ລັດກຽມສ້າງໂປຣແກຣມອອກບັດແຮງງານຕ່າງຊາດທີ່ເຮັດວຽກຢູ່ລາວ

  ວັນທີ 15 ຕຸລາ 2020 ທີ່ນະຄອນຫຼວງວຽງຈັນ ໄດ້ມີພິທີເຊັນບົດບັນທຶກຄວາມເຂົ້າໃຈ (MOU) ວ່າດ້ວຍການສຶກສາຄວາມເປັນໄປໄດ້ໃນການພັດທະນາລະບົບໂປຣແກຣມອອກບັດອະນຸຍາດເຮັດວຽກໃຫ້ແຮງງານຕ່າງປະເທດທີ່ເຂົ້າມາເຮັດວຽກຢູ່ລາວ (Smart Card) ລະຫວ່າງກົມພັດທະນາສີມືແຮງງານ ແລະ ຈັດຫາງານ, ກະຊວງແຮງງານ ແລະສະຫວັດດີການສັງຄົມ ແລະບໍລິສັດ ອີປາປາ ການລົງທຶນ ຈໍາກັດຜູ້ດຽວ,ຕາງໜ້າເຊັນໂດຍທ່ານ ອານູສອນ ຄໍາສິງສະຫວັດ, ຫົວໜ້າກົມພັດ ທະນາສີມືແຮງງານ ແລະຈັດຫາງານ ແລະທ່ານ ສຸກສາຄອນ ໃສທິລາດ ປະທານບໍລິສັດອີປາປາການລົງທຶນຈໍາກັດຜູ້, ໂດຍການເປັນກຽດເຂົ້າຮວ່ມຂອງທ່ານ ຄໍາແພງ ໄຊສົມແພງ,ລັດຖະມົນຕີກະຊວງແຮງ ງານ ແລະສະຫວັດດີການສັງຄົມ, ໂດຍມີບັນດາທ່ານຮອງລັດຖະມົນຕີ, ບໍລິສັດ ອີປາປາ ການລົງທຶນ ຈໍາກັດຜູ້ດຽວ ແລະພ້ອມແຂກຖືກເຊີນເຂົ້າຮວ່ມ.

   ໃນພິທີດັ່ງກ່າວ, ທັງສອງຝ່າຍໄດ້ພັດປ່ຽນກັນມີຄຳເຫັນໃນການຈັດຕັ້ງປະຕິບັດເພື່ອພັດທະນາລະບົບໂປຣແກຣມຖານຂໍ້ມູນເພື່ອອະນຸມັດໂກຕານໍາໃຊ້ ແລະ ອອກບັດອະນຸຍາດເຮັດວຽກໃຫ້ແຮງງານຕ່າງປະເທດທີ່ເຂົ້າມາເຮັດວຽກຢູ່ ສປປ ລາວ ໃນຮູບແບບທີ່ທັນສະໄໝ (Smart Card). ບົດບັນທຶກຄວາມເຂົ້າໃຈໄດ້ກໍານົດໄລຍະເວລາ 1 ປີ ແລະເລີ່ມແຕ່ວັນທີ 15 ຕຸລາ 2020 ທີ່ທັງສອງຝ່າຍໄດ້ຮ່ວມກັນລົງນາມ. ຖ້າຫາກວ່າພາຍໃນກໍານົດເວລາ 1 ປີ ການສຶກສາຄວາມເປັນໄປໄດ້ຍັງບໍ່ສໍາເລັດ ແມ່ນສາມາດຕໍ່ອາຍຸການຮ່ວມມືໄປໄດ້ຕື່ມອີກບໍ່ເກີນ 1 ປີ ບົນພື້ນຖານການເຫັນດີເປັນເອກະພາບຂອງສອງຝ່າຍ.

   ໃນພິທີ ທ່ານ ອານູສອນ ຄໍາສິງສະຫວັດ, ຫົວໜ້າກົມພັດທະນາສີມືແຮງງານ ແລະຈັດຫາງານໄດ້ມີຄໍາເຫັນດັ່ງນີ້: ສປປ ລາວ ນອກຈາກເປັນປະເທດສົ່ງກໍ່ຍັງເປັນປະເທດຮັບ ຊຶ່ງໃນແຕ່ລະປີກະ ຊວງແຮງງານ ແລະສະຫວັດດີການ ສັງຄົມ ໄດ້ພິຈາລະນາອະນຸຍາດໃຫ້ແຮງ ງານຕ່າງປະເທດເຂົ້າມາເຮັດວຽກຢູ່ ສປປ ລາວ ຈໍານວນຫຼາຍສົມຄວນເພື່ອສະໜອງໃຫ້ບັນດາຫົວໜ່ວຍແຮງງານຢູ່ໃນຂົງເຂດການຜະລິດ, ທຸລະກິດ ແລະ ບໍລິການຕາມຄວາມຕ້ອງການຂອງຕໍາແໜງງານແນໃສ່ເຮັດໃຫ້ສາມາດຂັບເຄື່ອນການຜະລິດ, ທຸລະກິດ ແລະບໍລິການຈະເລີນເຕີບໂຕໃນແຕ່ລະໄລຍະ, ໃນປີ 2019 ໄດ້ອະນຸມັດໂກຕານໍາໃຊ້ແຮງງານຕ່າງປະເທດຈໍານວນ 65 ພັນຄົນ ແລະປີ 2020 ຈໍານວນ 60 ພັນຄົນ.

