20 ຄອບຄົວ ເມືອງວຽງຄຳເປັນຄອບຄົວຕົວແບບດ້ານກະສິກຳ

   ພິທີມອບໃບຢັ້ງຢືນໃຫ້ຄອບຄົວຕົວແບບດ້ານກະສິກຳ ແລະປ່າໄມ້ຂອງເມືອງວຽງຄຳ ແຂວງວຽງຈັນ ໄດ້ຈັດຂຶ້ນໃນວັນທີ 8 ຕຸລາ 2020 ທີ່ຫ້ອງການບ້ານປາກແຈ້ງ, ເປັນກຽດເຂົ້າຮ່ວມມີ ທ່ານ ພອນແກ້ວ ຂຸນພົນ ເຈົ້າເມືອງວຽງຄຳ, ທ່ານ ພູວົງ ບຸນຊູ ຫົວໜ້າພະແນກກະສິກຳ ແລະ ປ່າໄມ້ ແຂວງວຽງຈັນ, ມີຫ້ອງການກ່ຽວຂ້ອງຂອງເມືອງ, ມີນາຍບ້ານ ແລະຄອບຄົວຕົວແບບດັ່ງກ່າວເຂົ້າຮ່ວມ.

  ທ່ານ ຕຽງຄຳ ແສງສຸລິຈັນ ຫົວໜ້າຫ້ອງການກະສິກຳ ແລະປ່າໄມ້ເມືອງວຽງຄຳ ໄດ້ກ່າວໃນພິທີວ່າ: ຜ່ານມາມີຫຼາຍຄອບຄົວໄດ້ມີການພັດທະນາດີຂຶ້ນຢ່າງຕໍ່ເນືອງສາມາດເປັນຄອບຄົວຕົວແບບໄດ້ ແລະເປັນທີ່ຍອມຮັບຂອງສັງຄົມ, ດັ່ງນັ້ນຫ້ອງການກະສິກຳ ແລະ ປ່າໄມ້ເມືອງວຽງຄຳ ຈຶ່ງໄດ້ຈັດຕັ້ງປະຕິບັດປະເມີນຄອບຄົວຕົວແບບຕາມເງື່ອນໄຂ ແລະມາດຖານຂອງຂໍ້ຕົກລົງສະບັບເລກທີ 0837 / ກປ ວາງອອກ, ຜົນການປະເມີນສາມາດສັງລວມໄດ້ວ່າມີ 20 ຄອບຄົວທີ່ປະຕິບັດບັນລຸໄດ້ຄົບຖ້ວນ 9 ມາດຖານຄື: ມີເຮືອນຢູ່ຖາວອນ, ດິນທຸກຕອນ ມີໃບຢັ້ງຢືນສິດນຳໃຊ້ທີ່ດິນຕາມ ລະບຽບການມີການນຳໃຊ້ເຂົ້າໃນ ການຜະລິດກະສິກຳຕະຫຼອດປີ, ສິ່ງປຸກສ້າງຕ່າງໆໄດ້ຈັດສັນໃຫ້ມີຄວາມເປັນລະບຽບຮຽບຮ້ອຍສະດວກປອດໄພ, ສາມາດນໍາໃຊ້ແຫຼ່ງນໍ້າເຂົ້າໃນການຜະລິດກະສິກໍາໄດ້ຕະຫຼອດປີ, ໄດ້ຮັບການສຶກສາຝຶກອົບຮົມດ້ານເຕັກນິກກະສິກໍາໃດໜຶ່ງ, ມີການຜະລິດກະສິກຳແບບປະສົມປະສານຕິດພັນກັບການອະນຸລັກສະພາບແວດລ້ອມໃນລະດັບຄອບຄົວໄດ້ດີ, ໄດ້ເຂົ້າຮ່ວມກຸ່ມຜູ້ຊົມໃຊ້ນໍ້າຊົນລະປະ ທານກຸ່ມຜະລິດກະສິກໍາ ແລະປ່າໄມ້, ກຸ່ມກອງທຶນພັດທະນາບ້ານຂອງຕົນ, ໄລຍະ 3 ປີ ຜ່ານມາໄດ້ເຮັດການຜະລິດກະສິກຳຕະຫຼອດປີຢ່າງຕໍ່ເນື່ອງ ແລະມີຜົນກຳໄລທຸກໆປີ, ມີລາຍຮັບສະເລ່ຍສູງກວ່າ 900 ໂດລາຕໍ່ຄົນຕໍ່ປີ, ມີບົດຮຽນ ແລະ ປະສົບການດີ, ມີການພັດທະນາຕົນເອງສາມາດຖ່າຍທອດຄວາມຮູ້ ແລະ ບົດຮຽນໃຫ້ຄອບ ຄົວອື່ນໄດ້.

   ໃນ 20 ຄອບຄົວນີ້ ມີສະມາຊິກທັງໝົດ 109 ຄົນ, ຍິງ 59 ຄົນ, ໃນໄລຍະ 3 ປີ ຜ່ານມາມີລາຍຮັບທັງໝົດ 12 ຕື້ກວ່າກີບໃນນີ້ຖືກຢັ້ງຢືນເປັນຄອບຄົວຕົວແບບດ້ານການລ້ຽງງົວ 6 ຄອບຄົວ, ຕົວແບບດ້ານການລ້ຽງໝູ 2 ຄອບຄົວ, ຕົວແບບດ້ານກະສິກຳປະສົມປະສານ 2 ຄອບຄົວ, ຕົວແບບດ້ານການປູກໝາກກ້ຽງໃຫຍ່ 2 ຄອບຄົວ, ຕົວແບບດ້ານການປູກເຂົ້າ 4 ຄອບຄົວ, ຕົວແບບດ້ານການປູກພືດຜັກ 2 ຄອບຄົວ ແລະຕົວແບບດ້ານການປູກໄຜ່ລ້ຽງນ້ອງ 1 ຄອບຄົວ, ເປັນກຽດມອບໃບຢັ້ງຢືນໃຫ້ຄອບຄົວຕົວແບບດ້ານກະສິກຳ ແລະປ່າໄມ້ຂອງເມືອງວຽງຄຳ ແຂວງວຽງ ຈັນປະຈຳປີ 2020 ຄັ້ງນີ້ໂດຍແມ່ນທ່ານ ພອນແກ້ວ ຂຸນພົນ ເຈົ້າເມືອງວຽງຄຳ.

แชร์