ໄຊຍະປະຕິບັດໄດ້ 185 ໂຄງການມູນຄ່າ 23,3 ຕື້ກີບ

   ທ່ານ ນາງ ຄໍາມີ ປິ່ນທີບ ຫົວໜ້າພະແນກແຜນການ ແລະການລົງທຶນ ແຂວງໄຊຍະບູລີ ໄດ້ລາຍງານຕໍ່ກອງປະຊຸມອົງການປົກຄອງແຂວງປະຈໍາ 9 ເດືອນຜ່ານມານີ້ວ່າ: ໃນປີ 2020 ສະພາແຫ່ງຊາດ ແລະສະພາປະຊາຊົນ ແຂວງໄຊຍະບູລີ ໄດ້ຮັບຮອງອະນຸມັດໂຄງການລົງທຶນຂອງລັດທັງໝົດ 362 ໂຄງການ, ເປັນທຶນ 34,1 ຕື້ກີບ,ຜ່ານການຈັດຕັ້ງປະຕິບັດໃນໄລຍະ 9 ເດືອນ ຕົ້ນປີ 2020 ຜ່ານມາສາມາດປະຕິບັດໄດ້ 185 ໂຄງການ,ເທົ່າກັບ 51,10%, ມູນຄ່າ 23,3 ຕື້ກີບ, ໃນນັ້ນ: ທຶນປົກກະຕິປະຕິບັດໄດ້ 132 ໂຄງການ, ມູນຄ່າ 16,19 ຕື້ກີບ, ທຶນພັດທະນາເມືອງໄຊສະຖານ 27 ໂຄງການ, ມູນຄ່າ 4,26 ຕື້ກີບ, ທຶນຈັດສັນພູມລໍາເນົາ ແລະບ່ອນທໍາມາຫາກິນຖາວອນ 10 ໂຄງການ, ມູນຄ່າ 1,3 ຕື້ກີບ,ທຶນພັດທະນາຊົນນະບົດ ແລະລືບລ້າງຄວາມທຸກຍາກປະຕິບັດໄດ້ 16 ໂຄງການ, ມູນຄ່າ 1,5 ຕື້ກີບ, ສໍາລັບທຶນຊ່ວຍເຫຼືອລ້າ ແລະທຶນກູ້ຢືມມີທັງໝົດ 32 ໂຄງການ,ມູນຄ່າ 31,17 ລ້ານກວ່າໂດລາ,ງົບປະມານປີ 2020 ໄດ້ຮັບທຶນ 17,97 ລ້ານກວ່າໂດລາ, ສາມາດປະຕິບັດໄດ້ 29 ໂຄງການ, ມູນຄ່າ 15,66 ລ້ານກວ່າໂດລາ, ເທົ່າກັບ 87%, ການລົງທຶນເອກະຊົນພາຍໃນ ແລະຕ່າງປະເທດທີ່ໄດ້ອະນຸມັດທັງໝົດ 8 ໂຄງການໃນນີ້ທຶນພາຍ ໃນ 3 ໂຄງການ, ມູນຄ່າ 10,34 ລ້ານກວ່າໂດລາສະຫະລັດ, ທຽບໃສ່ແຜນປີປະຕິບັດໄດ້ 33,3%, ສະເພາະໂຄງການລົງທຶນຂອງເອກະຊົນ ແຂວງໄຊຍະບູລີ ແມ່ນໄດ້ປະຕິບັດນະໂຍບາຍສົ່ງເສີມຕາມລະບຽບກົດໝາຍເປັນຕົ້ນໃຫ້ນະໂຍບາຍຍົກເວັ້ນພາສີນໍາເຂົ້າວັດສະດຸ, ອຸປະກອນ,ເຄື່ອງຈັກ,ແນວພັນສັດ,ຫົວອາຫານ, ຝຸ່ນປຸ໋ຍ ແລະອື່ນໆ.

    ທ່ານ ນາງ ຄໍາມີ ປິ່ນທີບຍັງໄດ້ກ່າວຕື່ມອີກວ່າ: ອີກ 3 ເດືອນທ້າຍປີນີ້ແມ່ນຈະໄດ້ຄຸ້ມຄອງບັນດາໂຄງການລົງທຶນທີ່ພວມຈັດຕັ້ງປະຕິບັດໃຫ້ຖືກຕ້ອງຕາມລະບຽກົດ ໝາຍ, ຊຸກຍູ້ການຈັດຕັ້ງປະຕິບັດໂຄງການໃຫ້ມີຄວາມຄືບໜ້າ, ຄາດຄະເນການລົງທຶນໃນ 3 ເດືອນທ້າຍປີປະຕິບັດກິດຈະກໍາສໍາປະທານທັງໝົດ 4 ໂຄງການ, ມູນຄ່າ 1,01 ລ້ານກວ່າໂດລາ, ໃນນັ້ນ: ການລົງທຶນຕ່າງປະເທດ 1 ໂຄງການ, ມູນຄ່າ 2 ແສນໂດລາ, ການລົງທຶນ ພາຍໃນ 3 ໂຄງການ, ມູນຄ່າ 8 ແສນກວ່າໂດລາ, ໃນຈໍານວນດັ່ງກ່າວແມ່ນໄດ້ລົງທຶນເຂົ້າຂະແໜງບໍ່ແຮ່ 3 ໂຄງການ ແລະຂະແໜງບໍລິການ 1 ໂຄງການ.

-------------

ຂ່າວ: ອຸ່ນເຮືອນ ໂພທິລັກ

ຮູບພາບ: #ຫນັງສືພິມເສດຖະກິດສັງຄົມ

แชร์