ສທຍ ຈຳປາສັກຈະສຸມຫຼາຍໜ້າວຽກເພື່ອຍົກສູງບົດບາດທາງສັງຄົມ

 ເພື່ອຜັນຂະຫຍາຍມະຕິກອງປະຊຸມໃຫຍ່ຄັ້ງທີ 3 ສະໄໝທີ III ຂອງຄະນະບໍລິຫານງານສະມາຄົມນັກທຸລະກິດຍິງ ແຂວງຈໍາປາສັກ ໃຫ້ປາກົດຜົນເປັນຈິງ ແລະເຮັດໃຫ້ສະມາຄົມຍິງມີພາລະບົດບາດຍິ່ງຂຶ້ນໃນສັງຄົມໃນທ້າຍປີ 2020 ນີ້ ສະມາຄົມແມ່ນຈະໄດ້ສຸມໃສ່ຫຼາຍໜ້າວຽກທີ່ສໍາຄັນເພື່ອເຮັດໃຫ້ສາມາດເຕົ້າໂຮມຄວາມສາມັກຄີໃນສະມາຊິກກໍ່ຄືການເຮັດໃຫ້ຜົນປະກອບການທຸລະກິດໄດ້ມີການຂະຫຍາຍຕົວຍິ່ງຂຶ້ນ.

 ທ່ານ ນາງ ເພັດສະໃໝ ແສງອາລຸນ ປະທານສະມາຄົມນັກທຸລະກິດແມ່ຍິງ ແຂວງຈໍາປາສັກ, ໄດ້ກ່າວລາຍງານແຜນການເຄື່ອນໄຫວວຽກງານສົກປີ 2020-2021 ຕໍ່ກອງປະຊຸມທີ່ໄດ້ຈັດຂຶ້ນເມື່ອທ້າຍອາທິດທີ່ຜ່ານມານີ້ວ່າ: ເພື່ອເຮັດໃຫ້ການຈັດຕັ້ງປະຕິບັດວຽກງານຂອງສະມາຄົມໃຫ້ສາມາດບັນລຸຄາດໝາຍທີ່ກໍານົດໄວ້, ດັ່ງນັ້ນປະທານສະມາຄົມນັກທຸລະກິດແມ່ຍິງແຂວງຈໍາປາສັກພ້ອມຄະນະບໍລິຫານງານແຜນຈະໄດ້ສືບຕໍ່ປະຕິບັດແຜນປີ 2019 ທີ່ຍັງບໍ່ທັນໄດ້ຈັດຕັ້ງປະຕິບັດໃນໄລຍະຜ່ານມາ, ສືບຕໍ່ສ້າງຂະບວນການປຸກລະດົມສະມາຊິກທຸກໆທ່ານທີ່ເຂົ້າຮ່ວມເຄື່ອນໄຫວຕາມແຜນທີ່ວາງອອກເພື່ອແນໃສ່ເຕົ້າໂຮມຄວາມສາມັກຄີອັນເປັນປຶກແຜ່ນທັງພາຍໃນ ແລະພາຍນອກ, ສ້າງສາມາຄົມໃຫ້ມີຄວາມເຂັ້ມແຂງທາງດ້ານປະລິມານແລະຄຸນນະພາບ, ເປັນຕົ້ນດ້ານການຈັດຕັ້ງຂອງສະມາຄົມ, ການເຄື່ອນໄຫວຂອງຄະນະ ແລະສະມາຊິກພາຍໃນສະມາຄົມ.

  ພ້ອມດຽວກັນນີ້ທັງຄະນະປະທານ, ຄະນະບໍລິຫານງານ ແລະສະມາຊິກ ສທຍ ຈໍາປາສັກ ຈະໄດ້ຮ່ວມແຮງຮ່ວມໃຈກັນມອບທຶນເຂົ້າໃນສະມາຄົມເພື່ອເປັນທຶນໃນການລົງທຶນເຮັດກິດຈະກໍາໃດໜຶ່ງເປັນຕົ້ນ: ຕັ້ງຮ້ານຂາຍເຄື່ອງຜະລິດຕະພັນຫັດຖະກໍາ, ເຄື່ອງທີ່ລະນຶກ ແລະເຄື່ອງປະດິດດ້ວຍສີມືເອກະລັກບ້ານເຮັາ, ຊອກຫາຊ່ອງທາງລາຍຮັບຈາກາການຈັດງານເທສະການອາຫານອື່ນໆຕາມລະດູການ ຫຼື ຊອກແຫຼ່ງທຶນຈາກການຫາລາຍໄດ້ໃນວັນສໍາຄັນຕ່າງໆ ທີ່ມີຄວາມເມ!ະສົມກັບສະມາຄົມ ແລະການຊອກຮຽນຮູ້ປະສົບການໃໝ່ມາສຶກສາແລກປ່ຽນບົດຮຽນເຊິ່ງກັນ ແລະກັນ.

---------------

ຂ່າວ: ພູມະນີ

ຮູບພາບ: ໜັງສືພິມເສດຖະກິດ-ສັງຄົມ

แชร์