ກຸ່ມຫັດຖະກຳຈັກສານໄມ້ປ່ອງບ້ານນາຍົມຖືກຮັບຮອງເປັນສິນຄ້າໂອດັອບ

  ບ້ານນາຍົມເມືອງສົບເບົາແຂວງຫົວພັນ ແຕ່ກ່ອນຕັ້ງຢູ່ຫ້ວຍໄຫວຫ່າງຈາກທາງລົດເຂົ້າໄປເຖິງປະມານ 3 ກິໂລແມັດເຫັນວ່າພົບຄວາມຫຍຸ້ງຍາກ, ໃນການແລກປ່ຽນຊື້-ຂາຍສິນຄ້າ ມີຫຼາຍຄອບຄົວເປັນຄອບຄົວທຸກຍາກຍ້ອນບໍ່ມີເງື່ອນໄຂພັດທະນາດ້ວຍຄວາມເປັນຫ່ວງເປັນໄຍຂອງພັກ-ລັດ ຈຶ່ງໄດ້ມີແຜນຈັດສັນຍົກຍ້າຍບ້ານມາຕັ້ງຢູ່ລຽບເສັ້ນທາງເລກ6A ໃນປະຈຸບັນຊຶ່ງຫ່າງໄກຈາກເທສະບານເມືອງສົບເບົາມາທາງທິດຕາເວັນອອກ 29 ກິໂລແມັດ ບ້ານນາຍົມ ເປັນບ້ານຊົນເຜົ່າກຶມມຸມີ 86 ຫຼັງຄາເຮືອນ ມີ 128 ຄອບຄົວນັບຖືສາສະໜາຜີ, ປະຊາຊົນມີຄວາມດຸໝັ່ນໃນການອອກແຮງງານຍຶດຖືການເຮັດນາເປັນອາຊີບຕົ້ນຕໍ, ເອົາຫັດຖະກໍາຈັກສານແອບເຂົ້າເປັນອາຊີບສໍາຮອງການດໍາລົງຊີວິດຂອງປະຊາຊົນບ້ານນາຍົມໃນສະໄໝກ່ອນແມ່ນມີຄວາມຫຍຸ້ງຍາກລໍາບາກມີແຕ່ອີງໃສ່ແຕ່ທໍາມະຊາດ, ຂາດເຂີນເຄື່ອງໃຊ້ຂອງສ້ອຍຕ່າງໆໃນຄອບຄົວ.

