20 ຕຸລາ 2020 ຜົນກວດແມ່ນພົບເຊື້ອພະຍາດໂຄວິດ-19.

   ຜູ້ໂດຍສານທີ່ເດີນທາງຮ່ວມກັບຜູ້ກ່ຽວມີທັງໜົດ 122 ທ່ານ, ລວມທັງຜູ້ກ່ຽວນຳເຊິ່ງທັງໝົດແມ່ນໄດ້ເກັບຕົວຢ່າງ ແລະຜົນກວດບໍ່ພົບເຊື້ອ, ຍົກເວັ້ນຜົນກວດຂອງຜູ້ກ່ຽວແມ່ນກວດພົບເຊື້ອໂຄວິດ-19. ສຳລັບຜູ້ສຳຜັດໃກ້ຊິດກັບຜູ້ກ່ຽວມີທັງໝົດ 27 ຄົນ (ໃນນັ້ນມີ 14 ຄົນ ນັ່ງຕັ່ງ ນໍ້າເບີໃກ້ກັບຜູ້ກ່ຽວໃນໄລຍະຢູ່ໃນຍົນ ແລະ ອີກ 13 ຄົນແມ່ນຂີ່ລົດເມຄັນດຽວກັນເພື່ອເດີນທາງໄປຍັງສະຖານທີ່ຈຳກັດບໍລິເວນທີ່ຖືກກຳນົດໄວ້).

ຜູ້ສຳຜັດໃກ້ຊິດທັງໝົດແມ່ນໄດ້ຖືກເກັບຕົວຢ່າງ,ຜົນກວດແມ່ນບໍ່ພົບເຊື້ອ ແລະໄດ້ຖືກຈຳກັດບໍລິເວນຢູ່ສະຖານທີ່ທີ່ຄະນະສະເພາະກິດກຳນົດໄວ້ຈົນຄົບກຳນົດ 14 ວັນ.

    ສັງລວມການກວດວິເຄາະແຕ່ເດືອນມັງກອນ ຮອດ ວັນທີ 20 ຕຸລາ 2020 ໄດ້ເກັບຕົວຢ່າງມາກວດທັງໝົດ 61.699 ຕົວຢ່າງ, ກວດພົບເຊື້ອສະສົມ 24 ຄົນ. ປະຈຸບັນ, ຄົນເຈັບຕິດເຊື້ອພະຍາດໂຄວິດ-19 ນໍ້າເບີ 23 ແລະເບີ 24 (ຜູ້ຕິດເຊື້ອໃໝ່) ແມ່ນປີ່ນປົວຢູ່ໂຮງໝໍມິດຕະພາບ. 

แชร์