ລາວມີ 1.562 ບໍລິສັດລົງທຶນດ້ານກະສິກຳ-ປ່າໄມ້ ສະເພາະຕ່າງຊາດຈີນອັນດັບ 1

 ຕະຫຼອດໄລຍະຜ່ານມາພັກ ແລະລັດຍາມໃດກໍໄດ້ຖືສຳຄັນຕໍ່ວຽກງານດຶງດູດການລົງທຶນພາຍໃນ ແລະຕ່າງປະເທດໃສ່ຂະແໜງການຕ່າງໆໃນລາວເວົ້າສະເພາະກໍແມ່ນກະສິກຳ ແລະປ່າໄມ້ຊຶ່ງຖືເປັນປັດໄຈທີ່ລາວເຮົາມີທ່າແຮງສຳຄັນໃນການຂັບເຄື່ອນເສດຖະກິດ-ສັງຄົມຊ່ວຍປະຊາຊົນມີອາຊີບ ແລະລາຍຮັບປະກອບສຳຄັນໃນການຫຼຸດພົ້ນອອກຈາກຄວາມທຸກຍາກໄດ້ເທື່ອລະກ້າວໂດຍເວລານີ້ໃນທົ່ວປະເທດມີການລົງທຶນພາກເອກະຊົນໃສ່ຂະແໜງກະສິກຳ-ປ່າໄມ້ ທັງໝົດ 1.562 ບໍລິສັດດ້ວຍມູນຄ່າການລົງທຶນ 4,2 ຕື້ໂດລາ ສະເພາະເອກະຊົນຕ່າງປະເທດແມ່ນມາຈາກຈີນຫຼາຍສຸດຖັດມາແມ່ນຫວຽດນາມ ແລະໄທ.

   ອີງຕາມຂໍ້ມູນຈາກໜັງສືພິມປະຊາຊົນຕາມຄຳໃຫ້ສຳພາດຂອງທ່ານ ອາໂນສັກ ແພງທິມມະວົງ ຮອງຫົວໜ້າກົມແຜນການ ແລະການເງິນກະຊວງກະສິກຳ ແລະປ່າ ໄມ້ເມື່ອບໍ່ດົນມານີ້ກ່ຽວກັບຜົນສຳເລັດຂອງການລົງທຶນຕ່າງປະເທດໃນວຽກງານກະສິກຳຢູ່ປະເທດເຮົາໃນໄລຍະຜ່ານມາວ່າ: ອີງໃສ່ວິໄສທັດຮອດປີ 2030 ແລະຍຸດທະ ສາດຮອດປີ 2025 ຂອງຂົງເຂດກະສິກຳ, ບັນຫາທຳອິດທີ່ຕ້ອງຮັບປະກັນແມ່ນຕ້ອງຜະລິດສະບຽງອາຫານໃຫ້ພຽງພໍກັບຄວາມຕ້ອງການພາຍໃນແລະມີສິນຄ້າສົ່ງ ອອກຈຳນວນໜຶ່ງສອງ, ຕ້ອງສຸມໃສ່ການຜະລິດສິນຄ້າກະສິກຳທີ່ມີຕາມທ່າແຮງຢ່າງຕໍ່ເນື່ອງຕາມທິດທີ່ມີຄຸນນະພາບ,ສີຂຽວ ແລະຍືນຍົງ, ທັງຖືເອົາການປົກປັກຮັກສາສິ່ງແວດ ລ້ອມເປັນສິ່ງຈຳເປັນໂດຍມີການຄຸ້ມຄອງ ແລະນຳໃຊ້ຊັບພະຍາກອນທຳມະຊາດຢ່າງມີປະສິດທິຜົນ, ກໍ່ສ້າງໃຫ້ມີການຫັນປ່ຽນຮູບແບບການພັດທະນາຕາມທິດເສີມຂະຫຍາຍທ່າແຮງບົ່ມຊ້ອນແລະຂໍ້ໄດ້ປຽບຂອງປະເທດເຮົາ. ພ້ອມນັ້ນກໍເຂົ້າຮ່ວມໃນການເຊື່ອມໂຍງກັບພາກພື້ນ ແລະສາກົນຢ່າງເປັນເຈົ້າການ. ສາມ, ຫັນວຽກ ງານກະສິກຳໄປສູ່ຄວາມທັນສະໄໝໃຫ້ຫຼາຍຂຶ້ນກວ່າເກົ່າຊຶ່ງມາຮອດປະຈຸບັນພວກເຮົາມີໂຮງອົບເຂົ້າເປືອກຫຼາຍຂຶ້ນ, ມີເຮືອນຮົ່ມປູກຜັກ, ປູກພືດນອກລະດູແບບກະສິກຳອິນຊີຫຼາຍຂຶ້ນ.

