ມອບ-ຮັບໜ້າທີ່ຫົວໜ້າພະແນກແຜນການ ແລະການລົງທຶນໄຊສົມບູນ

  ພິທີມອບ-ຮັບໜ້າທີ່ຫົວໜ້າພະແນກແຜນການ ແລະ ການລົງທຶນແຂວງໄຊສົມບູນລະຫວ່າງຜູ້ເກົ່າ ແລະຜູ້ໃໝ່ໄດ້ຈັດຂຶ້ນໃນວັນທີ 16 ຕຸລາ 2020 ທີ່ສະໂມສອນພະແນກສຶກສາທິການ ແລະກີລາແຂວງ ໂດຍການເຂົ້າຮ່ວມເປັນສັກຂີພິຍານຂອງທ່ານ ພອຍຄໍາ ຮຸງບຸນຍວງ, ຮອງເຈົ້າແຂວງໄຊສົມບູນ, ມີທ່ານ ບົວຄໍາ ວິລາວົງ, ຮອງຫົວໜ້າກົມຈັດຕັ້ງ-ພະນັກງານກະຊວງແຜນການ ແລະການລົງທຶນພ້ອມດ້ວຍພະແນກການກ່ຽວຂ້ອງ, ຫ້ອງການແຜນການ ແລະການລົງທຶນທັງ 5 ເມືອງ ແລະພະນັກງານພາຍໃນພະແນກເຂົ້າຮ່ວມ.

  ໃນພິທີຍັງໄດ້ຮັບຟັງການຜ່ານມະຕິຕົກລົງຂອງຄະນະເລຂາທິການສູນກາງພັກວ່າດ້ວຍການອະນຸມັດໃຫ້ທ່ານ ຈັນທະໜອມ ວົງສົມ ຈິດ, ຫົວໜ້າພະແນກແຜນການ ແລະການລົງທຶນ ແຂວງໄຊສົມບູນຜູ້ເກົ່າອອກພັກການ-ຮັບອຸດໜູນບໍານານ, ສະບັບເລກທີ 154/ຄລສພ, ລົງວັນທີ 15 ກັນຍາ 2020 ແລະຜ່ານຂໍ້ຕົກລົງຂອງທ່ານເຈົ້າແຂວງໄຊສົມບູນວ່າດ້ວຍການແຕ່ງຕັ້ງທ່ານ ໄຊຍະເດດ ວົງສາຣະຫວັນ ຂຶ້ນຮັກສາການຫົວໜ້າພະແນກແຜນການ ແລະ ການລົງທຶນແຂວງຜູ້ໃໝ່,ຈາກນັ້ນ ທ່ານ ຈັນທະໜອມ ວົງສົມຈິດ, ຫົວໜ້າພະແນກແຜນ ການ ແລະການລົງທຶນແຂວງຜູ້ເກົ່າໄດ້ຂຶ້ນຜ່ານບົດບັນທຶກມອບ-ຮັບໜ້າທີ່ວຽກງານຮອບດ້ານໃຫ້ຫົວໜ້າພະແນກຜູ້ໃໝ່ໄດ້ສືບຕໍ່ຈັດຕັ້ງປະຕິບັດຕໍ່ໄປພ້ອມທັງລາຍງານສະພາບການຈັດຕັ້ງວຽກງານຮອບດ້ານໃນໄລຍະທີ່ຜ່ານມາຊຶ່ງໄດ້ຖືເອົາວຽກງານສຶກສາອົບຮົມການເມືອງ-ນໍາພາແນວຄິດໃຫ້ສະມາຊິກພັກ-ພະນັກງານມີຄວາມໜັກແໜ້ນ, ມີຄຸນສົມບັດສິນທໍາປະຕິວັດ, ຢຶດໝັ້ນຫຼັກການລວມສູນປະຊາທິປະໄຕ, ແບ່ງຄວາມຮັບຜິດຊອບຢ່າງຊັດເຈນໃນການເຄື່ອນໄຫວຈັດຕັ້ງປະຕິບັດຕາມພາລະບົດບາດ, ຂອບເຂດສິດໜ້າທີ່ຂອງຕົນຢ່າງຈະແຈ້ງ.

