ໄຊທານີ ກຽມ 3 ບ້ານເປັນບ້ານວັດທະນະທຳ

  ເມື່ອວັນທີ 8 ຕຸລາ 2020 ຢູ່ທີ່ກຸ່ມບ້ານຊ້າງ ເມືອງໄຊທານີ ນະຄອນຫຼວງວຽງຈັນ ໄດ້ຈັດກອງປະຊຸມປຶກສາຫາລືການຈັດຕັ້ງບ້ານນາຄາຍ,ບ້ານນາຄັນທຸງ ແລະບ້ານຫົວຂົວເພື່ອກະກຽມເປັນບ້ານວັດທະນະທຳເປັນປະທານ ໂດຍທ່ານ ບົວລີ ແກ້ວມະນີວັນ ຮອງຫົວໜ້າພະແນກຖະແຫຼງຂ່າວວັດທະນະທຳ ແລະ ທ່ອງທ່ຽວ (ຖວທ) ນະຄອນຫຼວງວຽງຈັນ, ທ່ານ ຄູນມີ ຣາຊະພົນ ຫົວໜ້າຫ້ອງການຖະແຫຼງຂ່າວວັດທະນະທຳ ແລະທ່ອງທ່ຽວເມືອງໄຊທານີ, ມີທ່ານຫົວໜ້າຂະແໜງວັດທະນະທໍາພະແນກ ຖວທ ຄະນະພັກຮາກຖານກຸ່ມບ້ານຊ້າງ ອົງການປົກຄອງບ້ານ 3 ບ້ານ ຕະຫຼອດຮອດພໍ່ແມ່ປະຊາຊົນບ້ານນາຄາຍເຂົ້າຮ່ວມ.

  ກອງປະຊຸມໄດ້ຮັບຟັງການ ລາຍງານຫຍໍ້ກ່ຽວກັບຄວາມພ້ອມໃນການທີ່ຈະປະກາດເປັນບ້ານວັດທະນະທຳໃນຕໍ່ໜ້າຂອງແຕ່ລະບ້ານ, ຊຶ່ງບ້ານນາຄາຍປະກອບມີ 110 ຄອບຄົວ ມີພົນລະເມືອງທັງໝົດ 510 ຄົນຍິງ 261 ຄົນ, ສ່ວນບ້ານນາຄັນທຸງມີ 237 ຄອບຄົວມີພົນລະ ເມືອງທັງໝົດ 1.271 ຄົນຍິງ 666 ຄົນ, ບ້ານຫົວຂົວມີ 173 ຄອບຄຄົວມີພົນລະເມືອງທັງໝົດ 894 ຄົນ ຍິງ 417 ຄົນ, ແຕ່ລະບ້ານມີເສັ້ນທາງຄົມມະນາຄົມໄປມາສະດວກຕະຫຼອດປີ, ການຢຶດຖືອາຊີບຂອງປະຊາຊົນສ່ວນຫຼາຍແມ່ນເຮັດນາປູກຝັງ;ລ້ຽງສັດ ແລະຄ້າຂາຍຈຳນວນໜຶ່ງເຮັດໃຫ້ແຕ່ລະຄອບຄົວກຸ້ມກິນການເຊື່ອຖືຂອງປະຊາຊົນແມ່ນສ່ວນຫຼາຍຖືສາສະໜາພຸດພາຍໃນບ້ານມີຄວາມສະຫງົບລູກຫຼານໄດ້ຮັບການຮໍ່າຮຽນ 100% ອົງການຈັດຕັ້ງບ້ານໄດ້ມີການຊີ້ນຳ-ນຳພາ ພໍ່ແມ່ປະຊາຊົນພັດທະນາບ້ານດີຂຶ້ນເລື້ອຍໆ ແຕ່ລະບ້ານໄດ້ຮັບນາມ ມະຍົດເປັນໜ່ວຍພັກປອດໃສເຂັ້ມແຂງໜັກແໜ້ນມາກ່ອນແລ້ວ.

  ນອກນັ້ນໃນກອງປະຊຸມຍັງໄດ້ຈັດພິທີມອບໃບຢັ້ງຢືນຄອບຄົວວັດທະນະທຳຊຸດທີ II ໃຫ້ບ້ານນາຄາຍ 36 ຄອບຄົວ; ບ້ານນາຄັນທຸງ 98 ຄອບຄົວ ແລະບ້ານຫົວຂົວ 90 ຄອບຄົວ; ທັງສາມບ້ານໄດ້ຮັບໃບຢັ້ງຢືນຄອບຄົວວັດທະນະທຳສະເລ່ຍ 85% ຂຶ້ນເມື່ອຄາດວ່າຈະປະກາດເປັນບ້ານວັດທະນະທຳກາງເດືອນພະຈິກ 2020 ນີ້.

_________

ຂຽນໂດຍ: ຄຳຕັນ, 

ຮູບພາບ: #ຫນັງສືພິມເສດຖະກິດສັງຄົມ

แชร์