ກະຊວງ ຖວທ ຮັບອຸປະກອນໄອທີຈາກອົງການຢູນິເຊັບ

   ທີ່ນະຄອນຫຼວງວຽງຈັນ, ວັນທີ 20 ຕຸລາ 2020 ອົງການຢູນິເຊັບປະຈຳ ສປປ ລາວ ໄດ້ມອບອຸປະກອນໄອທີໃຫ້ແກ່ກະຊວງຖະແຫຼງຂ່າວວັດທະນະທຳ ແລະທ່ອງ ທ່ຽວເພື່ອສືບຕໍ່ເພີ່ມທະວີການຮ່ວມມືລະຫວ່າງອົງການຢູນິເຊັບ ແລະລັດຖະບານ ສປປ ລາວ ໃນການສົ່ງເສີມສິດທິຄວາມເປັນຢູ່ທີ່ດີຂອງເດັກ ແລະແມ່ຍິງໃນໄລຍະການຄວບຄຸມການລະບາດຂອງ ພະຍາດໂຄວິດ-19.

  ອຸປະກອນທີ່ມອບໃຫ້ໃນຄັ້ງນີ້ປະກອບມີອຸປະກອນສຳລັບນໍາໃຊ້ໃນການຈັດກອງປະຊຸມທາງໄກດ້ວຍໂທລະສັບ ແລະວີດີໂອ (Teleconferenceequipment) ຈໍານວນ 5 ຊຸດໃຫ້ແກ່ກະຊວງຖະແຫຼງຂ່າວວັດທະນະທໍາ ແລະທ່ອງທ່ຽວຊຶ່ງຈະມອບໃຫ້ກົມສື່ມວນຊົນ, ໂທລະພາບແຫ່ງຊາດລາວ, ໜັງສືພິມພາສາຕ່າງປະເທດ, ໜັງ ສືພິມປະເທດລາວ ແລະໜັງສືພິມປະຊາຊົນ.

   ພິທີມອບ-ຮັບເຄື່ອງອຸປະກອນດັ່ງກ່າວໄດ້ຈັດຂື້ນທີ່ກະຊວງຖະແຫຼງຂ່າວວັດທະນະທຳ ແລະທ່ອງທ່ຽວ ແລະໄດ້ໃຫ້ກຽດເຂົ້າຮ່ວມໂດຍທ່ານ ສະຫວັນຄອນ ຣາຊມຸນຕຣີ ຮອງລັດຖະມົນຕີກະຊວງຖະແຫຼງຂ່າວວັດທະນະທໍາ ແລະທ່ອງທ່ຽວ ແລະທ່ານ ເດວິດ ດັງເຄີນ, ວ່າການຮອງຜູ້ຕາງໜ້າອົງການຢູນິເຊັບປະຈຳ ສປປ ລາວ.

   ທ່ານ ສະຫວັນຄອນ ຣາຊມຸນຕຣີ, ກ່າວວ່າ,”ເນື່ອງຈາກມີການລະບາດຂອງພະຍາດໂຄວິດ-19 ໃນທົ່ວໂລກ, ການສະໜອງຂໍ້ມູນ ແລະການປູກຈິດສຳນຶກກ່ຽວກັບມາດຕະການປ້ອງກັນ ແລະ ຄວບຄຸມພະຍາດໂຄວິດ-19 ແລະ ການປະຕິບັດສຸຂະອະນາໄມແມ່ນມີຄວາມສຳຄັນຫຼາຍໃນການແກ້ໄຂຜົນກະທົບຂອງການແຜ່ລະບາດຕໍ່ເດັກແລະແມ່ຍິງ. ອຸປະກອນໄອທີເພື່ອການສື່ສານດັ່ງກ່າວຈະປະກອບສ່ວນເຂົ້າໃນການສ້າງຄວາມເຂັ້ມແຂງໃນການປະສານງານລະຫວ່າງລັດຖະບານແຫ່ງ ສປປ ລາວ ແລະອົງການຢູນິເຊັບ ແລະບັນດາຄູ່ຮ່ວມພັດທະນາໃນປະເທດລາວ ແລະ ທົ່ວໂລກ. ການນໍາໃຊ້ອຸປະກອນດັ່ງກ່າວຍັງຈະຊ່ວຍໃຫ້ຮູບແບບການປະສານງານກັບບັນດາຄູ່ຮ່ວມງານໃຫ້ເຂົ້າກັບສະພາບປົກກະຕິແບບໃໝ່ເພື່ອປ້ອງກັນພະຍາດລະບາດ”.