  ຕະຫຼອດໄລຍະ 5 ປີ ຜ່ານມາພະແນກແຜນການ ແລະການລົງທຶນແຂວງໄດ້ເອົາໃຈໃສ່ລົງຕິດຕາມ, ກວດກາບັນດາໂຄງການລົງທຶນຕ່າງໆ ພາຍໃນແຂວງຕາມພາລະບົດບາດຂອງຕົ້ນຢ່າງເປັນປົກກະຕິໃນນັ້ນໄດ້ຮັບເງິນໂຄງການສ້າງແຜນ 5 ປີປະຈໍາປີ 2020 ຈໍານວນ 80 ລ້ານກີບຊຶ່ງໄດ້ຖອນເງິນສໍາເລັດ ແລະໃຊ້ຈ່າຍໃນວຽກງານຕົວຈິງ,ເງິນຄໍ້າປະກັນໂຄງການບັນດາບໍລິສັດໄດ້ມອບເຂົ້າຄັງເງິນແຫ່ງຊາດປະຈໍາ ແຂວງໄຊສົມບູນ (ບັນຊີ 471) ປະຈຸບັນມີທັງໝົດມູນຄ່າ 2,62 ຕື້ກີບ ແລະ ມອບ ໃຫ້ສືບຕໍ່ທວງບັນດາບໍລິສັດທີ່ຄ້າງມອບທັງໝົດມູນຄ່າ 4,15 ແສນໂດລາ ແລະ 300 ລ້ານກີບ, ເງິນຄຸ້ມຄອງໂຄງການບ້ວງພະແນກແຜນການ ແລະການລົງທຶນທີ່ໄດ້ຮັບເຂົ້າຄັງເງິນແຫ່ງຊາດ (ບັນຊີ 471)ທັງໝົດມີມູນຄ່າ 108 ລ້ານກີບ ແລະມອບໃຫ້ສືບຕໍ່ທວງບັນດາບໍລິສັດທີ່ຄ້າງມອບທັງໝົດມູນຄ່າ 1,52 ແສນໂດລາ ແລະ 3 ລ້ານກີບ, ເງິນພັດທະນາແຂວງໄດ້ຮັບຈາກນັກລົງທຶນມອບເຂົ້າກອງທຶນພັດທະນາແຂວງເຂົ້າຄັງເງິນແຫ່ງຊາດ (ບັນຊີ 471) ທັງໝົດມູນຄ່າ 42,69 ລ້ານກີບ ແລະມອບໃຫ້ສືບຕໍ່ທວງບັນດາບໍລິສັດທີ່ຄ້າງມອບທັງໝົດມູນຄ່າ 2 ແສນໂດລາ ແລະ3 ລ້ານກີບ, ສໍາລັບເງິນພັດທະນາທ້ອງຖິ່ນ,ເງິນຕິດຕາມທາງດ້ານເຕັກນິກ-ວິຊາການ, ເງິນຕິດຕາມສິ່ງແວດລ້ອມ, ເງິນຝຶກອົບຮົມວິຊາການ ແລະ ເງິນຄະນະກຳມະການຕິດຕາມ-ກວດການ ແລະ ຊຸກຍູ້ແຮ່ທາດທີ່ໄດ້ກຳນົດໄວ້ຢູ່ໃນສັນຍາ ແລະ ບົດບັນທຶກຄວາມເຂົ້າໃຈ (MOU) ໃຫ້ຫົວໜ້າພະແນກແຜນການ ແລະການລົງທຶນຜູ້ໃໝ່ສືບຕໍ່ທວງນໍາບໍລິສັດໃຫ້ຄົບຖ້ວນ.

  ຈາກນັ້ນໄດ້ມີພິທີລົງລາຍເຊັນໃສ່ບົດບັນທຶກກ່າວມອບ ແລະກ່າວຮັບໜ້າທີ່ລະຫວ່າງຜູ້ເກົ່າ ແລະຜູ້ໃໝ່ຢ່າງເປັນທາງການ.

----------

ຂ່າວ: ນູ່ສົມລັດ ຕະມ່ອງ

แชร์