ຫຼວງພະບາງສະຫຼອງວັນສາຍຕາໂລກ

   ແຂວງຫຼວງພະບາງ ໄດ້ຈັດພິທີສະເຫຼີມສະຫຼອງວັນສາຍຕາໂລກຄົບຮອບ 18 ປີຂຶ້ນ (8 ຕຸລາ 2002-8 ຕຸລາ 2020) ຂຶ້ນໃນວັນທີ 14 ຕຸລາ 2020 ນີ້ ຢູ່ທີ່ໂຮງໝໍແຂວງໂດຍມີທ່ານ ວົງສະຫວັນ ເທບພະຈັນ ຮອງເຈົ້າແຂວງໆຫຼວງພະບາງ, ທ່ານ ດຣຄຳພຸດ ສຸກກະເສີມ ອຳນວຍການໂຮງໝໍແຂວງຫຼວງພະບາງ,ມີແຂກຖືກເຊີນຈາກພາກສ່ວນກ່ຽວຂ້ອງຂອງແຂວງ, ຜູ້ປິ່ນປົວຕາຈາກອົງການຈັດຕັ້ງບ້ານອ້ອມຂ້າງພ້ອມດ້ວຍພະນັກງານໂຮງໝໍແຂວງເຂົ້າຮ່ວມ.

   ທ່ານ ດຣ ຄຳພຸດ ສຸກກະເສີມ ອຳນວຍການໂຮງໝໍແຂວງໆຫຼວງພະບາງກ່າວວ່າ: ການສະເຫຼີມສະຫຼອງວັນສາຍຕາໂລກປີ 2020 ນີ້ ແມ່ນມີຄວາມໝາຍສຳຄັນຫຼາຍທັງເປັນການເລັ່ງໃສ່ຂົນຂວາຍໃຫ້ຫຼາຍພາກສ່ວນໃຫ້ມີສ່ວນຮ່ວມ, ເພື່ອຮ່ວມມືໃນການແກ້ໄຂບັນຫາຕາບອດໃນແຕ່ລະປະເທດທົ່ວໂລກ ແລະເຮັດໃຫ້ທົ່ວສັງຄົມຍົກສູງຄວາມຮັບຮູ້ ແລະ ເຂົ້າໃຈກ່ຽວກັບບັນຫາການປ້ອງກັນ ແລະການປິ່ນປົວໃຫ້ຄວາມສຳຄັນຕໍ່ສິດທິໃນການເບິ່ງເຫັນ, ອີກດ້ານໜຶ່ງກໍເປັນການເລັ່ງທວງສັນຍາຂອງລັດ ຖະບານແຕ່ລະປະເທດໃຫ້ມີການຮັບຮອງເອົາເພື່ອແນໃສ່ໃຫ້ມີການຂະຫຍາຍການບໍລິການດ້ານການຮັກສາສຸຂະພາບຕາລວມທັງການປ້ອງກັນ ແລະ ການປິ່ນປົວຢູ່ພາຍ ໃນປະເທດຂອງຕົນ.

 ພ້ອມນີ້, ຍັງເປັນການເປີດກວ້າງໃນການຮັກສາສຸຂະພາບຕາໃຫ້ທົ່ວເຖິງຊຶ່ງເປັນຍຸດທະສາດໜຶ່ງທີ່ຈະຊ່ວຍຫຼຸດຜ່ອນຈຳນວນຄົນຕາບໍ່ເຫັນຮຸ່ງຖາວອນໄດ້ ແລະເປັນພັນ ທະສ່ວນໜຶ່ງທີ່ມີຄວາມຈຳເປັນຈະຕ້ອງໄດ້ເຮັດໃຫ້ເພື່ອບັນລຸມາດຕະຖານສູງສຸດຂອງສຸຂະພາບຕາທີ່ດີແຕ່ປີ 2020 ເປັນຕົ້ນໄປ.

    ປະຈຸບັນຈຳນວນພະຍາດຕາທີ່ບໍ່ເຫັນຮຸ່ງຖາວອນ 20% ແມ່ນການປ້ອງກັນເພື່ອຫຼີກລຽງບໍ່ໃຫ້ຕາບໍ່ເຫັນຮຸງຖາວອນໄດ້ ແລະ 60% ແມ່ນມາຈາກການປິ່ນປົວຊຶ່ງເຮັດໃຫ້ສາຍຕາກັບຄືນດີເປັນປົກກະຕິ,ການປ້ອງກັນ ແລະປິ່ນປົວສາຍຕາບົກຜ່ອງຈະມີປະສິດທິຜົນ ແລະມີຜົນສຳເລັດໄດ້ກໍຕໍ່ເມື່ອທຸກຄົນໄດ້ຮັບການປິ່ນປົວຢ່າງຖືກຕ້ອງຕາມຫຼັກການຂອງແພດເປັນຕົ້ນແມ່ນການຜ່າຕັດແກ່ນຕາຂຸ້ນ, ປິ່ນປົວພະຍາຊືມເຊື້ອທາງຕາ, ການປ້ອງຕາບອດຈາກພະຍາດສານຕາ.

  ໃນທົ່ວໂລກປະຈຸບັນທຸກໆ 5 ວິນາ ທີໃດຈະມີ 1 ໜຶ່ງຄົນເປັນຄົນຕາບໍ່ເຫັນຮຸ່ງຖາວອນ ແລະທຸກໆ 1 ນາທີ ຈະມີເດັກ 1 ຄົນກາຍເປັນຄົນຕາບໍ່ເຫັນຮຸ່ງຖາວອນຈາກຕົວເລກດັ່ງກ່າວຄາດຄະເນວ່າໃນແຕ່ລະປີທົ່ວໂລກຈະມີປະຊາກອນຫຼາຍກວ່າ 70 ລ້ານຄົນ ກາຍເປັນຄົນຕາບໍ່ເຫັນຮຸ່ງຖາວອນລວມທັງ ສປປ ລາວ ຕື່ມອີກ.

-----------

ຂ່າວ: ສີສຸວັນ. ຮູບພາບ: #ຫນັງສືພິມເສດຖະກິດສັງຄົມ

แชร์