ຄະນະໂຄສະນາອົບຮົມແຂວງສາລະວັນ ຍາດໄດ້ຜົນງານຫຼາຍດ້ານ

  ຄະນະໂຄສະນາອົບຮົມແຂວງສາລະວັນຈັດກອງປະຊຸມສະຫຼຸບວຽກງານຂອງຕົນທົ່ວແຂວງປະຈຳ 9 ເດືອນຕົ້ນປີ 2020 ແລະຜ່ານທິດທາງແຜນການຕໍ່ໜ້າ, ໂດຍການເຂົ້າຮ່ວມເປັນປະທານຂອງທ່ານ ສີເຮັງ ຫອມສົມບັດ ຫົວໜ້າຄະນະໂຄສະນາອົບຮົມແຂວງ,ມີກຳມະການພັກແຂວງ,ຫົວໜ້າ-ຮອງພະແນກການອ້ອມຂ້າງ, ການນຳຂອງເມືອງ, ຄະນະໂຄສະນາອົບຮົມເມືອງ ແລະຜູ້ເຮັດວຽກງານໂຄສະນາເຂົ້າຮ່ວມຊຶ່ງພິທີໄດ້ຈັດຂຶ້ນໃນທ້ານອາທິດຜ່ານມານີ້ຢູ່ທີ່ຫ້ອງປະຊຸມຫ້ອງວ່າການແຂວງ.

 ທ່ານ ຈັນສະໝອນ ພົມມະແສງ ຮອງຫົວໜ້າຄະນະໂຄສະນາອົບຮົມແຂວງສາລະວັນໄດ້ຜ່ານບົດສະຫຼຸບວຽກງານໂຄສະນາອົບຮົມແຂວງໃນໄລຍະ 9 ເດືອນຜ່ານມາທີ່ໄດ້ເອົາໃຈໃສ່ເຊື່ອມຊຶມບັນດາມະຕິ, ຄຳສັ່ງ, ໂດຍສະເພາະແມ່ນມະຕິກອງປະຊຸມໃຫຍ່ ຄັ້ງທີ X ຂອງພັກ,ມະຕິ 12 ສະໄໝທີ VIII ຂອງອົງຄະນະພັກແຂວງ, ເອກະ ສານການເມືອງ-ແນວຄິດ ເພື່ອກຽມດຳເນີນກອງປະຊຸມໃຫຍ່ 3 ຂັ້ນສູ້ຊົນປະຕິບັດໜ້າທີ່ວຽກງານດ້ວຍຄວາມຮັບຜິດຊອບສູງບົນສິ່ງທ້າທ້າຍຫຼາຍດ້ານຄື: ໄພທຳມະ ຊາດພາຍຸລະດູຮ້ອນ, ໄພແຫ້ງແລ້ງ, ອຸບັດເຫດ, ການແຜ່ລະບາດຂອງພະຍາດໂຄວິດ-19 ແລະອື່ນໆ, ແຕ່ກໍ່ໄດ້ພະຍາຍາມປະຕິບັດໜ້າທີ່ໂດຍສະເພາະວຽກງານການຈັດຕັ້ງເຜີຍແຜ່, ຜັນຂະຫຍາຍແນວທາງຂອງພັກ, ໂຄສະນາປາຖະກະຖາວັນສຳຄັນຕ່າງໆ, ການສຶກສາອົບຮົມ ແລະສິ່ງສຳຄັນໄດ້ສັງລວມເອົາຫາງສຽງຂອງສັງຄົມເພື່ອຕອບແກ້ໃຫ້ເຂົ້າໃຈຕໍ່ກັບສະພາບຄວາມເປັນຈິງການປາຖະກະຖາວັນສຳຄັນຕ່າງໆຂອງພັກຂອງຊາດໃນທົ່ວແຂວງມີຜູ້ເຂົ້າຮ່ວມທັງໝົດ 13 ພັນກວ່າເທື່ອຄົນ, ຍິງ 5 ພັນກວ່າຄົນ, ໂຄສະນາເຄື່ອນທີ່ໃນແຕ່ລະຈຸດໄດ້ 9 ຄັ້ງມີຜູ້ເຂົ້າຮ່ວມ 5 ພັນກວ່າຄົນ, ເອົາໃຈໃສ່ຄົ້ນຄວ້າເປີດຮຽນສະໜັບສະໜູນ 361 ຄົນ ແລະເປີດຮຽນກົດລະ ບຽບພັກປະຊາຊົນປະຕິວັດລາວ 158 ຄົນ, ທັງໄດ້ເອົາໃຈ່ເຜີຍແຜ່ການນຳໃຊ້ສື່ສັງຄົມອອນລາຍໃຫ້ຖືກຕ້ອງ ແລະ ຕອບຕ້ານປະກົດການຕ່າງໆທີ່ເກີດຂຶ້ນໃນຄອບຄົວ, ສັງຄົມ ແລະໂຮງຮຽນໃຫ້ 8 ຕົວເມືອງໄດ້ 18 ຈຸດ ແລະວຽກງານອື່ນໆນອກຈາກນັ້ນ, ກໍ່ຍັງໄດ້ນຳໃຊ້ສື່ອອນລາຍເຜີຍແຜ່ໂຄສະນາ, ສຶກສາອົບຮົມດ້ວຍຫຼາຍຮູບແບບເປັນຕົ້ນ: ການຂຽນຂ່າວ, ບົດວຽກດີຄົນເດັ່ນ, ສ້າງຄຣິບວິດີໂອທີ່ເປັນສາລະໜ້າຮູ້ຕ່າງໆໃຫ້ສັງຄົມໄດ້ຮັບຮູ້, ເຂົ້າໃຈ.

  ສຳລັບທິດທາງແຜນການຕໍ່ໜ້າແມ່ນຈະໄດ້ສືບຕໍ່ຈັດຕັ້ງໂຄສະນາປາຖະກະຖາວັນສຳຄັນຂອງຊາດຂອງພັກ ແລະສາກົນໃນ 3 ເດືອນທ້າຍປີ, ເກັບກຳຕົວເລກປາຖະກະ ຖາວັນສຳຄັນຂອງຊາດຂອງພັກນຳບັນດາພະແນກການ ແລະເມືອງ, ສືບຕໍ່ຈັດຕັ້ງປະຕິບັດວຽກງານກອງໂຄສະນາເຄື່ອນທີ່ຮັບໃຊ້ໜ້າທີ່ການເມືອງຕາມການສະເໜີຂອງພາກສ່ວນຕ່າງໆ,ສືບຕໍ່ເປີດຮຽນສະໜັບສະໜູນ ແລະກົດລະບຽບພັກພ້ອມທັງອອກໃບຢັ້ງຍືນໃຫ້ມະຫານຊົນກ້າວໜ້າ ແລະຕິດຕາມເກັບກຳສະພາບແນວຄິດຫາງສຽງສັງຄົມເພື່ອລາຍງານໃຫ້ຂັ້ນເທິງຮັບຊາບຢ່າງເປັນປົກກະຕິເພື່ອມີທິດທາງແກ້ໄຂ.

-------------

ຂ່າວ: ທິດລານີ, ຮູບພາບ: ໜັງສືພິມເສດຖະກິດ-ສັງຄົມ

 

แชร์