ແຂ່ງຂັນກີລາດອກປີກໄກ່ ຊີງຂັນທ່ານເຈົ້າແຂວງໄຊສົມບູນ

   ວັນທີ 9-11 ຕຸລາ ຜ່ານມາທີ່ເດີນກີລາດອກປີກໄກ່ບໍລິສັດ ແສງວົງຈິດ ແຂວງໄຊສົມບູນໄດ້ເປີດປິດການແຂ່ງຂັນກີລາດອກປີກໄກ່ຊີງຂັນທ່ານເຈົ້າແຂວງໂດຍການເຂົ້າຮ່ວມຂອງທ່ານ ພົຕ ຄໍາລຽງ ອຸທະໄກສອນ ເຈົ້າແຂວງໄຊສົມບູນ, ມີບັນດາຮອງເຈົ້າແຂວງ, ປະທານສະພາປະຊາຊົນແຂວງ ແລະມີນັກກີລາແຕ່ລະທີມເຂົ້າຮ່ວມ.

  ການແຂ່ງຂັນກີລາດອກປີກໄກ່ຊີງຂັນທ່ານເຈົ້າແຂວງໃນຄັ້ງນີ້ປະເພດທີມຄູ່ອາວຸໂສເພດຊາຍອາຍຸສະເລ່ຍ 100 ປີຂຶ້ນໄປອັນດັບ 1 ໄດ້ແກ່ທີມຈາກພະແນກການເງິນ ແຂວງ, ໄດ້ຮັບເງິນສົດ 1 ລ້ານກີບພ້ອມຂັນລາງວັນ ແລະຫຼຽນຄໍາ; ອັນດັບ 2 ທີມຈາກຫ້ອງວ່າການແຂວງໄດ້ຮັບເງິນສົດ 8 ແສນກີບພ້ອມຫຼຽນເງິນ; ອັນດັບ 3 ທີມຈາກເມືອງທ່າໂທມໄດ້ຮັບເງິນສົດ 6 ແສນກີບພ້ອມຫຼຽນທອງແດງ; ອັນດັບ 3 ຮ່ວມແມ່ນທີມຈາກລັດວິສາຫະກິດໄຟຟ້າລາວສາຂາແຂວງໄດ້ຮັບເງິນສົດ 4 ແສນກີບພ້ອມຫຼຽນທອງ.

  ສຳລັບປະເພດທີມຄູ່ຊາຍ (ບໍ່ຈໍາກັດອາຍຸ) ອັນດັບ 1 ທີມຈາກເມືອງທ່າໂທມ ໄດ້ຮັບເງິນສົດ 1 ລ້ານກີບພ້ອມຂັນລາງວັນ ແລະຫຼຽນຄໍາ; ອັນດັບ 2 ບໍລິສັດແສງວົງຈິດໄດ້ຮັບເງິນສົດ 8 ແສນກີບພ້ອມຫຼຽນເງິນ; ອັນດັບ 3 ທີມຈາກເຂື່ອນໄຟຟ້ານໍ້າເລິກໄດ້ຮັບເງິນສົດ 6 ແສນກີບພ້ອມຫຼຽນທອງ ແລະອັນດັບ 3 ຮ່ວມພະແນກການເງິນແຂວງໄດ້ຮັບເງິນສົດ 4 ແສນກີບພ້ອມຫຼຽນທອງ;ປະເພດທິມຄູ່ເພດຍິງທົ່ວໄປ (ບໍ່ຈໍາກັດອາຍຸ) ທີມຊະນະເລີດອັນດັບ 1 ເມືອງທ່າໂທມ 2 ໄດ້ຮັບເງິນສົດ 1 ລ້ານກີບ ພ້ອມຂັນລາງວັນ ແລະຫຼຽນຄໍາ; ອັນດັບ 2 ເມືອງທ່າ ໂທມ 1 ໄດ້ຮັບເງິນສົດ 8 ແສນກີບ ພ້ອມຫຼຽນເງິນ; ອັນດັບ 3 ພະແນກໄປສະນີແຂວງ 1 ໄດ້ຮັບເງິນສົດ 6 ແສນກີບພ້ອມຫຼຽນທອງ ແລະອັນດັບ 3 ຮ່ວມພະແນກໄປສະນີແຂວງ 2 ໄດ້ຮັບເງິນສົດ 4 ແສນກີບພ້ອມຫຼຽນທອງແດງ.

  ການແຂ່ງຂັນກີລາດອກປີກໄກ່ຊີງຂັນທ່ານເຈົ້າແຂວງໃນຄັ້ງນີ້ເພື່ອເປັນການສ້າງຂະບວນການຂໍ່ານັບ-ຮັບຕ້ອນກອງປະຊຸມໃຫຍ່ອົງຄະນະພັກແຂວງໄຊສົມບູນຄັ້ງທີ 1 ທີ່ຈະໄດ້ໄຂຂຶ້ນໃນມໍ່ໆນີ້ໃຫ້ເປັນຂະບວນການຟົດຟື້ນ, ເບີກບານມ່ວນຊື່ນ ແລະມີຄວາມສາມັກຄີລະຫວ່າງນັກກີລາດ້ວຍກັນ.

 

แชร์