ຕາດຫຼັກ 5 ສະຖານທີ່ທ່ອງທ່ຽວເມືອງໄຊ

  ມີແຜນໄວ້ແລ້ວ ຫຼືຫຍັງທ້າຍປີນີ້ຈະໄປພັກຜ່ອນຢູ່ໄສກັບໃຜຫຼາຍໆ ຄົນກໍຄົງວາງແຜນໄວ້ແນ່ແລ້ວກຽມໄປ ຫຼືອາດຈະໄປແລ້ວແຕ່ສໍາລັບໃຜທີ່ຍັງ ຫຼືບໍ່ຮູ້ຈະໄປໄສຂໍແນະນໍາໜຶ່ງສະຖານທີ່ໆວິວງາມບັນຍາກາດດີຄື: ຕາດຫຼັກ 5 ຕັ້ງຢູ່ບ້ານວຽງສາ ເມືອງໄຊ ແຂວງອຸດົມໄຊ ຫ່າງຈາກເທສະບານເມືອງໄຊ ພຽງແຕ່ 5 ກິໂລແມັດ ແລະການເດີນທາງແມ່ນສະດວກສະບາຍເນື່ອງຈາກເສັ້ນທາງດັ່ງກ່າວເປັນເສັ້ນທາງປູຢາງປະມານ 5 ກິໂລແມັດ ແລະເສັ້ນທາງດິນແດງປະມານ 1,2 ກິໂລແມັດ.

   ຕາດຫຼັກ 5 ເປັນສະຖານທີ່ທ່ອງທ່ຽວທີ່ສາມາດມາພັກຜ່ອນແບບຄອບຄົວ, ໝູ່ຄູ່ຄົນຮັກ ຫຼືການມາເປັນກຸ່ມ ຫຼືບໍລິສັດກໍໄດ້ສະຖານທີ່ກວ້າງຂວາງມີຄວາມສູງປະມານ 30 ກວ່າແມັດ, ມີນໍ້າໄຫຼຕະຫຼອດປີອີງໃສ່ຕາມລະດູຝົນນໍ້າຫຼາຍ ແລະລະດູແລ້ງນໍ້າໜ້ອຍຖືວ່າເປັນອີກສະຖານທີ່ໜຶ່ງທີ່ຊາວແຂວງອຸດົມໄຊນິຍົມໄປພັກຜ່ອນໃນວັນພັກວຽກ ແລະວັນສຳຄັນຕ່າງໆ ຢູ່ບໍລິເວນຕາດປະກອບມີ: ຮ້ານອາຫານ ແລະຕູບພັກຜ່ອນ, ສະລອຍນໍ້າ, ອ່າງອາບນໍ້າທໍາມະຊາດເຢັນໆ, ທ່ຽວຊົມຖ່າຍຮູບນໍ້າຕົກຕາດ, ທ່ຽວຊົມສວນໝາກໄມ້ຢູ່ບໍລິເວນຕາດ, ຊົມຄວາມງາມຂອງນໍ້າຕົກ, ຖ່າຍພາບ ແລະອື່ນໆ.

   ຕາດຫຼັກ 5 ແຕ່ເດີມປະຊາຊົນເຂດດັ່ງກ່າວເອີ້ນຕາດດັ່ງກ່າວນີ້ວ່າ “ຫ້ວຍຊາງ” ໂດຍອີງໃສ່ພູມສັນຖານຕົວຈິງເນື່ອງຈາກຫ້ວຍດັ່ງກ່າວມີຊື່ເອີ້ນສອງແບບຄື: “ຫ້ວຍຊາງ (ໄມ້ຊາງ) ແລະຫ້ວຍຊ້າງ ນໍ້າ” ຫ້ວຍດັ່ງກ່າວແມ່ນມີນໍ້າໄຫຼອອກຈາກຕີນພູມາທ້ອນໂຮມກັນຢູ່ຈຸດດຽວແລ້ວກໍ່ເກີດເປັນໜອງນໍ້າໃຫຍ່ໃສເຢັນຊາວບ້ານຊ່າລືກັນວ່າມີຊ້າງຢູ່ຈຸດນັ້ນອອກກິນນໍ້າຈຶ່ງເອີ້ນວ່າ “ຕາດຊ້າງ”.

 

แชร์