   ການອະນຸຍາດໃຫ້ແຮງງານຕ່າງປະເທດເຂົ້າມາເຮັດວຽກຢູ່ ສປປ ລາວ ແມ່ນຈັດຕັ້ງປະຕິບັດຢູ່ຂັ້ນສູນກາງ ແລະທ້ອງຖິ່ນໂດຍມີການແບ່ງຄວາມຮັບຜິດຊອບຢ່າງຈະແຈ້ງຄື: ກົມພັດທະນາສີມືແຮງງານ ແລະຈັດຫາງານເປັນຜູ້ອະນຸມັດໂກຕານໍາໃຊ້ແຮງງານຕ່າງປະເທດບົນພື້ນຖານການສະເໜີຂອງຫົວໜ່ວຍແຮງງານຕາມຈໍານວນໂກຕ້າລວມທີ່ຄະນະນໍາກະຊວງແຮງງານ ແລະສະຫວັດດີການສັງຄົມໄດ້ອະນຸມັດ, ພະແນກແຮງງານ ແລະສະຫວັດດີການສັງຄົມແຂວງ, ນະຄອນຫຼວງວຽງຈັນ ແລະສູນບໍລິການຈັດຫາງານເປັນເປັນຜູ້ອະນຸຍາດນໍາເຂົ້າ, ອອກບັດ ແລະຕໍ່ບັດອະນຸຍາດເຮັດວຽກໃຫ້ແຮງງານຕ່າງປະເທດໃນຂອບເຂດຄວາມຮັບຜິດຊອບຂອງຕົນ, ໂດຍໃຫ້ສາມາດເຊື່ອມໂຍງກັບພາກສ່ວນຕ່າງໆທີ່ກ່ຽວຂ້ອງພ້ອມທັງຕິດຕາມ ແລະ ກວດກາໄດ້ເຫັນວ່າເປັນທິດທາງທີ່ເໝາະສົມເພື່ອເຮັດໃຫ້ວຽກງານການອະນຸຍາດໃຫ້ແຮງ ງານຕ່າງປະເທດເຂົ້າມາເຮັດວຽກຢູ່ ສປປ ລາວ ມີຄວາມສະດວກ,ວ່ອງໄວ,ໂປ່ງໃສ ແລະສາມາດຕອບສະໜອງກັບຄວາມຮຽກຮ້ອງຕ້ອງການຂອງບັນດາຫົວໜ່ວຍແຮງ ງານທີ່ມີຄວາມຕ້ອງການນໍາໃຊ້ແຮງງານຕ່າງປະເທດ.

   ເພື່ອເປັນຂໍ້ມູນໃນການວິເຄາະ ແລະວິໄຈເຖິງຄວາມເປັນໄປໄດ້ໃນການຮ່ວມມືໃນການພັດທະນາລະບົບຖານຂໍ້ມູນເພື່ອລະບົບໂປຣແກຣມຖານຂໍ້ມູນການນໍາເຂົ້າ ແລະອອກບັດອະນຸຍາດເຮັດວຽກໃຫ້ແຮງງານຕ່າງປະເທດທີ່ເຂົ້າມາເຮັດວຽກຢູ່ ສປປ ລາວ ກົມພັດທະນາສີມືແຮງງານ ແລະຈັດຫາງານຈຶ່ງໄດ້ຮ່ວມກັບບໍລິສັດ ອີປາປາ ການລົງທຶນຈໍາກັດຜູ້ດຽວພາຍໃນກໍານົດເວລາ 1 ປີ ເພື່ອສຶກສາຄວາມເປັນໄປໄດ້ໃນການລົງທຶນພັດທະນາລະບົບດັ່ງກ່າວ, ຊຶ່ງທັງສອງຝ່າຍຈະແຕ່ງຕັ້ງພະນັກງານເພື່ອປະ ສານງານ ແລະເກັບຂໍ້ມູນນໍາພະແນກແຮງງານ ແລະສະຫວັດດີການສັງຄົມແຂວງ, ນະຄອນຫຼວງວຽງຈັນ, ສູນບໍລິການຈັດຫາງານ ແລະ ຂະແໜງການທີ່ກ່ຽວຂ້ອງ, ການສຶກສາຄວາມເປັນໄປໄດ້ໃນການພັດທະນາລະບົບໂປຣແກຣມອອກບັດອະນຸຍາດເຮັດວຽກໃຫ້ແຮງງານຕ່າງປະເທດເຮັດວຽກຢູ່ ສປປ ລາວ ຈະເປັນຂໍ້ມູນພື້ນຖານໃນການກໍານົດຮູບແບບການພັດທະນາໂປຣແກຣມຖານຂໍ້ມູນເພື່ອໃຫ້ຄະນະນໍາກະຊວງ ຮສສ ພິຈາລະນາການພັດທະນາລະບົບໂປຣແກຣມຖານຂໍ້ມູນເພື່ອອະນຸມັດໂກຕານໍາໃຊ້ ແລະອອກບັດອະນຸຍາດເຮັດວຽກໃຫ້ແຮງງານຕ່າງປະເທດທີ່ເຂົ້າມາເຮັດວຽກຢູ່ ສປປ ລາວ ໃນຮູບແບບທີ່ທັນສະໄໝ (Smart Card) ໃນຕໍ່ໜ້າ.

----------------

ຮູບພາບ: #ຫນັງສືພິມເສດຖະກິດສັງຄົມ

แชร์