ລາວ-ຈີນ ເຊັນສັນຍາຮັບເອົາສິດພິເສດດ້ານພາສີ 0% ແກ່ 97% ຂອງສິນຄ້າທັງໝົດ

  ໃນວັນທີ 14 ຕຸລາ 2020, ທີ່ນະຄອນຫຼວງວຽງຈັນ ລາວ-ຈີນ ໄດ້ພົບປະສອງຝ່າຍ ແລະພິທີເຊັນສັນຍາລະຫວ່າງກະຊວງການຕ່າງປະເທດແຫ່ງ ສປປ ລາວ ແລະກະຊວງການຕ່າງປະເທດ ສປ ຈີນ ຊຶ່ງຕາງໜ້າໂດຍ ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດແຫ່ງ ສປປ ລາວ ແລະ ທ່ານ ຫວັງອີ້ ທີ່ປຶກ ສາແຫ່ງລັດ, ລັດຖະມົນຕີກະຊວງການຕ່າງປະເທດແຫ່ງ ສປ ຈີນ ເພື່ອເປັນການສືບຕໍ່ຜັນຂະຫຍາຍສາຍພົວພັນຮ່ວມມືຍຸດທະສາດຮອບດ້ານໝັ້ນຄົງຍາວນານຕາມທິດ 4 ດີ ກໍຄືການເປັນຄູ່ຮ່ວມຊະຕາກຳລາວ- ຈີນ, ຈີນ-ລາວ ໃຫ້ແໜ້ນແຟ້ນເຂົ້າສູ່ລວງເລິກຂຶ້ນ.

   ໃນການພົບປະຄັ້ງນີ້, ສອງຝ່າຍໄດ້ຕີລາຄາສູງຕໍ່ການພົວພັນແບບຄູ່ຮ່ວມມືຍຸດທະສາດຮອບດ້ານໝັ້ນຄົງຍາວນານຕາມທິດ4ດີ ແລະການເປັນຄູ່ຮ່ວມຊະຕາກຳລາວ-ຈີນ ແລະຈີນ-ລາວ ລະຫວ່າງສອງພັກ ແລະສອງລັດຖະບານກໍຄືປະຊາຊົນສອງຊາດຊຶ່ງນັບມື້ນັບໄດ້ຮັບການເສີມຂະຫຍາຍດ້ວຍຄຸນນະພາບໃໝ່ຢ່າງບໍ່ຢຸດຢັ້ງໂດຍໄດ້ສະແດງອອກໃນການແລກປ່ຽນການຢ້ຽມຢາມຂອງຄະນະຜູ້ແທນຂັ້ນສູງຂອງສອງປະເທດຢ່າງເປັນປົກກະຕິພ້ອມກັນນີ້, ສປປ ລາວ ຍັງໄດ້ສະແດງການສະໜັບສະ ໜູນຢ່າງເຕັມປ່ຽມຕໍ່ເນື້ອໃນບົດປາໄສຂອງທ່ານປະທານປະເທດ ສີ ຈິ້ນຜິງ ທີ່ໄດ້ກ່າວຜ່ານກອງປະຊຸມທາງໄກໃນໂອກາດວັນສ້າງຕັ້ງ ສປຊ ຄົບຮອບ 75 ປີ ໂດຍສະ ເພາະແມ່ນຄຳເຫັນທີ່ສຳຄັນໃນ 6 ຈຸດໃຫຍ່ຄື: 1.)

   ການເປັນຄູ່ຮ່ວມຊະຕາກໍາຂອງມວນມະນຸດ; 2.) ການຮ່ວມມືຕ່າງຝ່າຍຕ່າງມີຜົນປະໂຫຍດ; 3.) ການສົ່ງເສີມການຄ້າຫຼາຍຝ່າຍ; 4.) ແນວຄິດການພັດທະນາແບບໃໝ່; 5.) ການຮ່ວມມືໃນຂອບຫຼາຍຝ່າຍ; ແລະ 6.) ການສະໜັບສະໜູນຄວາມເປັນແກນກາງຂອງສະຫະປະຊາຊາດ ແລະອື່ນໆ.

