ສະຫວັນນະເຂດ ເລັ່ງໃຫ້ການຊ່ວຍເຫຼືອປະຊາຊົນຜູ້ຖືກນໍ້າຖ້ວມ

   ມາຮອດປະຈຸບັນ, ຫຼາຍເມືອງລຽບຕາມສາຍນໍ້າເຊບັ້ງຫຽງ ແລະສາຍນໍ້າອື່ນໆ ແມ່ນຖືກນໍ້າຖ້ວມເປັນໄລຍະທີ 2 ເຊິ່ງມວນນໍ້າໄດ້ເພີ່ມຂຶ້ນ ແລະກະທົບໜັກກວ່າເກົ່າ ໂດຍການນໍາຂັ້ນແຂວງກໍ່ໄດ້ມີຄວາມເປັນຫ່ວງ ແລະເອົາໃຈໃສ່ລົງຕິດຕາມຢ່າງໃກ້ຊິດຕິດແທດເພື່ອຊ່ວຍເຫຼືອປະຊາຊົນຢ່າງເປັນການດ່ວນໂດຍໃນວັນທີ 19 ຕຸລາ2020 ນີ້,ທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດພ້ອມພະແນກການກ່ຽວຂ້ອງຈໍານວນໜຶ່ງກໍ່ໄດ້ລົງຕິດຕາມສະພາບນໍ້າຖ້ວມ ແລະມອບເຄື່ອງຊ່ວຍເຫຼືອທີ່ຈຳ ເປັນໃຫ້ຜູ້ປະສົບໄພນໍ້າຖ້ວມທີ່ເມືອງເຊໂປນໂດຍມີທ່ານ ວົງສະຫວັນ ວຽງມະນີ ເຈົ້າເມືອງເຊໂປນ ແລະພາກສ່ວນກ່ຽວຂ້ອງຮ່ວມຕ້ອນຮັບ.

  ຕາມການລາຍງານຂອງກອງເລຂາຕ້ານໄພພິບັດເມືອງເຊໂປນໃຫ້ຮູ້ວ່າ: ຮອດວັນທີ 17 ຕຸລາ,ມີ 60 ບ້ານທີ່ໄດ້ຮັບຜົນກະທົບ, ນໍ້າຖ້ວມບ້ານ 40 ບ້ານ, ມີ 1.781 ຫຼັງຄາ, 2.029 ຄອບຄົວ, ມີເຮືອນເປ້ເພ 33 ຫຼັງ;ນໍ້າຖ້ວມເນື້ອທີ່ນາ 1.752 ເຮັກຕາ,ສວນປູກເຂົ້າ 831 ເຮັກຕາ,ໜອງປາ 271 ໜອງ,ສວນໄມ້ອຸດສາຫະກຳ 712 ເຮັກຕາ, ສວນພືດຜັກຕ່າງໆ 52 ເຮັກຕາ, ງົວຕາຍ 2 ໂຕ, ແບ້ຕາຍ 16 ໂຕ, ສັດປີກ 100 ກວ່າໂຕ, ຊົນລະປະທານ 4 ແຫ່ງ, ໂຮງຮຽນຖືກນໍ້າຖ້ວມ 13 ແຫ່ງ, ປະຕູນໍ້າ 2 ແຫ່ງ, ສຸກສາລາ 4 ແຫ່ງ, ຖ້ວມວິດຖ່າຍ 1.135 ໜ່ວຍ, ປະຈຸບັນ, ໄດ້ມີພະຍາດຕ່າງໆເກີດຂຶ້ນກັບປະຊາຊົນເປັນຕົ້ນ: ພະຍາດຖອກທ້ອງ, ໄຂ້

ຫວັດ, ຕີນເປື່ອຍ, ຕາແດງ ແລະອື່ນໆ ຫຼາຍກວ່າ 1.600 ກໍລະນີ. ຈາກນີ້, ເສັ້ນທາງເປ້ເພ ແລະຖືກຕັດຂາດຫຼາຍແຫ່ງເຊັ່ນ: ແຕ່ແຍກໄປເມືອງນອງຫາຈຸດສຸມກະ ຕູບ-ແດນວິໄລ, ທາງແຕ່ບ້ານດົງສະຫວັນຫາຈຸດສຸມລະໂກ, ເສັ້ນທາງໄປລາດຫໍ້,ຜາບັງ,ຈຽງຕູບ, ລະວິງ ແລະບ້ານອືນໆ. ໂອກາດນີ້, ທ່ານເຈົ້າແຂວງສະຫວັນນະເຂດ ຮ່ວມກັບຂະແໜງການຕ່າງໆ ກໍ່ໄດ້ນຳເອົາເຄື່ອງຊ່ວຍເຫຼືອທີ່ຈຳເປັນນໍາມາມອບໃຫ້ເມືອງເຊໂປນເພື່ອມອບຕໍ່ໃຫ້ປະຊາຊົນຜູ້ໄດ້ຮັບຜົນກະທົບຄັ້ງນີ້ລວມມີ: ເຂົ້າສານ 300 ກະສອບ,ເທົ່າກັບ 1.500 ກິໂລ,ນໍ້າດື່ມ 500 ແພັກ, ເຕັ້ນ 10 ດາງ, ໝີ່ 20 ແກັດ, ປາກະປ໋ອງ 10 ແກັດ ແລະຖົງເຄື່ອງ ທີ່ປະກອບມີ: ມຸ້ງ, ປາກະປອງ ແລະຢາປົວພະຍາດ 150 ຊຸດ ພ້ອມນີ້ກໍ່ມີພະແນກກະສິກໍາ ແລະປ່າໄມ້ແຂວງມອບເງິນໃຫ້ 2,5 ລ້ານກີບ.

