ສພຂ ສະຫວັນນະເຂດວາງແຜນຈັດກອງປະຊຸມທ້າຍສະໄໝ

 ການຫ້າງຫາກະກຽມການດໍາເນີນກອງປະຊຸມສະໄໝສາມັນເທື່ອທີ 10 ຫຼື ກອງປະຊຸມທ້າຍສະໄໝຂອງສະພາປະຊາຊົນແຂວງສະຫວັນນະເຂດຊຸດທີ I ຊຶ່ງຄາດວ່າກອງປະຊຸມດັ່ງກ່າວຈະເປີດຂຶ້ນໃນທ້າຍປີ 2020 ຢ່າງແນ່ນອນຊຶ່ງພາຍຫຼັງທີ່ມີການສະຫຼຸບຖອດຖອນບົດຮຽນຂອງການດໍາເນີນກອງປະຊຸມສະໄໝສາມັນເທື່ອທີ 9 ເຫັນວ່າຍັງມີຫຼາຍອັນທີ່ຈະຕ້ອງໄດ້ປັບປຸງແກ້ໄຂເປັນຕົ້ນແມ່ນຄວາມເປັນເຈົ້າການຂອງພະແນກການກໍຄືຄະນະຮັບຜິດຊອບຄົ້ນຄວ້າ ແລະ ຂຽນນິຕິກໍາໃນແຕ່ລະຫົວຂໍ້ແມ່ນຍັງບໍ່ທັນສູງ, ມັນສະແດງອອກໃນການກະກຽມການສະໜອງ, ການປັບປຸງພາຍຫຼັງກອງປະຊຸມເທື່ອທີ 8 ເທື່ອທີ 9 ຮັບຮອງແລ້ວ 4 ສະບັບປະຈຸບັນຍັງບໍ່ທັນສາມາດລົງ ລາຍເຊັນໄດ້, ເລື່ອງການປະສານສົມທົບເຮັດວຽກລະຫວ່າງຄະນະກໍາມະການກັບພະແນກການ ຫຼື ລະຫວ່າງຂະແໜງການຂອງສະພາກັບຂະແໜງການກ່ຽວ ຂ້ອງ ອົງການປົກຄອງແຂວງມີລັກສະນະຖືເບົາບາງຄັ້ງປະສານບໍ່ລະອຽດເຮັດໃຫ້ກອງປະຊຸມປຶກສາຫາລືກັບພະແນກການບໍ່ຈະແຈ້ງ ແລະຕົກລົງບໍ່ໄດ້, ເລື່ອງການສະໜອງຂໍ້ມູນຂອງອົງການປົກຄອງ ແຂວງເປັນຕົ້ນບົດລາຍງານຂອງ ທ່ານເຈົ້າແຂວງ, ບົດລາຍງານຂອງທ່ານຫົວໜ້າພະແນກແຜນການ ແລະການລົງທຶນແຂວງບໍ່ສາມາດຕອບສະໜອງທັນເວລາ ແລະການສົ່ງບົດຊີ້ແຈງຂອງທ່ານເຈົ້າແຂວງ ແລະພະແນກການອົງການປົກຄອງແຂວງແມ່ນຍັງບໍ່ທັນປະຕິບັດຢ່າງຕໍ່ເນື່ອງ.