   ເມື່ອເຫັນສະພາບເປັນແນວນັ້ນຈຶ່ງໄດ້ລິເລີ່ມມີຫົວຄິດປະດິດສ້າງໂດຍນຳເອົາໄມ້ປ່ອງມາຈັກເປັນເສັ້ນຕອກສານເປັນແອບເຂົ້າເພື່ອມາຮັບໃຊ້ພາຍໃນຄອບຄົວເທົ່ານັ້ນ, ມາຮອດປີ 2010 ໂຄງການພັດທະນາໄມ້ປ່ອງໄດ້ເຂົ້າມາຊ່ວຍພັດທະນາສີໄມ້ລາຍມືໃນການສານແອບເຂົ້າໃຫ້ມີຄຸນນະພາບສູງຂຶ້ນນອກຈາກນີ້ຍັງມີການສານກະຕີບ, ກະບຸງ, ກະດົງ ແລະອື່ນໆ ດັ່ງນັ້ນຈຶ່ງໄດ້ມີການຈັດຕັ້ງເປັນກຸ່ມການຜະລິດຂຶ້ນເພື່ອໃຫ້ມີຜູ້ປົກຄອງໃນການຕໍ່ລອງລາຄາກັບພໍ່ຄ້າແມ່ຄ້າ ແລະ ຝຶກອົບຮົມວິທີການສານຜະລິດຕະພັນໃຫ້ມີຫຼາຍຮູບຫຼາຍແບບ, ຫຼາຍຂະໜາດ ແລະມີສີສັນ, ແນະນໍາວິທີການເກັບຮັກສາ, ວິທີປ້ອງກັນບໍ່ໃຫ້ເປັນມອດ, ຝຶກແອບວິທີການສານຜະລິດຕະພັນແບບໃໝ່ເຊັ່ນ: ທີ່ມີລວດລາຍເປັນຕົວໜັງສື, ສານໂອຕັກບາດ, ກະຕ່າຫີ້ວ ແລະອື່ນໆ ໃຫ້ມີຄຸນນະພາບລາຄາທີ່ເໝາະສົມ ແລະເປັນສິ່ງຍ້ອມຮັບຂອງສັງຄົມທົ່ວໄປໂດຍຕອບສະໜອງຕາມຄວາມຕ້ອງການຂອງທ້ອງຕະຫຼາດຜະລິດຕະພັນໄມ້ປ່ອງຊະນິດຕ່າງໆ ແມ່ນມີທ່າກ້າວຂະຫຍາຍຕົວດີຂຶ້ນຈາກການຜະລິດຈໍານວນໜ້ອຍເພື່ອຊົມໃຊ້ພາຍໃນຄອບຄົວແລ້ວຍັງຫັນຜະລິດແລກປ່ຽນເປັນສິນຄ້າເປັນຈໍານວນຫຼວງຫຼາຍກາຍເປັນສິນຄ້າທີ່ຜະລິດອອກມາໄດ້ຂາຍດີມີລາຍຮັບເພີ່ມຂຶ້ນສາມາດແກ້ໄຂຊີວິດການເປັນຢູ່ຂອງປະຊົນໄດ້ເທື່ອລະກ້າວ, ການສານແອບເຂົ້າຂອງປະຊາຊົນມີ 3 ລວດລາຍ ແຕ່ນິຍົມໃຊ້ຫຼາຍກວ່າໝູ່ແມ່ນສານລາຍຂ້າມສອງເດີມປະຊາຊົນພາຍໃນບ້ານທັງຍິງ ແລະຊາຍໄດ້ມີຄວາມສະຫງວນຮູ້ສານແອບເຂົ້ານັບແຕ່ອາຍຸ 7 ປີຂຶ້ນໄປ 1 ປີສະເລ່ຍ ຜະລິດໄດ້ 14, 662 ໜ່ວຍ ຂາຍເປັນເງິນໃນລາຄາໜ່ວຍລະ 20 ພັນຫາ 35 ພັນກີບ ຕໍ່ໜ່ວຍປີໜຶ່ງສາມາດມີລາຍຮັບຈາກການຂາຍແອບເຂົ້າໄດ້ເກືອບ 3 ຮ້ອຍລ້ານກວ່າກີບຕໍ່ປີ. 

  ດັ່ງນັ້ນ, ມາໃນວັນທີ 9 ຕຸລາ 2020 ນີ້ ພະແນກອຸດສາຫະກໍາ ແລະການຄ້າແຂວງສົບທົບກັບເມືອງສົບເບົາຈັດພິທີເປີດປ້າຍກາໝາຍໂອດັອບໜຶ່ງເມືອງໜຶ່ງຜະລິດ ຕະພັນແຫ່ງຊາດໃຫ້ປະຊາຊົນບ້ານນາຍົມຂຶ້ນທີ່ໂຮງຮຽນປະຖົມບ້ານຂອງຕົນໂດຍການເປັນປະທານຂອງທ່ານ ວັນແສງ ຄໍາມັງໄຊ ຫົວໜ້າພະແນກອຸດສາຫະກໍາ ແລະການຄ້າແຂວງຫົວພັນມີທ່ານ ຄໍາລ້ຽນ ເພັດສີທອນ ຮອງເຈົ້າເມືອງເມືອງສົບເບົາ,ມີພາກສ່ວນທີ່ກ່ຽວຂ້ອງມາຈາກພະແນກການອ້ອມຂ້າງແຂວງເມືອງສົບເບົາ, ອໍານາດການປົກຄອງພໍ່ແມ່ປະຊາຊົນພາຍໃນບ້ານເຂົ້າຮ່ວມຢ່າງພ້ອມພຽງ.

----------------

ຂ່າວ: ນິດຖະໜອມ

ຮູບພາບ: #ຫນັງສືພິມເສດຖະກິດສັງຄົມ

แชร์