ຫຼວງນໍ້າທາຈູດທຳລາຍຢາເສບຕິດ

 ວັນທີ 8 ຕຸລາຜ່ານມາ ແຂວງຫຼວງນໍ້າທາ ຈູດທຳລາຍຢາເສບຕິດໄດ້ຈັດຂື້ນທີ່ເດີນກີລາໃໝ່ຂອງແຂວງໂດຍການເປັນປະທານຂອງພັນໂທ ອຳໄພ ສໍສະຫວັນ ແສງ, ຄະ ນະພັກກອງບັນຊາການ, ຮັກສາການຫົວໜ້າຫ້ອງຕໍາຫຼວດ, ໃຫ້ກຽດເຂົ້າຮ່ວມຂອງທ່ານ ຄຳໄຫຼ ສີປະເສີດເລຂາພັກແຂວງ, ມີຫົວໜ້າພະແນກການ, ອົງການທຽບເທົ່າ, ພະນັກງານ, ທະຫານ, ຕໍາຫຼວດ, ລັດວີສາຫະກິດ, ໂຮງຮຽນ, ໂຮງໝໍ, ບັນດາບໍລິສັດພາກລັດ ແລະເອກະຊົນ, ປະຊາຊົນບັນດາເຜົ່າ, ຕະຫຼອດຮອດນັກຮຽນ ເທສະບານແຂວງເຂົ້າຮ່ວມ.

   ໃນພິທີໄດ້ຜ່ານຂໍ້ຕົກລົງຂອງທ່ານເຈົ້າແຂວງໆຫຼວງນໍ້າທາວ່າດ້ວຍອະນຸມັດໃຫ້ກອງບັນຊາການ ປກສ ແຂວງຈູດທຳລາຍຢາເສບຕິດທີ່ສານໄດ້ຕັດສີນແລ້ວ, ຈາກນັ້ນທ່ານ ພົນຈັດຕະວາ ອີນແກ້ວ ມະນີຈັນ ຫົວໜ້າກອງບັນຊາການທະຫານແຂວງຫຼວງນໍ້າທາໃຫ້ຮູ້ສະພາການຈັດຕັ້ງປະຕິບັດວຽກງານການສະກັດກັ້ນຕ້ານ ແລະ ແກ້ ໄຂບັນຫາຢາເສບຕິດໃນໄລຍະຜ່ານມາ, ແຂວງຫຼວງນໍ້າທາ ເວົ້າສະເພາະກໍ່ຄືເຈົ້າໜ້າທີ່ພາກສ່ວນກ່ຽວຂ້ອງໄດ້ເຜີຍແຜຜົນຮ້າຍຂອງຢາເສບຕິດ, ໂຄສະນາຢູ່ບັນດາບ້ານເປົ້າໝາຍ ແລະບໍລິສັດທີ່ມາລົງທຶນປູກພືດທົດແທນການປູກຝິ່ນ5 ຄັ້ງ, ທໍາລາຍສ່ວນຝິ່ນທີ່ປະຊາຊົນລັກລອບປູກໄດ້ 106 ເຮັກຕາ, ກວດນໍ້າປັດສະວະ ໃຫ້ນັກຮຽນນັກສຶກສາ, ພະນັກງານທົ່ວແຂວງ 95 ຄົນ, ຍິງ 44 ຄົນ, ປະເມີນໂຮງຮຽນປອດຢາເສບຕິດໄດ້ 64 ແຫ່ງ,ປີ 2019 ມີຄະດີຄ້າງ 87 ເລື່ອງ, ປີ 2020 ມ້າງຄະດີໄດ້ 70 ເລື່ອງ, ຜູ້ຖືກ ຫາ 95 ຄົນ, ຍິງ 7 ຄົນ, ຕ່າງປະເທດ 2 ຄົນ,ຍຶດຂອງກາງປະເພດຢາບ້າໄດ້ 4 ໝືນ 536 ເມັດ,ເຮໂລອີນ 90 ກຣາມ,ຢາໄອ 38 ກຣາມ, ຢາຝິ່ນ 67,3 ກິໂລກຣາມ.

    ຢາທີ່ນໍາມາທໍາລາຍໃນຄັ້ງນີ້ປະກອບມີຢາບ້າ 57 ພັນກວ່າເມັດ, ເຮໂລອິ່ນ 75 ກຣາມ, ຢາໄອ 23,57 ກຣາມ, ຢາຝິ່ນ 1,3 ກິໂລກຣາມ, ແປ້ງຝຸ່ນທີ່ບໍ່ມີເຊື້ອຢາເສບຕິດເຈືອປົນ 103,8 ກິໂລກຣາມ, ແປ້ງທີ່ມີເຊື້ອຢາເສບຕິດປົນ 7,5 ກຣາມ, ໂອກາດດັ່ງກ່າວ ທ່ານ ຄຳໄຫຼ ສີປະເສີດ ພ້ອມດ້ວຍແຂກຖືກເຊີນຮ່ວມຈູດທຳລາຍຢາເສບຕິດຖີ້ມຢ່າງເປັນທາງການ.

-------------

ຂ່າວ: ມຸນຕີ,  ຮູບພາບ: ໜັງສືພິມເສດຖະກິດ-ສັງຄົມ

 

แชร์