ລາວເຂົ້າຮ່ວມກອງປະຊຸມທາງໄກລະດັບ ລັດຖະມົນຕີຂອງຂະບວນການບໍ່ຮ່ວມກຸ່ມ

ໃນໄລຍະກອງປະຊຸມສະມັດຊາໃຫຍ່ອົງການສະຫະປະຊາຊາດຄັ້ງທີ 75, ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ, ໄດ້ເຂົ້າຮ່ວມແລະກ່າວບົດປາໄສຕໍ່ກອງປະຊຸມທາງໄກປະຈຳປີລະດັບລັດຖະມົນຕີຂອງຂະບວນການບໍ່ຮ່ວມກຸ່ມ (The Online Ministerial Meeting of the Non-Aligned Movement on the margins of the High-level General Debate of the 75th Session of the United Nations General Assembly)ພາຍໃຕ້ຫົວຂໍ້ “ບັນດຸງ +65 ຂະບວນການບໍ່ຮ່ວມກຸ່ມທີ່ມີຄຸນຄ່າ, ມີຄວາມເປັນເອກະພາບ ແລະມີປະສິດທິຜົນຫຼາຍຍິ່ງຂຶ້ນໃນການຮັບມືກັບສິ່ງທ້າທາຍສາກົນທີ່ເກີດຂຶ້ນລວມທັງພະຍາດ COVID-19 (Bandung+65: More relevant, United and Effective NAM against E-merging Global Challenges, including COVID-19” ຊຶ່ງຈັດຂຶ້ນໃນວັນທີ 9 ຕຸລາ 2020, ພາຍໃຕ້ການເປັນປະທານຂອງປະເທດອາແຊັກໄບຊານ.

  ກອງປະຊຸມໄດ້ຈັດຂຶ້ນເພື່ອປຶກສາຫາລື ແລະແລກປ່ຽນຄວາມຄິດເຫັນກ່ຽວກັບສິງທ້າທາຍຕ່າງໆທີ່ເກີດຂຶ້ນໃນພາກພື້ນ ແລະສາກົນ, ໃນການປະກອບຄຳເຫັນຂອງຄະ ນະຜູ້ແທນແມ່ນໄດ້ຢໍ້າຄືນບັນດາຄວາມໝາຍໝັ້ນ ແລະ ຫຼັກການຂອງຂະບວນການບໍ່ຮ່ວມກຸ່ມ ແລະ ສົ່ງເສີມການຮັດແໜ້ນການຮ່ວມມືຂອງບັນດາປະເທດສະມາຊິກເພື່ອຮ່ວມມືກັນແກ້ໄຂບັນຫາ ແລະສິ່ງທ້າທາຍຕ່າງໆ, ກອງປະຊຸມໄດ້ຮັບຮອງເອົາຖະແຫຼງການທາງດ້ານການເມືອງລະດັບລັດຖະມົນຕີວ່າດ້ວຍຫຼັກການບັນດຸງຄົບຮອບ 65 ປີ ຂະບວນການບໍ່ຮ່ວມກຸ່ມທີ່ມີຄຸນຄ່າ,ມີຄວາມເປັນເອກະພາບ ແລະມີປະສິດທິຜົນຫຼາຍຍິ່ງຂື້ນໃນການຮັບມືກັບສິ່ງທ້າທາຍສາກົນທີ່ເກີດຂຶ້ນລວມທັງການແຜ່ລະ ບາດພະຍາດ COVID-19.

  ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດໄດ້ກ່າວບົດປາໄສໃນກອງປະຊຸມໂດຍເນັ້ນເຖິງຄວາມສຳຄັນຂອງການຍຶດຖືຫຼັກການບັນດຸງທີ່ເປັນຫຼັກການຕົ້ນກຳເນີດຂອງຂະບວນການບໍ່ຮ່ວມກຸ່ມຄື: ເພື່ອສັນຕິພາບ, ເອກະລາດ, ອະທິປະໄຕ, ຄວາມສະເໜີພາບ ແລະການບໍ່ແຊກແຊງເຂົ້າກິດຈະການພາຍໃນຂອງກັນ ແລະກັນພ້ອມທັງຊົມເຊີຍ 65 ປີ ຂອງຫຼັກການດັ່ງກ່າວ. ພ້ອມດຽວກັນນັ້ນ, ໄດ້ກ່າວເຖິງຄວາມສຳຄັນໃນການປັບປຸງອົງການສະຫະປະຊາຊາດເພື່ອໃຫ້ສາມາດຮັບມືກັບສິ່ງທ້າທາຍທີ່ເກີດຂຶ້ນໃນຍຸກປະຈຸບັນທາມກາງການສະເຫຼີມສະຫຼອງການສ້າງຕັ້ງອົງການສະຫະປະຊາຊາດຄົບຮອບ 75 ປີ, ນອກນັ້ນໄດ້ຕີລາຄາຜົນກະທົບຂອງພະຍາດລະບາດ COVID-19 ແລະເນັ້ນໜັກໃສ່ການຮັດແໜ້ນຄວາມສາມັກຄີຂອງສາກົນໃນການຮ່ວມມືຕໍ່ສູ້ກັບພະຍາດດັ່ງກ່າວຢ່າງມີປະສິດທິຜົນ.

   ຂະບວນການບໍ່ຮ່ວມກຸ່ມ (Non-Aligned Movement–NAM) ໄດ້ຮັບການສ້າງຕັ້ງຂຶ້ນໃນປີ 1961 ໂດຍບັນດາປະເທດກຳລັງພັດທະນາທີ່ບໍ່ຕ້ອງການຮ່ວມກຸ່ມ ຫຼືເປັນປໍລະປັກກັບຝ່າຍໃດໃນໄລຍະສົງຄາມເຢັນ, ຈຸດປະສົງຫຼັກຂອງ NAM ແມ່ນເພື່ອຮັກສາຄວາມເປັນເອກະລາດ, ສະຖຽນລະພາບ, ອະທິປະໄຕ ແລະ ຄວາມໝັ້ນຄົງຂອງປະເທດສະມາຊິກໂດຍການຮ່ວມມືປະຕິບັດຕາມຫຼັກການບັນດຸງ (Bandung Principle) ທີ່ສົ່ງເສີມການຮ່ວມມື ແລະສັນຕິພາບຂອງໂລກຊຶ່ງປະຈຸບັນມີປະເທດສະມາຊິກທັງໝົດ 125 ປະເທດ.

แชร์