ກຸ່ມພັດທະນາເຂດຄຳມ່ວນເກັບກູ້ເຂົ້ານາປີໄດ້ 50%

  ການເກັບກູ້ເຂົ້ານາປີຂອງຊາວກະສິກອນກຸ່ມພັດທະນາຄຳມ່ວນ ເມືອງຄຳເກີດ ແຂວງບໍລິຄໍາໄຊ ແມ່ນເປັນຂະບວນຟົດຟື້ນ ແລະກວ້າງຂວາງມາຮອດປະຈຸບັນນີ້ແມ່ນສຳເລັດແລ້ວ 50% ຂອງເນື້ອທີ່ຜະລິດທັງໝົດ.

  ທ່ານ ອໍາພອນ ພົມມະສານ ເລຂາຄະນະພັກກຸ່ມພັດທະນາຄຳມ່ວນ ເມືອງຄຳເກີດ ໃຫ້ຮູ້ເມື່ອວັນ ທີ 15 ຕຸລາ 2020 ວ່າ: ກຸ່ມບ້ານພັດທະນາຄຳມ່ວນປະກອບມີ 1.246 ຫຼັງຄາເຮືອນ, ມີ 1.475 ຄອບຄົວ, ມີພົນລະເມືອງທັງໝົດ 7.491 ຄົນ, ຍິງ 3.694 ຄົນ, ປະຊາຊົນສ່ວນໃຫຍ່ແມ່ນຢຶດຖືອາຊີບປູກຝັງ-ລ້ຽງສັດເປັນອາຊີບຕົ້ນຕໍກວມ 95%, ມີເນື້ອທີ່ນາປີທັງໝົດ 1.365 ເຮັກຕາ, ຊຶ່ງປະຈຸບັນປະຊາຊົນພາຍໃນກຸ່ມພວມພາກັນຂຸ້ນຂ້ຽວເກັບກ່ຽວເຂົ້ານາປີຢ່າງເປັນຂະບວນຟົດຟື້ນ ໂດຍການເກັບກູ້ເຂົ້ານາປີແມ່ນໄດ້ລົງມືເກັບກ່ຽວມາແຕ່ຕົ້ນເດືອນຕຸລາຮອດປະຈຸບັນສາມາດເກັບກູ້ໄດ້ 50% ແລະ ຄາດວ່າຈະໃຫ້ສໍາເລັດ 100% ໃນເດືອນພະຈິກ 2020.

  ນອກຈາກການຜະລິດເຂົ້ານາປີປະຊາຊົນພາຍໃນກຸ່ມຍັງໄດ້ປູກພືດຜັກ, ກ້ວຍ, ແຍ້, ຕົ້ນໄມ້ໃຫ້ ໝາກຈຳນວນ 572 ເຮັກຕາ, ເນື້ອທີ່ສວນມັນຕົ້ນ 1.970 ແລະໄດ້ລ້ຽງສັດອີກຈຳນວນໜຶ່ງຊຶ່ງປະກອບມີຄວາຍ 539 ໂຕ, ງົວ 2.509 ໂຕ, ໝູ 2.134 ໂຕ, ແບ້ 496 ໂຕ ແລະສັດປີກຈຳນວນ 21.344 ໂຕ ສາມາດສ້າງລາຍຮັບ ໃຫ້ປະຊາຊົນພາຍໃນກຸ່ມສະເລ່ຍ 13,60 ລ້ານກີບ ຕໍ່ຄົນຕໍ່ປີ.

 ທ່ານ ອໍາພອນ ພົມມະສານ ໃຫ້ຮູ້ຕື່ມວ່າ: ພາຍຫຼັງສຳເລັດການເກັບກູ້ພືດລະດູຝົນແລ້ວຈະຊຸກຍູ້ສົ່ງເສີມໃຫ້ປະຊາຊົນພາຍໃນກຸ່ມສຸມໃສ່ປູກພືດລະດູແລ້ງເປັນຕົ້ນແມ່ນເຂົ້ານາແຊງ, ສາລີ,ໝາກໂມ ແລະພືດສະບຽງອາຫານອຶ່ນໆ,ທັງນີ້ກໍເພື່ອປະຕິບັດຕາມແຜນພັດທະນາເສດຖະກິດ-ສັງຄົມຂອງ ເມືອງຄຳເກີດວາງອອກເວົ້າລວມ, ເວົ້າສະເພາະກຸ່ມພັດທະນາຄຳມ່ວນເພື່ອເຮັດໃຫ້ປະຊາຊົນຫຼຸດພົ້ນອອກຈາກຄວາມທຸກຍາກໄດ້ເທື່ອລະກ່າວ.

แชร์