   ທ່ານ ເດວິດ ດັງເຄີນ, ກ່າວວ່າ, “ອົງການຢູນິເຊັບໃຫ້ຄຳໝັ້ນສັນຍາຢ່າງໜັກແໜ້ນໃນການສະໜັບສະໜູນລັດຖະບານ ສປປ ລາວ ໃນການຮັບມືກັບການລະບາດ ຂອງພະຍາດໂຄວິດ-19 ແລະພ້ອມທັງສະໜັບສະໜູນລັດຖະບານດ້ານອຸປະກອນດ້ານການແພດ, ອຸປະກອນສົ່ງເສີມດ້ານສຸຂະອະນາໄມ ແລະເຄື່ອງໃຊ້-ອຸປະກອນ ທີ່ຈໍາເປັນ. ອົງການຢູນິເຊັບຫວັງວ່າອຸປະກອນການຈັດກອງປະຊຸມທາງໄກຈະປະກອບສ່ວນເຂົ້າໃນການເພີ່ມທະວີການຮ່ວມມືຢ່າງຕໍ່ເນື່ອງຂອງອົງການຢູນິເຊັບ ແລະ ກະ ຊວງຖະແຫຼງຂ່າວວັດທະນະທໍາເພື່ອຮັບປະກັນສິດທິ ແລະ ຊີວິດການເປັນຢູ່ທີ່ດີຂອງເເດັກ ແລະ ແມ່ຍິງໃຫ້ໄດ້ຮັບການປົກປ້ອງໃນໄລຍະການລະບາດຂອງພະຍາດໂຄວິດ-19”.

  ອົງການຢູນິເຊັບຍັງໄດ້ມອບອຸປະກອນສຳລັບນໍາໃຊ້ໃນການຈັດກອງປະຊຸມທາງໄກໃຫ້ແກ່ກະຊວງການຕ່າງປະເທດ 3 ຊຸດ ແລະໃຫ້ແກ່ສະຫະພັນແມ່ຍິງລາວຈໍານວນ 6 ຊຸດ ພ້ອມດ້ວຍລະບົບໂທລະໂຄ່ງສຳລັບຊຸມຊົນຈໍານວນ 50 ຊຸດ ເພື່ອແຈກຢາຍໃຫ້ 50 ບ້ານໃນ ແຂວງສະຫວັນນະເຂດ, ແຂວງສາລະວັນ ແລະ ແຂວງເຊກອງຊຶ່ງແມ່ນເຂດທີ່ປະຊາຊົນປະສົບກັບຄວາມສ່ຽງສູງທີ່ສຸດຕໍ່ກັບພະຍາດລະບາດ.

ອົງການຢູນິເຊັບຍັງໄດ້ຈັດຫາລະບົບ SoftwareZoom ໃຫ້ແກ່ກະຊວງການຕ່າງປະເທດ, ກະຊວງຖະແຫຼງຂ່າວວັດທະນະທໍາ ແລະທ່ອງທ່ຽວ ແລະສະຫະພັນແມ່ຍິງເພື່ອນໍາໃຊ້ກັບອຸປະກອນກອງປະຊຸມຜ່ານທາງວິດີໂອອອນລາຍເພື່ອຮັກສາໄລຍະຫ່າງທາງສັງຄົມແນໃສ່ປ້ອງກັນພະຍາດໂຄວິດ-19.

-----------------

 #ຫນັງສືພິມເສດຖະກິດສັງຄົມ

แชร์