ທພລ ແລະກຸງສີ ຈັບມືຮ່ວມບໍລິການໂອນເງິນຂ້າມປະເທດ

    ທະນາຄານພັດທະນາລາວ(ທພລ) ແລະ ທະນາຄານກຸງສີອະຍຸດທະຍາ ມະຫາຊົນ ຈໍາກັດ ຮ່ວມກັນຈັດພິທີເປີດໂຕຢ່າງເປັນທາງການຜ່ານລະບົບປະຊຸມທາງໄກ  (Virtual conference) “ການໃຫ້ບໍລິການລະບົບໂອນເງິນລະຫວ່າງປະເທດແບບ Real Time”ຂຶ້ນໃນວັນທີ 12 ຕຸລາ 2020 ທີ່ໂຮງແຮມຄຣາວພລາຊາ ນະ ຄອນຫຼວງວຽງຈັນ ໂດຍການໃຫ້ກຽດເຂົ້າຮ່ວມຂອງທ່ານ ພຸດທະໄຊ ສີວິໄລ ຮອງຜູ້ວ່າການທະນາຄານແຫ່ງ ສປປ ລາວ, ປະທານສະພາບໍລິຫານ ທພລ; ທ່ານອາຄົມ ປຣະເສີດ ຜູ້ອຳນວຍການ ທພລ ພ້ອມຄະນະ; ສຳລັບຝ່າຍໄທແມ່ນຈັດຂຶ້ນທີ່ບາງກອກປະເທດໄທໂດຍການໃຫ້ກຽດເຂົ້າຮ່ວມຂອງ ທ່ານ ນາງ ບຸດສະກອນ ທິລາປັນຍາໄຊ ຜູ້ອໍານວຍການອາວຸໂສຝ່າຍນະໂຍບາຍລະບົບການຊໍາລະເງິນ, ທະນາຄານແຫ່ງປະເທດໄທ; ທ່ານ ແດນ ຮາໂຊໂນ ຄະນະກໍາມະທິການຜູ້ບໍລິຫານທະນາຄານກຣຸງ ສີອາຍຸດທະຍາ ມະຫາຊົນ ຈໍາກັດ ປະເທດໄທພ້ອມຄະນະ.

 ການຮ່ວມມືກັນຄັ້ງນີ້,ກໍ່ເພື່ອເປັນສືບຕໍ່ພັດທະນາດ້ານການບໍລິການຫັນໄປສູ່ທັນສະໄໝຕອບສະໜອງແກ່ສັງຄົມ, ທພລໄດ້ເລີ່ມຕົ້ນສ້າງສາຍສໍາພັນ ແລະຮ່ວມມືກັບທະ ນາຄານກຣຸງສີເຊິ່ງເປັນທະນາຄານໃຫຍ່ອັນດັບຕົ້ນໆຂອງປະເທດໄທ ແລະ ກໍ່ມີສາຂາຕັ້ງຢູ່ນະຄອນຫຼວງວຽງຈັນ, ມີການພັດທະນາ ແລະ ສະໜອງການບໍລິການທີ່ມີຄວາມຫຼາກຫຼາຍ ແລະທັນສະໄໝມີຄວາມພ້ອມໃນການເຊື່ອມໂຍງໃນລະດັບສາກົນ.

   ໃນປີ 2019 ທັງ 2 ພາກສ່ວນໄດ້ມີການປຶກສາຫາລືກັນກ່ຽວກັບຄວາມເປັນໄປໄດ້ໃນການຮ່ວມມືລະຫວ່າງ 2 ຝ່າຍ ເພື່ອສະໜອງການບໍລິການໃຫ້ແກ່ລູກຄ້າທັງ 2 ທະນາຄານ. ຜ່ານການປຶກສາຫາລືເຖິງຈະເປັນໄລຍະເວລາອັນສັ້ນແຕ່ທັງ 2 ຝ່າຍໄດ້ມີການຕົກລົງໃຫ້ມີການເຊື່ອມໂຍງລະບົບການຊໍາລະສະສາງລະຫວ່າງປະເທດຮ່ວມກັນ, ເພື່ອອໍານວຍຄວາມສະດວກໃຫ້ແກ່ລູກຄ້າທີ່ເປັນນິຕິບຸກຄົນ ແລະບຸກຄົນສາມາດດໍາເນີນທຸລະກໍາການໂອນເງິນຊໍາລະສະສາງລະຫວ່າງປະເທດ (ລາວ ແລະໄທ) ໄດ້ຢ່າງວ່ອງໄວ,ສະດວກສະບາຍ ແລະມີຄ່າທໍານຽມຕໍ່າເປັນການສ້າງເງື່ອນໄຂໃຫ້ຜູ້ປະກອບການຫຼຸດຕົ້ນທຶນໃນການດໍາເນີນທຸລະກໍາທາງດ້ານການເງິນຖືເປັນການຊຸກຍູ້ບັນດາຂະແໜງການທຸລະກິດພາຍໃນປະເທດເຊິ່ງກໍ່ເປັນອີກຮູບແບບໜຶ່ງໃນການປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງຊາດ ແລະສໍາລັບຜູ້ໃຊ້ແຮງງານກໍ່ຈະສາມາດໂອນເງິນກັບບ້ານດ້ວຍຄ່າທໍານຽມທີ່ຕໍ່າເຊິ່ງຈະເຮັດໃຫ້ທຸລະກໍາການໂອນເງິນເຂົ້າ-ອອກຜ່ານລະບົບທະນາຄານເພີ່ມຂຶ້ນ, ຖືເປັນການກະຕຸ້ນເສດ ຖະກິດເຊັ່ນກັນ.

