ສທຍ ຈສ ມີຜົນງານໂດດເດັ່ນຫຼາຍດ້ານ

   ຕະຫຼອດໃນໄລຍະ1 ປີຜ່ານມາສະມາຄົມທຸລະກິດແມ່ຍິງແຂວງຈໍາປາສັກ (ສທຍ ຈສ) ໄດ້ເອົາໃຈໃສ່ໃນການຈັດຕັ້ງປະຕິບັດວຽກງານຂອງຕົນຕາມທິດທາງທີ່ລັດກໍານົກໃຫ້ຢ່າງຕັ້ງໜ້າເຮັດໃຫ້ສາມາດຊຸກຍູ້ບັນດາສະມາຊິກຜູ້ປະກອບການຜ່ານຜ່າອຸປະສັກກັບສະພາບເສດຖະກິດທີ່ຖົດຖອຍເຮັດໃຫ້ທຸລະກິດຂະຫຍາຕົວໃນລະດັບທີ່ໜ້າເພີ່ງພໍໃຈໄປຄຽງຄູ່ກັບຄວາມເອົາໃຈໃສ່ໃນການປະກອບສວນຊ່ວຍເຫຼືອສັງຄົມຢ່າງສະໝໍ່າສະເໜີຕະຫຼອດມາ.

  ກອງປະຊຸມຄົບຄະນະບໍລິຫານງານຄັ້ງທີ 2 ສະໄໝທີ III ຂອງສະມາຄົມນັກທຸລະກິດແມ່ຍິງແຂວງຈໍາປາສັກ, ໄດ້ຈັດຂື້ນໃນວັນທີ 8 ຕຸລາ ຜ່ານມານີ້ທີ່ໂຮງແຮມຈໍາປາສັກແກຣນ ນະຄອນປາກເຊ ແຂວງຈໍາປາສັກ, ໂດຍການໃຫ້ກຽດເຂົ້າຮ່ວມຂອງ ທ່ານ ສີທົນ ແກ້ວພູວົງ ປະທານແນວລາວສ້າງຊາດແຂວງຈໍາປາສັກ, ທ່ານ ນາງ ແກ່ນຈັນ ບຸດດາວົງ ທີ່ປຶກສາປະທານສະມາຄົມທຸລະກິດແມ່ຍິງ ແຂວງຈໍາປາສັກ, ມີທ່ານ ນາງ ເພັດສະໄໝ ແສງອາລຸນ ປະທານສະມາຄົມນັກທຸລະກິດຍິງແຂວງຈໍາປາສັກ, ທ່ານ ນາງ ບຸນເຮືອງ ດິງດັງ ຮອງປະທ່ານສະມາຄົມນັກທຸລະກິດຍິງ ແລະພ້ອມດ້ວຍບັນດາທ່ານຄະນະບໍລິການງານສະມາຄົມ ແລະບັນດານັກທຸລະກິດແມ່ຍິງພາຍໃນແຂວງເຂົ້າຮ່ວມຢ່າງພ້ອມພຽງ.

