ພັດຕະຄານເຊິນຈືເຕີ ເລີ່ມເປີດໃຫ້ບໍລິການ

  ພັດຕະຄານເຊິນຈືເຕີ ພາຍຫຼັງທີ່ໄດ້ຮັບໃບອະນຸຍາດປຸກສ້າງ ແລະໃບອະນຸຍາດດໍາເນີນທຸລະກິດຈາກພາກສ່ວນທີ່ກ່ຽວຂ້ອງຂອງລັດ ແລະໄດ້ດໍາເນີນການກໍ່ສ້າງມາເປັນເວລາເກືອບ 2 ປີ, ມາໃນວັນທີ 10 ຕຸລາ 2020 ໄດ້ຈັດພິທີເປີດໃຫ້ບໍລິການຢ່າງເປັນທາງການໂດຍມີ ທ່ານ ຄໍາໄຫຼ ສີປະເສີດ ເລຂາຄະນະບໍລິຫານງານພັກແຂວງ, ພ້ອມດ້ວຍແຂກການນໍາຂອງແຂວງ-ການນໍາເມືອງ, ອໍານວຍການບໍລິສັດ, ລັດວິສາຫະກິດ, ນັກທຸລະກິດເຂົ້າຮ່ວມ.

  ທ່ານ ຄໍາເຫຼັກ ເຊິນຈືເຕີ ຜູ້ອໍານວຍການບໍລິສັດເຊິນຈືເຕີ ແລະການບໍລິການ ຈໍາກັດ ກ່າວວ່າ: ພັດຕະຄານເຊິນຈືເຕີຕັ້ງຢູ່ບ້ານໜອງບົວວຽງເຂດຄີວລົດພາຍໃນເມືອງຫຼວງນໍ້າທາ ມີເນື້ອທີ່ 2 ເຮັກຕາກວ່າ. ເປັນພັດຕະຄານທີ່ກ້ວາງຂວາງອໍານວຍຄວາມສະດວກສະບາຍ ຫຼາຍດ້ານ, ປະກອບມີຫ້ອງໂຖງ 1 ຫ້ອງ, ຫ້ອງຮັບແຂກພິເສດ 1 ຫ້ອງ, ຫ້ອງການ 1 ຫ້ອງ, ຫ້ອງປ່ຽນເຄື່ອງ 1 ຫ້ອງ, ສາງໄວ້ເຄື່ອງ 5 ຫ້ອງ, ເຮືອນຄົວ 1 ຫຼັງ ແລະຫ້ອງນໍ້າ 18 ຫ້ອງ ລວມມູນຄ່າການກໍ່ສ້າງ 11,8 ຕື້ກີບ, ມີເດີ່ນຈອດລົດກວ້າງຂວາງສາມາດຈອດລົດໄດ້ 300 ກວ່າຄັນ, ສາມາດຮອງຮັບງານລ້ຽງໄດ້ 200 ກວ່າໂຕະ, ຮອງຮັບແຂກໄດ້ 2.000 ກວ່າທ່ານ, ເປົ້າໝາຍຂອງການບໍລິການຮັບຈັດງານດອງ, ງານລ້ຽງ, ງານສ້າງສັນຂະໜາດນ້ອຍ, ຂະໜາດກາງ, ຂະໜາດໃຫຍ່, ງານປະຊຸມ,ສໍາມະນາ ແລະຍັງເປີດບໍລິການຮ້ານອາຫານເປັນປະຈໍາຕື່ມອີກ.

   ທ່ານ ຫຼ້າປະເສີດ ສີປະເສີດ ເຈົ້າເມືອງໆຫຼວງນໍ້າທາ ກ່າວວ່າ: ພັດຕະຄານເຊິນຈືເຕີແມ່ນພັດທະຄານໃຫຍ່, ໄດ້ມາດຕະຖານທີ່ດີ, ເພື່ອຮອງຮັບການບໍລິການຮັບໃຊ້ສັງຄົມ, ນອກຈາກການສ້າງພັດຕະຄານແລ້ວທາງບໍລິສັດເຊິນຈືເຕີ ແລະການບໍລິການຈໍາກັດຍັງໄດ້ສ້າງກິດຈະການຕ່າງໆຢູ່ພາຍໃນແຂວງ ແລະຕ່າງແຂວງເຊັ່ນ: ສ້າງການບໍລິການຄີວລົດພາຍໃນແຂວງ, ໂຮງແຮມ ແລະ ຄີວລົດເມືອງສິງ, ໂຮງຮຽນລາວ-ຈີນ ເຊິນຈືເຕີເມືອງຫ້ວຍຊາຍ, ແຂວງບໍ່ແກ້ວ ແລະກິດຈະການອື່ນໆ ຜ່ານຜົນງານດັ່ງກ່າວໃນປີ 2019 ບໍລິສັດເຊິນຈືເຕີ ແລະ ການບໍລິການຈໍາກັດໄດ້ຮັບລາງວັນຜູ້ປະກອບການນັກທຸລະກິດດີເດັ່ນຂອງ ສປປ ລາວ, ໂອກາດນີ້ທ່ານກໍ່ໄດ້ສະແດງຄວາມຍ້ອງຍໍຊົມເຊີຍ ແລະອວຍພອນໃຫ້ບໍລິສັດປະສົບຜົນສໍາເລັດໃນການດໍາເນີນທຸລະກິດຂອງຕົນ.

-----------------

ຂ່າວ: ມຸນຕີ, ຮູບພາບ: #ຫນັງສືພິມເສດຖະກິດສັງຄົມ

 

แชร์