   ພ້ອມນັ້ນ, ສອງຝ່າຍຍັງໄດ້ເຫັນດີເປັນເອກະພາບຕໍ່ການຕີລາຄາການຮ່ວມມືສອງຝ່າຍກໍຄືລະຫວ່າງສອງກະຊວງການຕ່າງປະເທດໄດ້ສະແດງການສະໜັບສະໜູນນະໂຍບາຍ “ໜຶ່ງແລວໜຶ່ງເສັ້ນທາງ” ຂອງ ສປ ຈີນ, ຊຶ່ງຈະນໍາຜົນປະໂຫຍດອັນໃຫຍ່ຫຼວງມາໃຫ້ແກ່ບັນດາປະເທດຕ່າງໆທີ່ເຂົ້າຮ່ວມໂດຍສະເພາະສຳລັບ ສປປ ລາວ ແມ່ນໄດ້ໃຫ້ຄວາມສຳຄັນ ແລະເຂົ້າຮ່ວມຢ່າງຕັ້ງໜ້າໂດຍໄດ້ເຊື່ອມໂຍງລະຫວ່າງຍຸດທະສາດ “ການຫັນປະເທດບໍ່ມີຊາຍແດນຕິດກັບທະເລເປັນປະເທດເຊື່ອມໂຍງເຊື່ອມ ຈອດ” ຂອງ ສປປ ລາວ ເຂົ້າກັບຍຸດທະສາດ “ໜຶ່ງແລວ ໜຶ່ງເສັ້ນທາງ” ຂອງ ສປ ຈີນ, ໂດຍຖືເອົາການກໍ່ສ້າງທາງລົດໄຟ ລາວ-ຈີນ ແລະທາງດ່ວນວຽງຈັນ-ວັງວຽງ, ວັງວຽງ-ຫຼວງພະບາງ,ຫຼວງພະບາງ-ອຸດົມໄຊ ໄປຈົນຮອດຊາຍແດນ ລາວ-ຈີນ ດ່ານບໍ່ເຕັນ-ບໍ່ຫານເປັນໜຶ່ງໃນການເຊື່ອມໂຍງຍຸດທະສາດອັນສຳຄັນຂອງສອງປະເທດ ແລະຖືເປັນສອງເສັ້ນທາງທີ່ສຳຄັນໃນການປະຕິບັດແລວເສດຖະກິດ ລາວ-ຈີນ, ຈີນ-ລາວ, ນອກນັ້ນຍັງມີໂຄງການຮ່ວມມືອື່ນໆທີ່ສໍາຄັນເຊັ່ນ: ໂຄງການກໍ່ສ້າງໂຮງໝໍມະໂຫສົດຫຼັງໃໝ່, ໂຄງການແລວທາງເສດຖະກິດ ລາວ-ຈີນ ແລະໂຄງການສ້າງສູນກວດພະຍາດໂຄວິດ-19 ໃຫ້ແກ່ກະຊວງສາທາລະນະສຸກ.

  ນອກນັ້ນຍັງເຫັນດີໃນດ້ານຫຼັກການໃຫ້ເປີດນຳໃຊ້ຊ່ອງທາງສີຂຽວເພື່ອອຳນວຍຄວາມສະດວກໃຫ້ແກ່ລົດບັນທຸກສິນຄ້າຜ່ານແດນ ລາວ-ຈີນ, ຈີນ-ລາວ ຢູ່ດ່ານສາກົນບໍ່ເຕັນ-ບໍ່ຫານ, ແຂວງຫຼວງນໍ້າທາໃຫ້ມີຄວາມວ່ອງໄວຂຶ້ນ ແລະຍັງໄດ້ປຶກສາຫາລືກ່ຽວກັບທິດທາງແຜນການຮ່ວມມືໃນຕໍ່ໜ້າໂດຍສະເພາະແມ່ນການສະເໜີແຜນການສະເຫຼີມສະຫຼອງວັນສ້າງຕັ້ງສາຍພົວພັນການທູດລາວ- ຈີນ, ຈີນລາວຄົບຮອບ 60 ປີ ແລະປີ ມິດຕະພາບ ລາວ-ຈີນ ໃນປີ2021, ພ້ອມທັງປຶກສາຫາລືກ່ຽວກັບການສືບຕໍ່ຮ່ວມມືກັນຢ່າງໃກ້ຊິດ ແລະຊ່ວຍເຫຼືອເຊິ່ງກັນ ແລະກັນໃນການປ້ອງກັນ, ຄວບຄຸມ ແລະແກ້ໄຂການແຜ່ລະບາດຂອງພະຍາດໂຄວິດ-19 ເພື່ອປ້ອງກັນບໍ່ໃຫ້ກັບມາລະບາດອີກຮອບໃໝ່ພາຍຫຼັງສຳເລັດການພົບປະສອງຝ່າຍໄດ້ມີການແລກປ່ຽນໂຄງການຊ່ວຍເຫຼືອລ້າ 3 ສະບັບ ຄື: ໂຄງການຊ່ວຍເຫຼືອລ້າກ່ຽວກັບອຸປະກອນຕ້ານໄຂ້ເລືອດອອກ,ໂຄງການພື້ນຖານໂຄງລ່າງການພັດທະນາຊົນນະບົດໄລຍະ 2; ແລະໂຄງການແລກປ່ຽນລະຫວ່າງລັດຖະບານແຫ່ງ ສປປ ລາວ ແລະລັດຖະບານແຫ່ງ ສປ ຈີນ ກ່ຽວກັບການຮັບເອົາສິດພິເສດທາງດ້ານພາສີ 0% ໃຫ້ແກ່ 97% ຂອງລາຍການສິນຄ້າທັງໝົດ (GSP 97%).

แชร์