ບໍລິສັດໄຟຟ້ານໍ້າເທີນ 2 ຈັດງານວັນແຫ່ງຄວາມປອດໄພປະຈຳປີ

  ວັນທີ 15 ຕຸລາ 2020 ທີ່ເຮືອນຈັກໄຟຟ້ານໍ້າເທີນ 2 ທີ່ແຂວງຄຳມ່ວນໄດ້ຈັດກິດຈະກຳວັນແຫ່ງຄວາມປອດໄພໃຫ້ກຽດເຂົ້າຮ່ວມມີທ່ານ ບຸນທັນ ສຸວັນນະລາດ ເຈົ້າເມືອງໆຍົມມະລາດ,ທ່ານ ອໍລິວີເອ ດິດຣີ ຜູ້ອໍານວຍການໃຫຍ່ບໍລິສັດໄຟຟ້ານໍ້າເທີນ 2 ພ້ອມຄະນະບໍລິຫານງານ,ບັນດາທ່ານຕາງໜ້າພາກລັດຈາກເມືອງຍົມມະລາດ, ນາກາຍ ແລະເມືອງມະຫາໄຊ, ພ້ອມດ້ວຍພະນັກງານ-ວິຊາການພາຍໃນນໍ້າເທີນ 2 ເຂົ້າຮ່ວມ.

   ວັນແຫ່ງຄວາມປອດໄພແມ່ນວັນໜຶ່ງໃນກິດຈະກຳທີ່ທາງນໍ້າເທີນ 2 ໄດ້ ໃຫ້ຄວາມສຳຄັນ ແລະ ຈັດຂຶ້ນໃນທຸກໆ ປີ. ຈຸດປະສົງແມ່ນເພື່ອປູກຈິດສຳນຶກໃຫ້ແກ່ພະນັກ ງານ-ວິຊາການ ແລະຢາກເສີມສ້າງວັດທະນະທຳດ້ານຄວາມປອດໄພໂດຍໄດ້ເລັ່ງໃສ່ການທົບທວນຄືນຄວາມມຸ້ງໜັ້ນກ່ຽວກັບຄວາມປອດໄພ. ດ້ວຍການໃຫ້ພະນັກງານມີສ່ວນຮ່ວມໃນກິດຈະກຳການສາທິດຂອງແຕ່ລະຫົວຂໍ້ທີ່ສົ່ງເສີມຄວາມຮູ້, ຄວາມເຂົ້າໃຈໃນດ້ານຄວາມປອດໄພ ແລະທັງເພື່ອແນໃສໃຫ້ບັນດາທ່ານທີມາຮ່ວມງານໄດ້ສຶກສາຮຽນຮູ້ ແລະມີສ່ວນຮ່ວມໃນການປະຕິບັດກິດຈະກຳຄວາມປອດໄພໂດຍສະເພາະການຕັດລະບົບກ່ອນປະຕິບັດວຽກງານ,ວິທີຍົກສິ່ງຂອງທີ່ມີນໍ້າໜັກຫຼາຍ,ຄວາມປອດໄພທາງຖະໜົນ, ການເຮັດວຽກຢູ່ບ່ອນສູງທີ່ປອດໄພ, ການໃສ່ເສື້ອຊູຊີບໃນເວລາເຮັດວຽກໃກ້ແຫຼ່ງນໍ້າ, ນອກນີ້ຍັງໄດ້ສົ່ງເສີມຄວາມຮູ້ດ້ານການປະຖົມພະຍາບານ, ຄວາມຮູ້ດ້ານສິ່ງແວດລ້ອມລວມເຖິງລະບົບປ້ອງກັນທາງໄຊເບີຊຶ່ງແຕ່ລະກຸ່ມກິດຈະກຳຕ່າງໆກໍ່ໄດ້ຖ່າຍທອດຄວາມຮູ້ທາງດ້ານທິດສະດີ ແລະ ປະຕິບັດຕົວຈິງໃຫ້ກັບຜູ້ທີ່ມາຮ່ວມ ງານຕາມຂັ້ນທີ່ປະຕິບັດງານຕົວຈິງ ແລະມີບັນຍາກາດອັນຟົດຟຶ້ນມ່ວນຊື່ນ,ຈາກນັ້ນໂອກາດສໍາເລັດການຮ່ວມກິດຈະກຳກໍ່ໄດ້ມີພິທີມອບຂອງລາງວັນດີເດັ່ນຂອງການປະ ຕິບັດງານດ້ານຄວາມປອດໄພ ແລະລາງວັນໃນການສັງເກດການ. ໃຫ້ກຽດມອບຂອງລາງວັນໂດຍຜູ້ອຳນວຍການໃຫຍ່ບໍລິສັດນໍ້າເທີນ 2 ພ້ອມດ້ວຍບັນດາທ່ານໃນຄະ ນະບໍລິຫານງານເຊິ່ງເຮັດໃຫ້ງານຄັ້ງນີ້ເຕັມໄປດ້ວຍບັນຍາກາດທີ່ດີ ແລະມີຄວາມສຳເລັດຢ່າງຈົບງາມ.

   ໃນວາລະທ້າຍພາຍຫຼັງໄດ້ສຳເລັດບັນດາກິດຈະກໍາຕ່າງໆ, ທ່ານ ໂອລີວີເອ ດີດຣີ ໄດ້ກ່າວຂອບໃຈ ແລະກ່າວປິດງານທີ່ມີເນື້ອໃນທີ່ສຳຄັນ: ຂ້າພະເຈົ້າຂໍສະແດງຄວາມຂອບໃຈເປັນຢ່າງສູງມາຍັງຝ່າຍຈັດງານທຸກພາກສ່ວນທີ່ໄດ້ສຸມໃສ່ການກະກຽມງານວັນແຫ່ງຄວາມປອດໄພໃນປີນີ້ຈົນປະສົບຜົນສຳເລັດຢ່າງສົມບູນແບບ,ຂອບໃຈພະນັກ ງານທຸກຄົນທີ່ເຂົ້າຮ່ວມເຮັດໃຫ້ງານນີ້ມີຄວາມໝາຍອັນເລິກເຊິ່ງ.ວັນແຫ່ງຄວາມປອດໄພບໍ່ແມ່ນພຽງແຕ່ມື້ນີ້ມື້ດຽວແຕ່ມື້ອື່ນ ແລະທຸກມື້ໃນອະນາຄົດກໍ່ຄືວັນແຫ່ງຄວາມປອດໄພສຳລັບນໍ້າເທີນ 2,ປີກາຍນີ້ພວກເຮົາໄດ້ສະເຫຼີມສະຫຼອງຄົບຮອບ 1.000 ວັນ ທີ່ປາຊະຈາກການບາດເຈັບທີ່ສູນເສຍເວລາເຮັດວຽກຕົວຈິງ ແລະຂ້າພະເຈົ້າເຊື່ອ ໝັ້ນວ່າພວກເຮົາຈະສະເຫຼີມສະຫຼອງຄົບຮອບ 1.500 ວັນ ໃນປີໜ້າພ້ອມກັນ.

---------------

ຂ່າວ: ມະນີວັນ, ຮູບພາບ: ໜັງສືພິມເສດຖະກິດ-ສັງຄົມ

แชร์