ຮຽກຮ້ອງໃຫ້ຄູ-ອາຈານສິດສອນນັກຮຽນ ໄປສູ່ການຮັບຮູ້ທີ່ກວ້າງຂວາງ

   ເນື່ອງໃນໂອກາດສະເຫຼີມສະຫຼອງວັນຄູແຫ່ງຊາດຄົບຮອບ 26 ປີ (7 ຕຸລາ 1994-7 ຕຸລາ 2020) ໃຫ້ມີບັນຍາກາດຟົດຟື້ນ, ເຕັມໄປດ້ວຍຄວາມໝາຍຄວາມສຳຄັນ ແລະຈາລຶກເຖິງປະຫວັດສາດ, ບຸນຄຸນ, ຄຸນງາມຄວາມດີຂອງຜູ້ທີ່ໄດ້ປະກອບສ່ວນພັດທະນາການສຶກສາໃນແຕ່ລະຍຸກແຕ່ລະສະໄໝ.

  ທ່ານ ນັນຕະໄຊ ອິນທະສອນ ຫົວໜ້າພະແນກສຶກສາທິການ ແລະກີລາແຂວງຄຳມ່ວນໄດ້ໃຫ້ສຳພາດຕໍ່ສື່ມວນຊົນໃນວັນທີ 5 ຕຸລາ 2020 ວ່າ: ສຳລັບການຫ້າງຫາກະກຽມສະເຫຼີມສະຫຼອງວັນຄູແຫ່ງຊາດຄົບຮອບ 26 ປີພະແນກສຶກສາທິການ ແລະກີລາແຂວງໄດ້ແນະນຳໃຫ້ການຈັດຕັ້ງທຸກພາກສ່ວນໃນຂະແໜງການສຶກສາ ແລະສະຖາບັນການສຶກສາຕ່າງໆ ສົມທົບກັບອຳນາດການປົກຄອງ ແລະຄະນະພັດທະນາການສຶກສາຂັ້ນບ້ານເພື່ອພ້ອມກັນຈັດຕັ້ງປະຕິບັດສະເຫຼີມສະຫຼອງບົນພື້ນຖານສອດ ຄ່ອງກັບເງື່ອນໄຂສະພາບຕົວຈິງແນໃສ່ສ້າງຈິດສຳນຶກກ່ຽວກັບກຽດຕິຍົດ ຫຼື ຈາລຶກເຖິງບຸນຄຸນຂອງຄູຜູ້ທີ່ເຄີຍໃຫ້ຄວາມຮູ້, ນຳພາຝຶກຝົນຫຼໍ່ຫຼອມໃຫ້ຕົນເອງກ້າວໄປສູ່ຄວາມປະສົບຜົນສຳເລັດ.

 ເພື່ອເປັນການສືບຕໍ່ຈັດຕັ້ງປະຕິບັດ ແລະຍົກໃຫ້ເຫັນເຖິງຄຸນງາມຄວາມດີໃນການຝຶກຝົນຫຼໍ່ຫຼອມຄູ-ອາຈານ, ການເປັນແບບຢ່າງໃນການສິດສອນທີ່ດີເຮັດໃຫ້ນັກຮຽນກາຍເປັນຊັບພະຍາກອນມະນຸດທີ່ສຳຄັນຂອງຊາດໃນນາມຜູ້ບໍລິຫານການສຶກສາຂັ້ນແຂວງຂໍຮຽກຮ້ອງມາຍັງການຈັດຕັ້ງ, ສັງຄົມແລະຊັ້ນຄົນຕ່າງໆ ໃຫ້ມີການປະກອບສ່ວນໃນການພັດທະນາການສຶກສາບໍ່ວ່າຈະເປັນດ້ານສະຕິປັນຍາ, ເຫື່ອ ແຮງ ແລະປະກອບສ່ວນໃນການປົກປັກຮັກສາສະຖານທີ່ການສຶກສາຕ່າງໆ ພ້ອມທັງເອົາໃຈໃສ່ສົ່ງເສີມລູກຫຼານທີ່ຢູ່ພາຍໃນຄອບຄົວ ແລະການປົກຄອງຂອງຕົນໃຫ້ໄດ້ເຂົ້າຮຽນຢ່າງຄົບຖ້ວນຕາມຊັ້ນອາຍຸພ້ອມນັ້ນກໍ່ຕ້ອງເປັນແບບຢ່າງທີ່ດີໂດຍສະເພາະການດຳລົງຊີວິດ, ການພັດທະນາຄອບຄົວ, ການສ້າງເງື່ອນໄຂອຳນວຍຄວາມສະດວກໃນການຝຶກຝົນຫຼໍ່ຫຼອມລູກຫຼານຊຶ່ງລ້ວນແຕ່ແມ່ນການປະກອບສ່ວນເຮັດໃຫ້ວຽກງານການສຶກສາໄດ້ຮັບການພັດທະນາດີຂຶ້ນ.

ພ້ອມນັ້ນຂໍຮຽກຮ້ອງມາຍັງພະນັກງານຄູ-ອາຈານຕ້ອງໄດ້ເອົາໃຈໃສ່ສ້າງຕົນເອງໃຫ້ເປັນແບບຢ່າງທີ່ດີ,ປະກອບສ່ວນສິດສອນໃຫ້ເຕັມຄວາມຮູ້ຄວາມສາມາດທີ່ເໝາະສົມກັບຍຸກໂລກາພິວັດ, ຍຸກທີ່ບໍ່ມີພົມແດນດ້ານຄວາມຮູ້ຄວາມສາມາດເພື່ອນຳພານັກຮຽນໄປສູ່ການຊອກຮູ້ຮໍ່າຮຽນທີ່ກວ້າງຂວາງ, ສູ່ການຮຽນຮູ້ທີ່ມີຄວາມຫຼາກຫຼາຍພ້ອມນັ້ນກໍ່ຕ້ອງມີຄວາມຊຳນິຊຳນານໃນການໄຈ້ແຍກເພື່ອໃຫ້ນັກຮຽນຮັບຮູ້ເຖິງດ້ານດີ ແລະ ດ້ານທີ່ບໍ່ດີໂດຍສະເພາະຕໍ່ອະນຸຊົນ-ເຍົາວະຊົນທີ່ຈະກາຍເປັນກຳລັງແຮງຂອງຊາດໃນອະນາຄົດ.

_________

ຂຽນໂດຍ: ກອງຄຳ

ຮູບພາບ: #ຫນັງສືພິມເສດຖະກິດສັງຄົມ

แชร์