ຫຼວງນໍ້າທາສືບຕໍ່ເອົາໃຈໃສ່ວຽກປ້ອງກັນໂຄວິດ

  ກອງປະຊຸມຄະນະສະເພາະ ກິດເພື່ອປ້ອງກັນ, ຄວບຄຸມ ແລະແກ້ໄຂການລະບາດເຊື້ອພະຍາດໂຄວິດ-19 ແຂວງຫຼວງນໍ້າທາ ໄດ້ຈັດຂຶ້ນວັນທີ 9 ຕຸລາ 2020 ທີ່ຫ້ອງວ່າການແຂວງໂດຍການເປັນປະທານຂອງທ່ານ ຄໍາຟອງ ອິນມະນີຮອງເລຂາພັກແຂວງ, ຜູ້ຊີ້ນໍາຂົງເຂດວັດທະນະທໍາ-ສັງຄົມ, ມີຄະນະສະເພາະກິດຂັ້ນແຂວງ, ກອງເລຂາ ແລະຄະນະຮັບຜິດຊອບທີ່ກ່ຽວຂ້ອງເຂົ້າຮ່ວມ.

  ທ່ານ ດຣ ຫຍຸ້ງ ລໍຄໍາ ກອງເລຂາຄະນະສະເພາະກິດເພື່ອປ້ອງກັນ, ຄວບຄຸມ ແລະແກ້ໄຂການລະບາດເຊື້ອພະຍາດໂຄວິດ-19 ຂັ້ນແຂວງໄດ້ສະຫຼຸບການຈັດຕັ້ງປະຕິ ບັດວຽກງານປ້ອງກັນພະຍາດໂຄວິດ-19 ຢູ່ພາຍໃນແຂວງໃນໄລຍະຜ່ານມາເປັນຕົ້ນແມ່ນການຕັ້ງດ່ານກວດກາຄົນເຂົ້າ-ອອກເມືອງແມ່ນຍັງສືບຕໍ່ປະຕິບັດເປັນປົກກະຕິ ຊຶ່ງໄດ້ຕັ້ງດ່ານກວດກາຢູ່ 2 ຈຸດຄື: ຈຸດຊຽງກົກເມືອງລອງ ແລະຈຸດກວດການໍ້າ ຈິລິ-ປາງຊາຍເມືອງວຽງພູຄາ,ຊຶ່ງແຕ່ລະຈຸດປະກອບມີເຈົ້າໜ້າທີ່ປກສ,ທະຫານ ແລະແພດປະຈໍາຢູ່, ຄະນະສະເພາະກິດເພື່ອກວດກາຄົນຕ່າງປະເທດແມ່ນໄດ້ລົງເຄື່ອນໄຫວກວດກາບັນດາເຮືອນພັກ, ໂຮງແຮມ, ບໍລິສັດ, ຫ້າງຮ້ານຕ່າງໆໄດ້ຈໍານວນ 38 ຫົວໜ່ວຍ ແລະ 4 ສູນກັກກັນສະເພາະຄົນຕ່າງປະເທດ, ພົບຄົນຕ່າງປະເທດທີ່ລັກລອບເຂົ້າເມືອງແບບຜິດກົດໝາຍຈໍານວນ 10 ຄົນໄດ້ນໍາສົ່ງຜູ້ກ່ຽວໃຫ້ແກ່ເຈົ້າໜ້າ ທີ່ກ່ຽວຂ້ອງເກັບຕົວຢ່າງ, ດໍາເນີນຄະດີແລ້ວນຳສົ່ງໃຫ້ແກ່ເຈົ້າໜ້າທີ່ປະເທດກ່ຽວຂ້ອງເພື່ອສົ່ງກັບຄືນປະເທດ,ລົງຕິດຕາມ,ກວດກາຮ້ານບັນເທີງ,ຮ້ານຄາຣາໂອເກະຕາມແຈ້ງການຂອງຂັ້ນເທິງເປັນປົກກະຕິພ້ອມທັງເຮັດບົດບັນທຶກກັບເຈົ້າຂອງກິດຈະການທີ່ຍັງມີການລະເມີດຕໍ່ມາດຕະການປ້ອງກັນພະຍາດໂຄວິດ-19,ຕິດຕາມ,ກວດກາບັນດາບໍລິສັດທີ່ສະເໜີນໍາແຮງງານຈາກຕ່າງປະເທດເຂົ້າມາປະຕິບັດວຽກງານຢູ່ແຂວງຫຼວງນໍ້າທາ ແລະ ແຂວງອື່ນໆ ໂດຍອີງໃສ່ໜັງສືທາງລັດຖະການຂອງຄະນະສະ ເພາະກິດລະດັບຊາດກໍ່ຄືກະຊວງການຕ່າງປະເທດທີ່ໄດ້ອະນຸຍາດ,ອອກແຈ້ງການຜ່ອນຜັນມາດຕະການປ້ອງກັນ, ຄວບຄຸມ, ສະກັດກັ້ນ ແລະແກ້ໄຂພະຍາດໂຄວິດ-19 ໃນລະຫວ່າງວັນທີ 1-31 ຕຸລາ 2020, ວຽກງານສູນກັກກັນ: ສູນກັກກັນ 14 ວັນຂອງແຮງງານລາວ ແລະຄົນລາວທີ່ມາຈາກຕ່າງປະເທດມີຄົນລາວທີ່ມາຈາກຕ່າງປະເທດທີ່ເຂົ້າມາກັກຕົວຢູ່ສູນທັງໝົດ 769 ຄົນ, ປະຈຸບັນຍັງມີຄົນກັກຢູ່ໃນສູນກັກກັນຈໍານວນ 4 ຄົນ.

  ພ້ອມນັ້ນກອງປະຊຸມໄດ້ຮັບຟັງການລາຍງານກ່ຽວກັບການກວດກາຄົນຕ່າງປະເທດ, ການຄຸ້ມຄອງແຮງງານ, ສູນກັກກັນ ແລະງົບປະ ມານການໃຊ້ຈ່າຍ,ຜ່ານໜັງສືສະເໜີຂອງຄະນະຄຸ້ມຄອງເຂດເສດຖະກິດພິເສດແຂວງຫຼວງນໍ້າທາໃນການສະເໜີເອົາສູນກັກກັນໂຮງແຮມຈິງລານ ແລະຮວງຈິງບໍ່ເຕ່ນເຂົ້າໃນບັນຊີສູນກັກກັນຂອງສູນ ກາງ, ທົບທວນ ແລະປຶກສາຫາລືໃນການແຕ່ງຕັ້ງຄະນະສະເພາະກິດຄືນໃໝ່.

---------------

ຂ່າວ: ມຸນຕີ, ຮູບພາບ: #ຫນັງສືພິມເສດຖະກິດສັງຄົມ

แชร์