   ທ່ານ ອາໂນສັກ ແພງທິມມະວົງ ໃຫ້ຮູ້ຕື່ມອີກວ່າ: ມາຮອດປະຈຸບັນການລົງທຶນຂອງເອກະຊົນພາຍໃນ ແລະຕ່າງປະເທດໃນຂົງເຂດກະສິກຳ ແລະປ່າໄມ້ໃນຂອບເຂດທົ່ວປະເທດເຮົາແມ່ນລວມມີທັງໝົດ 1.562 ບໍລິສັດ,ດ້ວຍມູນຄ່າການລົງທຶນທັງໝົດ 4,2 ຕື້ໂດລາ,(ທຶນຈົດທະບຽນ2,6ຕື້ໂດລາ) ໃນເນື້ອທີ່ດິນສຳປະທານທັງໝົດ 208.000 ກວ່າເຮັກຕາ.

  ໃນນັ້ນເປັນການລົງທຶນຂອງຕ່າງປະເທດໃນທຸລະກິດກະສິກຳມີ 515  ບໍລິສັດດ້ວຍທຶນທັງໝົດ 2,2 ຕື້ໂດລາ (ທຶນຈົດທະບຽນ 876,2 ລ້ານໂດລາ) ປະເທດທີ່ມາລົງທຶນແມ່ນມາຈາກສະຫະພາບເອີຣົບ, ຈີນ, ຫວຽດນາມ, ໄທ, ຍີ່ປຸ່ນ, ມາເລເຊຍ, ອິນໂດເນເຊຍ, ສ. ເກົາຫຼີ, ຝຣັ່ງ, ໃນນັ້ນສປຈີນເປັນອັນດັບໜຶ່ງໃນການລົງທຶນດ້ານກະສິກຳຢູ່ປະເທດເຮົາ,ຈຳນວນ 239 ບໍລິສັດ, ມີມູນຄ່າການລົງທຶນທັງໝົດ 589 ລ້ານໂດລາ. ອັນດັບສອງແມ່ນ ສສ ຫວຽດນາມ ມີ60 ບໍລິສັດເຂົ້າມາລົງທຶນ, ດ້ວຍມູນຄ່າການລົງທຶນ 268 ລ້ານໂດລາ, ອັນດັບສາມແມ່ນປະເທດໄທມີ 60 ບໍລິສັດ ແລະມູນຄ່າການລົງທຶນ 200 ກວ່າລ້ານໂດລາ.

   ສະເພາະປີ 2020 ສິນຄ້າສົ່ງອອກຂາຍຕ່າງປະເທດອັນດັບທີ່ໜຶ່ງແມ່ນອ້ອຍບັນລຸສົ່ງອອກຂາຍໃຫ້ ສປ ຈີນ 300.000 ໂຕນ, ຖັດມາແມ່ນມັນຕົ້ນ, ສາລີ, ກ້ວຍ, ໝາກໂມ, ມັນດ້າງ, ຕະກຸນຖົ່ວ ແລະພືດຜັກຊະນິດອື່ນໆ. ສະເພາະເຂົ້າສານຕາມແຜນຈະສົ່ງຂາຍໃຫ້ ສປ ຈີນ 50.000 ໂຕນ, ມາຮອດປະຈຸບັນໄດ້ສົ່ງຂາຍອອກໄປແລ້ວ 15.000 ໂຕນ ແລະປະຈຸບັນກຳລັງກະກຽມສືບຕໍ່ສົ່ງຂາຍຕື່ມໃຫ້ສຳເລັດຕາມແຜນການທີ່ໄດ້ກຳນົດໄວ້.

   ໂດຍລວມການລົງທຶນໃນຂະແໜງກະສິກຳໄດ້ປະກອບສ່ວນໃຫ້ແກ່ການພັດທະນາເສດຖະກິດ-ສັງຄົມຢູ່ປະເທດເຮົາໃຫ້ມີການຂະຫຍາຍຕົວຢ່າງຕໍ່ເນື່ອງໃນນັ້ນໄດ້ປະ ກອບສ່ວນ 80% ຂອງລວມຍອດຜະລິດຕະພັນພາຍໃນ (GDP) ໃນຂະແໜງກະສິກຳ ແລະປ່າໄມ້. ໝາຍວ່າໃນ GDP ແຫ່ງຊາດຈະມີລາຍຮັບຈາກຂະແໜງກະສິ ກຳກວມອັດຕາສ່ວນ 15% ແລະໃນ 15% ນັ້ນຈະມີການລົງທຶນດ້ານກະສິກຳກວມເອົາ 80%, ນອກນັ້ນການລົງທຶນຂອງຜູ້ປະກອບການທັງພາຍໃນ ແລະຕ່າງປະ ເທດໄດ້ສ້າງວຽກເຮັດງານທຳໃຫ້ແກ່ປະຊາຊົນໃນ ເຂດຊົນນະບົດ, ເພີ່ມລາຍຮັບໃຫ້ແກ່ຄອບຄົວ, ແກ້ໄຂໄດ້ຊີວິດການເປັນຢູ່ໃຫ້ດີຂຶ້ນເປັນກ້າວໆ.

--------------

#ຫນັງສືພິມເສດຖະກິດສັງຄົມ

แชร์