ຫົວໜ້າ ຄອສພ ໂອ້ລົມ ຄະນະໂຄສະນາອົບຮົມແຂວງອັດຕະປື

   ເມື່ອວັນທີ 8 ຕຸລາ 2020 ສະຫາຍ ຄໍາພັນ ພົມມະທັດ ກໍາມະການກົມການເມືອງສູນກາງພັກ, ຄະນະເລຂາທິການສູນກາງພັກ, ຫົວໜ້າຄະນະໂຄສະນາອົບຮົມສູນກາງພັກ (ຄອສພ) ໄດ້ພົບປະໂອ້ລົມຄະນະໂຄສະນາອົບຮົມ ແຂວງອັດຕະປື ທີ່ຫ້ອງປະຊຸມຄະນະໂຄສະນາອົບຮົມແຂວງ,ໂດຍການຕ້ອນຮັບຂອງ ທ່ານ ຄຳບຸນ ດວງພະບາງ ຫົວໜ້າຄະນະໂຄສະນາອົບຮົມ ແຂວງອັດຕະປື, ມີຫົວໜ້າ-ຮອງຂະແໜງການພ້ອມດ້ວຍຫົວໜ້າຄະນະໂຄສະນາອົບຮົມ 5 ຕົວເມືອງ ແລະພະນັກງານລັດຖະກອນເຂົ້າຮ່ວມ.

  ພາຍຫຼັງທີ່ໄດ້ຮັບຟັງການລາຍງານໂດຍຫຍໍ້ກ່ຽວກັບການຈັດຕັ້ງປະຕິບັດວຽກງານໂຄສະນາອົບຮົມພາຍໃນ ແຂວງອັດຕະປື ແລ້ວສະຫາຍ ຄໍາພັນ ພົມມະທັດ ໄດ້ກ່າວສະແດງຄວາມຍ້ອງຍໍຊົມເຊີຍ ແລະຕີລາຄາສູງຕໍ່ຜົນສຳເລັດໃນການຈັດຕັ້ງປະຕິບັດວຽກງານທີ່ຄະນະໂຄສະນາອົບຮົມ ແຂວງອັດຕະປື ຍາດມາໄດ້ພ້ອມທັງໄດ້ເນັ້ນໜັກຫຼາຍບັນຫາທີ່ສໍາຄັນເປັນຕົ້ນ: ແມ່ນວຽກງານການເມືອງ-ແນວຄິດ, ທິດສະດີ, ສະເພາະໃນວຽກງານກໍ່ສ້າງພັກ, ການແກ້ບັນຫາແກ້ໄຂຄວາມທຸກຍາກຂອງປະຊາຊົນ, ແກ້ໄຂປາກົດການຫຍໍ້ທໍ້, ການສໍ້ລາດບັງຫຼວງ, ການສ້າງຄວາມເຊື່ອໝັ້ນໃນການນໍາພາຂອງພັກ, ເພີ່ມທະວີຕິດຕາມສະພາບການ,ເພື່ອວາງແຜນໃນການໂຄສະນາເຮັດໃຫ້ປະຊາຊົນມີຄວາມເຂົ້າໃຈ, ເຊື່ອໝັ້ນເຫັນຄວາມສໍາຄັນ, ເພາະເຫັນວ່າການປະຕິບັດຕົວຈິງຍັງບໍ່ທັນໄດ້ດີເທົ່າທີ່ຄວນ,ການຜະລິດສ້າງທິດສະດີຍັງບໍ່ທັນເປັນຮູບປະທໍາ ເພື່ອຊອກໃຫ້ເຫັນຈຸດດີ, ຈຸດອ່ອນ, ຂໍ້ຂາດຕົກບົກຜ່ອງ, ການເກັບກໍາສະພາບການຈັດຕັ້ງປະຕິບັດຍັງບໍ່ທັນແໜ້ນແຟ້ນ, ການຊີ້ນໍາບຸກທະລຸແນວຄິດອັນໃໝ່ ແລະການພັດທະນາເສດຖະກິດຍັງບໍ່ທັນຫຼາຍ, ຕ້ອງໄດ້ສ້າງນັກທຸລະກິດ, ສ້າງນັກລົງທຶນ, ຮູ້ເຖິງການຜັນຂະຫຍາຍແນວທາງ ແລະການພັດທະນາຂອງທ້ອງຖິ່ນຕ້ອງໄດ້ມີການວິເຄາະໃຫ້ມີຄວາມແຂງແຮງ, ຮູ້ເຖິງທ່າບົ່ມຊ້ອນ, ທິດສະດີການປະຕິວັດຂອງແຂວງ, ຮັກສາມູນເຊື້ອທາງດ້ານວັດທະນະທໍາ, ສົ່ງເສີມການຜະລິດທີ່ເປັນມູນເຊື້ອຟື້ນຟູອະນຸລັກເພື່ອເຮັດໃຫ້ກາຍເປັນສິນຄ້າ,ຕ້ອງເກັບກໍາສະພາບທັງພາຍໃນ ແລະພາຍນອກ, ການເຄື່ອນໄຫວຂອງສັດຕູເພື່ອນໍາສະເໜີຄະນະພັກເພື່ອເປັນຫຼັກຖານໃນການນໍາພາທາງດ້ານການເມືອງແນວຄິດເພື່ອຄວາມຖືກຕ້ອງ ແລະຮັບມືແກ້ໄຂໃຫ້ທັນກັບສະພາບການ, ປຸກລະດົມການຫັນເອົາພະນັກງານລົງຮາກຖານ, ສິ່ງສໍາຄັນແມ່ນກິດຈະກໍາປະຊາສໍາພັນຕ້ອງຮູ້ເຖິງວິທີການຊອກຄົ້ນຢ່າງໜັກແໜ້ນເພື່ອເຮັດໃຫ້ຜົນສຳເລັດກອງປະຊຸມໃຫຍ່ຄັ້ງທີ 11 ຂອງອົງຄະນະພັກແຂວງອັດຕະປືໃຫ້ໄດ້ຮັບການຜັນຂະຫຍາຍຢ່າງກວ້າງຂວາງ.

--------------

ຂ່າວ: ທິດປະສົງ ໄຊຍະສອນ

ຮູບພາບ: #ຫນັງສືພິມເສດຖະກິດສັງຄົມ

แชร์