ເມືອງຫີນບູນ ສ້າງຂະບວນອະນາໄມຂໍ່ານັບຮັບຕ້ອນວັນສຳຄັນ

  ວັນທີ 16 ຕຸລາ 2020 ຄະນະນຳຂອງເມືອງຫີນບູນນຳໂດຍທ່ານ ຄຳສິງ ອໍລະວັນ ເຈົ້າເມືອງຫີນບູນ ແຂວງຄຳມ່ວນໄດ້ນຳພາບັນດາຂະແໜງການ, ຫ້ອງການອ້ອມຂ້າງພ້ອມດ້ວຍພະນັກງານຫຼັກແຫຼ່ງພາຍໃນເມືອງ ແລະອຳນາດການປົກຄອງບ້ານ, ພໍ່ແມ່ປະຊາຊົນໃນເທສະບານສ້າງຂະບວນການອະນາໄມທຳຄວາມສະອາດພາຍໃນຕົວເມືອງ ແລະເສັ້ນທາງຫຼັກຕ່າງໆ ຊຶ່ງໃນນັ້ນແມ່ນໄດ້ມີການຕັດຫຍ້າ, ເກັບກວາດຂີ້ເຫຍື້ອຕາມແຄມທາງໂດຍໄດ້ເລີ່ມຈາກທາງເລກທີ 13 ບ້ານໂພນຄຳຫາປາກນ້ຳຫີນບູນລວມໄລຍະທາງ 9 ກິໂລແມັດ.

 ທ່ານ ສະຫວັດ ໄພມະສານ ປະທານກວດກາພັກ-ລັດເມືອງຫີນບູນຕາງໜ້າໃຫ້ແກ່ການນຳຂອງເມືອງໄດ້ກ່າວວ່າ: ນອກຈາກການອະນາໄມຕາມເສັ້ນທາງແລ້ວຄະນະນຳຂັ້ນເມືອງຍັງໄດ້ມອບຄວາມຮັບຜິດຊອບໃຫ້ແກ່ບັນດາຂະແໜງການ, ຫ້ອງການອ້ອມຂ້າງອະນາໄມຕາມສຳນັກງານ, ຫ້ອງການຂອງຕົນໃຫ້ມີຄວາມສະອາດງາມຕາພ້ອມທັງຕິດທຸງພັກ, ທຸງຊາດ ແລະທຸງທິວຕາມສະຖານທີ່ຕ່າງໆເພື່ອເພີ່ມສີສັນແລະຄວາມສວຍງາມນອກນັ້ນຍັງໄດ້ມອບໃຫ້ບັນດາບ້ານຕ່າງໆໃນທົ່ວເມືອງສ້າງຂະບວນການອະນາໄມລວມບ້ານໂດຍມອບໃຫ້ຄະນະຊີ້ນຳກຸ່ມບ້ານ,ຄະນະພັກບ້ານລົງໄປນຳພາພໍ່ແມ່ປະຊາຊົນສ້າງຂະບວນການອະນາໄມໃນຂອບເຂດບ້ານຂອງຕົນພ້ອມນັ້ນທາງເມືອງຫີນບູນຍັງຈະໄດ້ຈັດກິດຈະກຳກິລາບານສົ່ງໃນທົ່ວເມືອງເພື່ອສ້າງຂະບວນການຂໍ່ານັບຮັບຕ້ອນກອງປະຊຸມໃຫຍ່ຄັ້ງທີ X ຂອງແຂວງຄຳມ່ວນໃຫ້ມີບັນຍາກາດຟົດຟື້ນເບີກບານມ່ວນຊື່ນພ້ອມທັງຮຽກຮ້ອງມາຍັງພໍ່ແມ່ປະຊາຊົນທຸກທົ່ວໜ້າຢູ່ພາຍໃນເມືອງຫີນບູນຈົ່ງໄດ້ຮ່ວມຈິດຮ່ວມໃຈພ້ອມກັນປະກອບສ່ວນ ແລະ ເຂົ້າຮ່ວມໃນຂະ ບວນການດັ່ງກ່າວ.

-----------

ຂ່າວ: ກອງຄຳ, #ຮູບພາບ: ໜັງສືພິມເສດຖະກິດ-ສັງຄົມ

แชร์