  ເວລາຕໍ່ມາ, ທ່ານເຈົ້າແຂວງກໍ່ໄດ້ເດີນທາງໄປມອບເຄື່ອງຊ່ວຍເຫຼືອໃຫ້ເມືອງພີນໂດຍການຕ້ອນຮັບຂອງທ່ານ ສາລີ ວິນລາວັນ ເຈົ້າເມືອງໆພີນ. ສຳລັບເຄື່ອງຊ່ວຍເຫຼືອທີ່ນຳໄປມອບລວມມີ: ເຂົ້າສານ, ນໍ້າດື່ມ, ໝີ່ ແລະຖົງເຄື່ອງທີ່ປະກອບມີມຸ້ງ, ປາກະປ໋ອງ ແລະຢາປົວພະຍາດ, ລວມມູນຄ່າ 20,7 ລ້ານກີບ; ພ້ອມນີ້ກໍ່ມີພະແນກກະສິກໍາ ແລະປ່າໄມ້ແຂວງມອບເງິນ 1 ລ້ານກີບ. ໂອກາດນີ້, ທ່ານເຈົ້າເມືອງພີນລາຍງານໃຫ້ຮູ້ວ່າ: ຢູ່ເມືອງພີນ ຝົນເລີ່ມຕົກແຕ່ວັນທີ 7-18 ຕຸລາ 2020 ເຮັດໃຫ້ນໍ້າເຊບັ້ງຫຽງ, ເຊກຸມກາມ, ເຊທ່າມວກໄຫຼເຂົາຖ້ວມທົ່ງນາ ແລະບ້ານລຽບແຄມເຊຊຶ່ງມີບ້ານໄດ້ຮັບຜົນກະທົບ 36 ບ້ານ, ມີ 995 ຄອບຄົວ,ພົນລະເມືອງ 7.717 ຄົນ ແລະເນື້ອທີ່ນາ 556, ສວນ 22 ເຮັກຕາ, ຖ້ວມໜອງປາເສຍຫາຍ 3 ໜອງ, ເສັ້ນທາງຖືກຜົນກະທົບ 7 ເສັ້ນ, ຖ້ວມທາງ 11 ຈຸດ,ຊຶ່ງມາຮອດວັນທີ 18 ມີ ບ້ານຖືກນໍ້າຖ້ວມ 11 ບ້ານ, 331 ຫຼັງຄາ.

 ຕໍ່ສະພາບການດັ່ງກ່າວ, ທ່ານ ສັນຕິພາບ ພົມວິຫານ ກໍໄດ້ສະແດງຄວາມເປັນຫ່ວງຕໍ່ເຫດການໄພທໍາມະຊາດຄັ້ງນີ້ອັນໄດ້ກະທົບຕໍ່ການດໍາລົງຊີວິດ, ຜົນລະປູກ ແລະສັດລ້ຽງຂອງປະຊາຊົນພ້ອມນີ້ກໍ່ໄດ້ແນະນໍາໃຫ້ທຸກຄົນຕ້ອງມີຄວາມອົດທົນ ແລະສູ້ຊົນພ້ອມກັນຜ່ານຜ່າວິກິດຄັ້ງນີ້,ເນັ້ນໃຫ້ການນໍາເມືອງຕ້ອງເປັນເຈົ້າການໃນການຕິດ ຕາມກວດກາ ແລະເຝົ້າລະວັງຢ່າງເຂັ້ມງວດ, ກຽມຍົກຍ້າຍປະຊາຊົນໃນເຂດທີ່ຕໍ່າພ້ອມຈັດສັນທີ່ພັກຊົ່ວຄາວ, ສຸມກໍາລັງລົງຊ່ວຍເຫຼືອປະຊາຊົນໃນການເກັບກູ້ເຂົ້າລວມທັງເຄື່ອງອຸປະໂພກ-ບໍລິໂພກ ແລະກະກຽມຢາປົວພະຍາດທີ່ມາກັບນໍ້າຖ້ວມເພື່ອກຽມຊ່ວຍເຫຼືອບັນເທົາທຸກແກ່ປະຊາຊົນ.

แชร์