ຮສສ ຮ່ວມກັບອົງການສະຫະປະຊາຊາດສະຫຼອງວັນເດັກຍິງສາກົນ

  ກະຊວງແຮງງານ ແລະສະຫວັດດີການສັງຄົມ (ຮສສ) ຮ່ວມກັບອົງການສະຫະປະຊາຊາດກອງທຶນສຳລັບປະຊາກອນປະຈໍາ ສປປ ລາວ ໄດ້ຈັດພິທີສະເຫຼີມສະຫຼອງວັນເດັກຍິງສາກົນ (11 ຕຸລາ 2020) ແລະວັນເກີດນາງນ້ອຍຄົບຮອບ 14 ປີຂຶ້ນທີ່ນະຄອນຫຼວງວຽງຈັນໃນອາທິດຜ່ານມາພາຍໃຕ້ການເປັນປະທານຂອງ ທ່ານ ປະ ເດີມພອນ ສົນທະນີ ຮອງລັດຖະມົນຕີກະຊວງແຮງງານ ແລະສະຫວັດດີການສັງຄົມ ແລະທ່ານ ນາງ ມາລ່ຽມ ອາຄ່ານ ຫົວໜ້າອົງການສະຫະປະຊາຊາດກອງທຶນສຳ ລັບປະຊາກອນປະຈຳ ສປປ ລາວ, ມີບັນດາຜູ້ຕາງໜ້າຈາກກະຊວງ, ຄູ່ຮ່ວມພັດທະນາ, ພາກເອກະຊົນ, ນັກຮຽນ-ນັກສຶກສາ ແລະສື່ມວນຊົນເຂົ້າຮ່ວມ.

 ທ່ານ ປະເດີມພອນ ສົນທະນີ ກ່າວວ່າ: ກິດຈະກຳຄັ້ງນີ້, ເພື່ອແນໃສ່ການປູກຈິດສໍານຶກໃຫ້ສັງຄົມໄດ້ເຫັນເຖິງຄວາມສຳຄັນຂອງເດັກຍິງໂດຍສະເພາະແມ່ນຄວາມເທົ່າທຽມທາງດ້ານສິດທິ,ການໄດ້ຮັບໂອກາດ ແລະຄວາມສະເໝີພາບລະຫວ່າງເດັກຍິງ ແລະເດັກຊາຍ. ສຳລັບປີ 2020 ສປປ ລາວ ແມ່ນໄດ້ກໍານົດເອົາຫົວຂໍ້ການສະເຫຼີມສະຫຼອງທີ່ວ່າ: “ນາງນ້ອຍ ແລະ ການພັດທະນາຊຸມຊົນ” ແລະ ອົງການສະຫະປະຊາຊາດໄດ້ກຳນົດຫົວຂໍ້ “ສຽງຂອງຂ້ອຍອະນາຄົດຂອງພວກເຮົາທີ່ເທົ່າທຽມກັນ”, ພາຍໃຕ້ວິໄສທັດລວມຂອງສະມັດຊາໃຫຍ່ອົງການສະຫະປະຊາຊາດທີ່ວ່າ “ບໍ່ ປະຖິ້ມຜູ້ໃດໄວ້ຂ້າງຫຼັງ”.

  ໂອກາດດຽວກັນນັ້ນ, ທ່ານ ນາງ ມາລ່ຽມ ອາຄ່ານ ໄດ້ມີຄຳເຫັນວ່າ: ໂດຍຍົກໃຫ້ເຫັນເຖິງຄວາມສໍາຄັນຂອງການຈັດຕັ້ງປະຕິບັດຖະແຫຼງການຂອງອົງການສະຫະປະຊາຊາດ ແລະການປະຕິບັດແຜນງານຮ່ວມມືນາງນ້ອຍລະຫວ່າງລັດຖະບານ ສປປ ລາວ ແລະອົງການສະຫະປະຊາຊາດກອງທຶນສຳລັບປະຊາກອນປະຈຳ ສປປ ລາວ ໂດຍສະເພາະແມ່ນການຮ່ວມມືຈາກບັນດາຄູ່ຮ່ວມງານເປັນຕົ້ນພາກລັດ,ອົງການຈັດຕັ້ງທາງສັງຄົມ, ອົງການຈັດຕັ້ງສາກົນ, ເອກະຊົນ ແລະອື່ນໆທີ່ມີສ່ວນຮ່ວມໃນການສົ່ງເສີມ ແລະປູກຈິດສຳນຶກໃຫ້ທຸກຄົນໃນສັງຄົມໄດ້ຮັບຮູ້ ແລະເຂົ້າໃນຕໍ່ກັບສິດທິ, ບົດບາດ ແລະຄວາມສຳຄັນຂອງເດັກຍິງເພື່ອຮ່ວມກັນຈັດຕັ້ງປະຕິບັດບັນດາກິດຈະກຳພາຍໃຕ້ແຜນງານຮ່ວມມືໄລຍະ 2017-2020 ໃຫ້ໄດ້ຮັບການຈັດຕັ້ງປະຕິບັດບັດທີ່ດີ ແລະມີຜົນສໍາເລັດສູງ.

  ພາຍໃນງານໄດ້ມີການວາງສະແດງຮູບພາບທີ່ມາຈາກພາກລັດຖະບານ, ອົງການຈັດຕັ້ງສາກົນ ແລະພາກເອກະຊົນຈຳນວນໜຶ່ງ. ພ້ອມນັ້ນ, ຍັງມີກິດຈະກຳງານສຳ ມະນາໃຫ້ຄວາມຮູ້ພາຍໃຕ້ຫົວຂໍ້ “ໄວໜຸ່ມຍິງ-ຊາຍ”. ນອກຈາກນີ້, ຜູ້ເຂົ້າຮ່ວມຍັງໄດ້ຮັບຟັງການນຳສະເໜີແລກປ່ຽນບົດຮຽນ ແລະການສົນທະນາຕ່າງໆ ທີ່ຕິດພັນ ກັບສິດທິ ແລະຄວາມສະເໝີພາບຂອງເດັກຍິງ, ຮັບຊົມວີດີໂອ ແລະຮັບຊົມການສະແດງອີກຈຳນວນໜຶ່ງ.

แชร์