ເຜີຍແຜ່ວຽກຄວາມປອດໄພ ຢູ່ໂຮງຮຽນໂພສີ

  ວັນທີ 13 ຕຸລາ 2020 ພະແນກໂຍທາທິການ ແລະຂົນສົ່ງແຂວງບໍລິຄໍາໄຊໄດ້ສົມທົບກັບພະແນກຕໍາຫຼວດຈະລາຈອນ ປກສ ແຂວງ, ຫ້ອງການຊາວໜຸ່ມແຂວງລົງໂຄສະນາເຜີຍແຜ່ວຽກງານຄວາມປອດໄພໃຫ້ແກ່ນ້ອງນັກຮຽນໂຮງຮຽນມັດທະຍົມຕອນຕົ້ນໂພສີ ເມືອງປາກຊັນ ແຂວງບໍລິຄໍາໄຊ, ນຳໂດຍທ່ານ ບຸນທໍາ ຄໍາມະວົງຫົວ ໜ້າຂະແໜງຂົນສົ່ງພະແນກໂຍທາທິການ ແລະຂົນສົ່ງແຂວງ, ພ້ອມດ້ວຍຄະນະທີມງານ,ໃຫ້ກຽດເຂົ້າຮວມຂອງທ່ານ ນາງ ສູນທອນຫຼວງ ສຸວັນນະວົງຜູ້ອຳນວຍການໂຮງຮຽນມັດທະຍົມຕອນຕົ້ນໂພສີ, ມີບັນດາຄູ-ອາຈານ ແລະນ້ອງນັກຮຽນຊັ້ນ ມ3 ແລະມ4 ເຂົ້າຮ່ວມ.

  ໂດຍປະຕິບັດຕາມແຈ້ງການຂອງພະແນກໂຍທາທິການ ແລະຂົນສົ່ງແຂວງບໍລິຄໍາໄຊສະບັບເລກທີ 2041/ ຍທຂ.ຄບສ ລົງວັນທີ 14 ສິງຫາ 2020 ວ່າດ້ວຍການເຜີຍແຜ່ໂຄສະນາປູກຈິດສໍານຶກກ່ຽວກັບການສັນຈອນທາງຫຼວງ, ເພື່ອແນ່ໃສ່ເຮັດໃຫ້ຄູ-ອາຈານ ແລະນ້ອງນັກຮຽນໄດ້ຮັບຮູ້, ເຂົ້າໃຈພ້ອມນໍາໄປຈັດຕັ້ງປະຕິບັດໃຫ້ຖືກ ຕ້ອງຕາມກົດລະບຽບຈະລາຈອນຢ່າງເຂັ້ມງວດ, ແນໃສ່ຫຼຸດຜ່ອນການອຸບັດຕິເຫດຢູ່ຕາມຖະໜົນຢູ່ພາຍໃນແຂວງບໍລິຄໍາໄຊໃຫ້ຫຼຸດລົງຢ່າງຈະແຈ້ງ, ຫຼັງຈາກນັ້ນບັນດາຄະນະຮັບຜິດຊອບຈາກພະແນກໂຍທາທິການ ແລະຂົນສົ່ງແຂວງ, ກອງໂຄສະນາພະແນກຕໍາຫຼວດຈະລາຈອນ ປກສ ແຂວງ, ຫ້ອງການຊາວໜຸ່ມແຂວງໄດ້ພັດປ່ຽນກັນເຜີຍແຜ່ ແລະບັນລະຍາຍເອກະສານຄວາມຮູ້ພື້ນຖານກ່ຽວກັບການນໍາໃຊ້ລົດໃຊ້ຖະໜົນ, ກົດໝາຍວ່າດ້ວຍການຈະລາຈອນທາງບົກ, ບັນດາປ້າຍຫ້າມ,ປ້າຍເຕືອນອັນຕະລາຍ,ປ້າຍກໍານົດ,ປ້າຍບອກສິດ, ປ້າຍແນະນໍາຈຸດໝາຍປາຍທາງ, ສາລະບານເດີນລົດ, ລະບຽບວ່າດ້ວຍການຍ່າງ, ການຂີ່ລົດຖີບ, ການຂັບຂີ່ລົດຈັກ, ລົດໃຫຍ່, ການຂັບຂີ່ລົດໄຖ່ນາເດີນຕາມ, ດໍາລັດເລກທີ 188/ນຍ ວ່າດ້ວຍການຈະລາຈອນທາງບົກ,ການປົກປັກຮັກສາທາງຫຼວງ ແລະການປັບໄໝຕໍ່ຜູ້ລ່ວງລະເມີດກົດລະບຽບຈະລາຈອນທາງບົກ, ໜ້າທີ່ ແລະຂໍ້ຫ້າມສໍາລັບຜູ້ຂັບຂີ່, ຈາກນັ້ນໄດ້ສາຍພາບວິດີໂອຈາກການບັນທຶກພາບເຫດການການເກີດອຸບັດເຫດທີ່ເກີດຂຶ້ນຕາມເສັ້ນທາງຕ່າງໆ, ຍົກໃຫ້ເຫັນສາເຫດຕົ້ນຕໍທີ່ພາໃຫ້ເກີດອຸບັດເຫດ, ຜົນເສຍຫາຍທາງດ້ານຊັບສິນ, ຊີວິດ ແລະສຸຂະພາບ.

