ຈັດງານເດີນແບບການກຸສົນ

  ວັນທີ 16 ຕຸລາຜ່ານມາທີ່ສູນການຄ້າລາວ-ໄອເຕັກ ນະຄອນຫຼວງວຽງຈັນ ສະມາຄົມຫັດຖະກໍາລາວພ້ອມດ້ວຍຄອບຄົວຂອງການນໍາລາວໄດ້ຈັດງານເດີນແບບການກຸສົນເພື່ອສົມທົບທຶນຊ່ວຍເຫຼືອແມ່ຍິງ ແລະເດັກນ້ອຍຜູ້ທຸກຈົນຫ່າງໄກໂດຍໃຫ້ກຽດເຂົ້າຮ່ວມຂອງທ່ານນາງ ສີຈັນ ວິພາວັນ ພັນລະຍາທ່ານຮອງປະທານປະເທດ, ມີທ່ານ ນາງ ຈັນເທົາ ປະຖັມມະວົງ ປະທານສະມາຄົມຫັດຖະກຳລາວ, ມີຄອບຄົວການນຳ, ບັນດາຫົວໜ່ວຍທຸລະກິດ, ພ້ອມດ້ວຍແຂກທີ່ຖືກເຊີນເຂົ້າຮ່ວມ.

   ທ່ານ ນາງ ຈັນເທົາ ປະຖັມມະວົງ ກ່າວວ່າ: ການຈັດງານຄັ້ງນີ້ເພື່ອສົມທົບທຶນຊ່ວຍເຫຼືອແມ່ຍິງ ແລະເດັກນ້ອຍຜູ້ທຸກຈົນຫ່າງໄກສອກຫຼີກໃນທົ່ວປະເທດ ແລະການເດີນແບບເສື້ອຜ້າອາພອນຊົງລາວແມ່ນໜຶ່ງກິດຈະກໍາຫຼັກຂອງງານມະຫາກໍາສີມືຫັດຖະກໍາລາວໃນແຕ່ລະປີມັນເປັນການເອກອ້າງສີໄມ້ລາຍມືອັນປານິດຂອງແມ່ຍິງລາວມາແຕ່ດຶກດໍາບັນທີ່ນັກອອກແບບຕໍ່າແພພື້ນເມືອງໄດ້ນໍາເອົາຫົວຄິດ ແລະ ໝາກຫົວໃຈຂອງແຕ່ລະຄົນມາວາດພາບໃສ່ຜືນແພທີ່ຕົນຈົກດອກລວດລາຍ ແລະ ຕໍ່າໃຫ້ຄົນທັງຫຼາຍໄດ້ຊື່ນຊົມ ແລະຊົມໃຊ້ດອກດວງທີ່ແມ່ຍິງລາວໄດ້ອອກແບບຄົ້ນຄິດມານັ້ນລ້ວນແລ້ວແຕ່ສອດຄ່ອງກັບຍຸກສະໄໝກັບຮິດຄອງປະເພນີ ແລະວິຖີຊີວິດຂອງທ້ອງຖິ່ນ ຊຶ່ງພາຍໃນງານໄດ້ມີການເດີນແບບຊຸດຊົນເຜົ່າ, ຊຸດລາວປະຍຸກຈາກນາງແບບນາຍແບບກິຕິມະສັກຕາງໜ້າຈາກສະຖານທູດຕ່າງໆປະຈຳ ສປປ ລາວ.

ນອກນັ້ນຍັງມີການປະມູນເຄື່ອງຫັດຖະກຳຊົນເຜົ່າ, ມອບຮູບການນໍາຂອງລາວເພື່ອເປັນທີ່ລະລຶກ ແລະມອບໃບຍ້ອງຍໍຜູ້ສະໜັບສະໜູນຊຶ່ງບັນຍາກາດພາຍໃນງານເຕັມໄປດ້ວຍຄວາມຄືກຄື້ນ, ໄດ້ສ້າງຄວາມປະທັບໃຈໃຫ້ຜູ້ທີ່ເຂົ້າມາຮ່ວມງານທີ່ໄດ້ສຳຜັດກັບຊຸດຊົນເຜົ່າ, ຊຸດລາວປະຍຸກທີ່ແປກໃໝ່ຫຼາກຫຼາຍສີສັນ ແລະ ການນຸ່ງຖືທີ່ເປັນເອກະລັກຂອງແມ່ຍິງລາວບັນດາເຜົ່າໃນທົ່ວປະເທດ.

• 21/10/2020