  ຊຶ່ງກອງປະຊຸມວາງແຜນກະກຽມດໍາເນີນກອງປະຊຸມສະໄໝສາມມັນເທື່ອທີ 10 ໄດ້ຈັດຂຶ້ນທີ່ຫ້ອງວ່າການປົກແຂວງຄອງ ໃນວັນທີ 6 ຕຸລາ 2020 ຊຶ່ງເປັນການປະຊຸມຮ່ວມລະຫວ່າງສະພາປະຊາຊົນແຂວງກັບອົງການປົກຄອງແຂວງສະຫວັນນະເຂດ ໂດຍມີທ່ານ ຄໍາເຜີຍ ຜັນທະຈອນ ປະທານສະພາປະຊາຊົນແຂວງສະຫວັນນະເຂດ, ທ່ານ ທ່ອນ ແກ້ວ ພຸດທະໄກຍະລາດຮອງເຈົ້າແຂວງສະຫວັນນະເຂດເພື່ອຮັບປະ ກັນໃຫ້ແກ່ການກະກຽມດ້ານເນື້ອໃນກອງປະຊຸມສະພາປະຊາຊົນແຂວງ ແລະອົງການປົກຄອງແຂວງໄດ້ສຸມໃສ່ບາງບັນຫາທີ່ສໍາຄັນໃນນີ້ໃຫ້ຂະແໜງການຂອງອົງການປົກຄອງແຂວງເອົາໃຈໃສ່ສະຫຼຸບການຈັດຕັ້ງແຜນພັດທະນາເສດະກິດ-ສັງຄົມ, ແຜນງົບປະມານແຫ່ງລັດຂັ້ນແຂວງເພື່ອເປັນຂໍ້ມູນໃຫ້ແກ່ການສະຫຼຸບ ແລະລາຍງານຕໍ່ກອງປະຊຸມສະໄໝສາມັນເທື່ອທີ 10 ຫຼື ກອງປະຊຸມທ້າຍສະໄໝຂອງສະພາປະຊາ ຊົນແຂວງຊຸດທີ 1 ບັນຫາສໍາຄັນແມ່ນການສົ່ງບົດລາຍງານຕ່າງໆທີ່ຈະຮັບໃຊ້ໃຫ້ແກ່ສະພາປະຊາຊົນແຂວງ ເພື່ອໃຫ້ຜູ້ແທນຕອບກ່ອນ 7 ວັນຕາມກົດໝາຍ.

 ຈາກນີ້ກໍໃຫ້ສືບຕໍ່ຄົ້ນຄວ້າບັນຫາສໍາຄັນເປັນຕົ້ນແມ່ນບັນດາເນື້ອໃນ ແລະຫົວຂໍ້ລາຍງານທີ່ຈະນໍາເຂົ້າໃນກອງປະຊຸມສະໄໝສາມັນເທື່ອທີ 10 ເຊັ່ນ: ບົດລາຍງານຂອງທ່ານເຈົ້າແຂວງ, ບົດລາຍງານຂອງທ່ານຫົວໜ້າພະແນກແຜນການ ແລະການລົງທຶນ, ບົດລາຍງານຂອງທ່ານຫົວໜ້າພະແນກການເງິນ, ບົດລາຍງານຂອງອົງການກວດສອບແຫ່ງລັດປະຈໍາພາກກາງ, ຕໍ່ກັບການສ້າງ ແລະປັບປຸງນິຕິກໍາໃຕ້ກົດໝາຍເຫັນວ່າໃຫ້ອົງການປົກຄອງແຂວງໄດ້ຊຸກຍູ້ບັນດາຂະແໜງການທີ່ກ່ຽວຂ້ອງທີ່ມີຮ່າງຂໍ້ຕົກລົງຂອງທ່ານເຈົ້າແຂວງເຊັ່ນວ່າ: ການຮັບຮອງເອົາແຜນຈັດສັນທີ່ດິນ ແລະຄຸ້ມຄອງຊັບພະຍາກອນທໍາມະຊາດແລະສິ່ງແວດລ້ອມຊຶ່ງແມ່ນພະແນກຊັບພະຍາກອນທໍາມະຊາດ ແລະສິ່ງແວດລ້ອມແຂວງ, ການສະກັດກັ້ນຕ້ານອັກຄີໄພຂອງຊາວບ້ານພາຍໃນແຂວງຊຶ່ງແມ່ນກອງບັນຊາການ ປກສ ແຂວງ, ການຮັບຮອງເອົາການສຶກສາທົບທວນ ແລະ ປັບປຸງແຜນຜັງຊີ້ນໍາລວມ ແລະ ການວາງແຜນຜັງລະອຽດເທສະບານນະຄອນໄກສອນ ພົມວິຫານ ແລະ ເມືອງອຸທຸມພອນ ຊຶ່ງແມ່ນພະແນກ ຍທຂ ແຂວງ, ໃຫ້ມີການປຶກສາຫາລື ແລະທາບທາມໄວ ເພື່ອນໍາສະເໜີຄະນະປະ ຈໍາສະພາປະຊາຊົນແຂວງຄົ້ນຄວ້າ ແລະນໍາສະເໜີເຂົ້າຮັບຮອງໃນກອງປະຊຸມສະໄໝສາມັນພາຍໃນກໍານົດເວລາທີ່ວາງໄວ້ເພື່ອໃຫ້ ສສຊ/ສສຂໄດ້ຄົ້ນຄວ້າ.

_________

ຂ່າວ: ສະຫວັນ, ຮູບພາບ: #ຫນັງສືພິມເສດຖະກິດສັງຄົມ

แชร์