   ນອກນັ້ນຍັງໄດ້ຍົກໃຫ້ເຫັນສະພາບປາກົດການຫຍໍ້ຕ່າງໆທີ່ເປັນໄພອັນຕະລາຍຕໍ່ຊາວໜຸ່ມ-ໄວໜຸ່ມ ໃນປະຈຸບັນເປັນຕົ້ນແມ່ນການຫຼິ້ນ ກິນຟູມເຟືອຍ, ການມົ້ວສຸມເສບຢາເສບຕິດ ແລະປະກາດຫຍໍ້ທໍ້ອື່ນໆໃຫ້ບັນດານ້ອງນັກຮຽນໄດ້ຮັບຮູ້, ເຂົ້າໃຈຕໍ່ຜົນຮ້າຍ ແລະໄພອັນຕະ ລາຍດັ່ງກ່າວພ້ອມທັງເນັ້ນໜັກໃຫ້ນ້ອງນັກຮຽນທຸກຄົນຈົ່ງພ້ອມກັນນໍາເອົາຄວາມຮູ້ກ່ຽວກັບກົດລະບຽບຈະລາຈອນໄປຈັດຕັ້ງປະຕິບັດໃຫ້ຖືກຕ້ອງເພື່ອປ້ອງກັນຕົນເອງໃຫ້ມີຄວາມປອດໄພຈາກການເກີດອຸບັດເຫດ ແລະ ຍົກສູງສະຕິຕ້ານການຫຼິ້ນກິນຟູມເຟືອຍ, ບໍ່ຫຍຸ້ງກ່ຽວພົວພັນກັບສິ່ງເສບຕິດທຸກຊະນິດ, ເອົາໃຈໃສ່ຄົ້ນຄວ້າ, ຮໍ່າຮຽນ, ຝຶກຝົນຕົນເອງໃຫ້ເປັນນັກຮຽນດີ,ຮຽນເກັ່ງ, ເປັນລູກທີ່ດີຂອງພໍ່ແມ່ ແລະເປັນພົນລະເມືອງດີຂອງຊາດ. 

 ໃນໂອກາດດຽວກັນຍັງໄດ້ຈັດກິດຈະກໍາຖາມ-ຕອບຄວາມຮູ້ກ່ຽວກັບກົດລະບຽບຈາລະຈອນ, ການປະຕິບັດກົດລະບຽບຈະລາຈອນ ແລະມາລະຍາດໃນການຂີ່ລົດ, ພ້ອມທັງມອບຂອງຂວັນລາງວັນປະເພດໝວກກັນກະທົບໃຫ້ແກ່ນ້ອງນັກຮຽນຜູ້ທີ່ມີຄວາມສາມາດກ້າສະແດງອອກ ແລະຕອບຄໍາຖາມຖືກຕ້ອງຕື່ມອີກ.

----------

ຂຽນໂດຍ: ພອນສະຫວັນ

#ຫນັງສືພິມເສດຖະກິດສັງຄົມ

แชร์