  ໂຄງການດັ່ງກ່າວນີ້ໄດ້ຈັດຕັ້ງປະຕິບັດນັບແຕ່ເດືອນກຸມພາ 2020 ມາຮອດປະຈຸບັນແມ່ນມີຄວາມພ້ອມທີ່ຈະສະໜອງການບໍລິການໃຫ້ແກ່ລູກຄ້າຂອງທັງ 2 ທະນາ ຄານຊຶ່ງໂຄງການໄລຍະທໍາອິດນີ້ລູກຄ້າຈະສາມາດໂອນເງິນຈາກລາວຫາໄທຜ່ານປ່ອງບໍລິການຂອງ ທພລ ທົ່ວປະເທດ, ໄລຍະຕໍ່ໄປຈະກ້າວໄປສູ່ການໂອນເງິນໂດຍຜ່ານ Mobile Banking ແລະInternet Banking ຂອງ ທພລ ແລະກ້າວໄປສູ່ການເຊື່ອມໂຍງການບໍລິການຜ່ານຕູ້ ATM,ເຄື່ອງຮູດບັດ EDC ແລະ QR Code ຮ່ວມກັນ. ພິເສດນັບແຕ່ເດືອນຕຸລາ ເຖິງເດືອນທັນວາ ປີ 2020 ນີ້; ທະນາຄານໄດ້ມີໂປຣໂມຊັນສໍາລັບລູກຄ້າທີ່ເຂົ້າມາໃຊ້ບໍລິການດັ່ງກ່າວຄື: ຍົກເວັ້ນຄ່າທໍານຽມການໂອນເງິນຈາກໄທມາລາວ ແລະເກັບຄ່າທໍານຽມພຽງ 50% ສໍາລັບລູກຄ້າທີ່ໂອນເງິນຈາກລາວໄປໄທ.

   ໃນພິທີສຳຄັນນີ້, ບັນດາຄະນະນຳຈາກ 2 ທະນາຄານກາງ ແລະຄູ່ທະນາຄານທຸລະກິດ ໄດ້ພັດປ່ຽນກັນມີຄຳເຫັນໂດຍໄດ້ສ່ອງແສງໃຫ້ເຫັນວ່າ: ການເຮັດທຸລະກິດສ່ວນໃຫຍ່ແມ່ນເຊື່ອມຕໍ່ເຂົ້າເທິງລະບົບອອນລາຍທັງໃນພາກພື້ນແລະທົ່ວໂລກ. ດ້ວຍເຫດນີ້, ການດໍາເນີນທຸລະກໍາການຊໍາລະສະສາງໃນລະບົບທະນາຄານກໍ່ຄົງຈະບໍ່ຢູ່ພຽງແຕ່ພາຍໃນປະເທດເທົ່ານັ້ນແຕ່ກໍ່ສາມາດສ້າງກົນໄກທີ່ອໍານວຍຄວາມສະດວກໃຫ້ແກ່ການພັດທະນາເສດຖະກິດ-ສັງຄົມ, ບັນດາຫົວໜ່ວຍທຸລະກິດລວມເຖິງທະນາຄານທີ່ເປັນສື່ກາງທາງການເງິນຈຶ່ງມີຄວາມຈໍາເປັນໃນການປັບໂຕ ແລະ ພັດທະນາເຄື່ອງມືທີ່ທັນສະໄໝທີ່ສາມາດຮອງຮັບໄດ້ທັນກັບສະພາບການ ແລະ ກໍ່ເປັນການຮ່ວມມືກັນລະຫວ່າງ 2 ທະນາຄານດັ່ງກ່າວທີ່ເປັນນິມິດໝາຍທີ່ດີທີ່ໃຫ້ປະໂຫຍດແກ່ປະຊາຊົນທັງ 2 ຊາດ ກໍ່ຄືປະກອບສ່ວນເຂົ້າໃນການພັດທະນາຂະແໜງການທະ ນາຄານຂອງ ສປປ ລາວ ແລະໄທນຳອີກ.

----------------

ຂ່າວ: ຣັດສະໝີ ດວງສັດຈະ

ຮູບພາບ: #ຫນັງສືພິມເສດຖະກິດສັງຄົມ

แชร์