 ທ່ານ ນາງ ເພັດສະໄໝ ແສງອາລຸນ ກ່າວວ່າ: 1 ປີຜ່ານມາຄະນະບໍລິຫານງານຂອງສະມາຄົມໄດ້ເອົາໃຈໃສ່ໃນປຸກລະດົມຂະບວນການທົ່ວສັງຄົມໃຫ້ໄດ້ເຂົ້າຮ່ວມເຄື່ອນ ໄຫວວຽກງານສະມາຄົມ, ມຸນນິທິ ແລະອື່ນໆ ພ້ອມທັງໄດ້ເຜີຍແຜ່ຂໍ້ກໍານົດ-ກົດລະບຽບ-ຂໍ້ຕົກລົງ ແລະບົດບັນທຶກຕ່າງໆ ໃຫ້ຄະນະສະມາຊິກໄດ້ຮັບຮູ້ເພື່ອເຄື່ອນໄຫວໃຫ້ຖືກຕ້ອງ, ໄດ້ປຸກລະດົມການປະກອບສ່ວນໃນທຸກຂະບວນການທີ່ພາກລັດ-ເອກກະຊົນສູ່ວຽກງານສັງຄົມ, ວຽກງານສາທາລະນາກໍ່ຄືວຽກງານອື່ນໆທັງພາຍໃນ ແລະພາຍນອກພ້ອມດຽວກັນນີ້ໄດ້ປຸກລະດົມເຕົ້າລວມຄະນະ ແລະ ເອີ້ອຍນ້ອງຜູ້ປະກອບການເຂົ້າຮ່ວມເຄື່ອນໄຫວວຽກງານສາມາຄົມທຸລະກິດຍິງ, ໄດ້ປັບປຸງຄືນໜ່ວຍງານ ຈາກເມື່ອກ່ອນມີ 10 ໜ່ວຍງານ, ປະຈຸບັນແມ່ນໄດ້ເຮັດໃຫ້ແທດເໝາະກັບການຈັດຕັ້ງແບ່ງການຂອງຄະນະບໍລິຫານງານໂດຍລວມເຂົ້າກັນເປັນ 9 ໜ່ວຍງານ ແລະມີຄະນະບໍລິຫານງານ 9 ທ່ານ ລົງ ເລິກຊີ້ນໍາ-ນໍາພາແຕ່ລະຂະແໜງວຽກທັງນີ້ເພື່ອຮັບປະກັນໃຫ້ສະມາຊິກໄດ້ຮັບຮູ້ ແລະທັງເປັນການເຂົ້າເຖິງສະມາຊິກແຕ່ລະຄອບຄົວຄອບອີກ, ນອກຈາກນີ້ແມ່ນໄດ້ນໍາພາຄະນະເຂົ້າຮ່ວມກອງປະຊຸມຕ່າງໆ ແລະງານສະແດງສິນຄ້າຕ່າງໆ ທີ່ເປັນການຖອກຖອນບົດຮຽນ,ປະສົບການ ແລະການຕະຫຼາດທີ່ດີໃຫ້ແກ່ສະມາຊິກພວກເຮົາເພື່ອນໍາໄປຈັດຕັ້ງປະຕິບັດຕໍ່ການດໍາເນີນທຸລະກິດຂອງຕົນໃຫ້ເກີດດອກອອກຜົນ.

  ສໍາລັບວຽກງານສັງຄົມທາງສະມາຄົມໄດ້ຮວມແຮງຮ່ວມໃນກັນປະກອບສ່ວນສ້າງໂຮງຮຽນໃຫ້ແກ່ບ້ານລົ່ມສັກເໜືອຫຼັກ 10 ເມືອງບາຈຽງ, ຊ່ວຍເຫຼືອປະຊາຊົນເມືອງຊະນະສົມບູນທີ່ໄດ້ຮັບຜົນກະທົບຈາກອັກຄີໄພ, ມີທັງວັດຖຸເຄື່ອງນຸ່ງ, ເຂົ້າສານນໍ້າດື່ມ, ອາຫານແຫ້ງ ແລະເງິນສົດ, ຈັດຂະບວນການຊ່ວຍເຫຼືອໄພນໍ້າຖ້ວມໂດຍການລະດົມທຶນຈາກຫຼາຍພາກສ່ວນທຸລະກິດ ແລະສະມາຊິກ ສທຍ ຈໍາປາສັກ, ຄອບຄົວ, ບໍລິສັດຫ້າງຮ້ານ ແລະຊ່ວຍເຫຼືອສັງຄົມທີ່ໄດ້ຮັບຜົນກະທົບອື່ນໆຢ່າງສະໝໍ່າສະ ເໜີຊຶ່ງເຮັດໃຫ້ສາມາຄົມມີບົດບາດພົ້ນເດັນຫລາຍພໍສົມຄວນລວມມູນຄ້າໃນການຊ່ວຍເຫຼືອສັງຄົມແມ່ນຫຼາຍຕື້ກວ່າກີບ ແລະ ກໍ່ຈະສຶບຕໍ່ປະຕິຍບັດແນວທາງນີ້ຢ່າງຕັ້ງໜ້າໃນການຊ່ວຍເຫຼືອສັງຄົມ.

----------------

ຂ່າວ: ພູມະນີ ຄໍາສີແສງຈັນ   

#ຫນັງສືພິມເສດຖະກິດສັງຄົມ

   

แชร์