ເຊໂປນເມືອງດຽວ ເຮືອນ 869 ຫຼັງຖືກນໍ້າຖ້ວມ

 ເນື່ອງຈາກສະພາບຝົນທີ່ຕົກລົງມາຢ່າງຕໍ່ເນື່ອງເຮັດໃຫ້ເກີດນໍ້າຖ້ວມໃນຫຼາຍເມືອງຂອງແຂວງສະຫວັນນະເຂດໂດຍສະເພາະແມ່ນເຂດເມືອງເຊໂປນທີ່ໄດ້ຮັບຜົນກະທົບໜັກພໍສົມຄວນຊຶ່ງນໍ້າໄດ້ໄຫຼເຂົ້າຖ້ວມບ້ານເຮືອນ, ເນື້ອທີ່ການຜະລິດ, ຖະໜົນຫົນທາງ ແລະພື້ນທີ່ອື່ນໆ ເຮັດໃຫ້ການສັນຈອນໄປມາຫຼາຍຈຸດຖືກຕັດຂາດ. ຕໍ່ກັບສະ ພາບການດັ່ງກ່າວ,ດ້ວຍຄວາມເປັນຫ່ວງເປັນໃຍຕໍ່ສະພາບການດຳລົງຊີວິດຂອງພໍ່ແມ່ປະຊາຊົນດັ່ງນັ້ນ, ມາໃນວັນທີ 8 ຕຸລາ 2020 ທ່ານ ວຽງທະວີສອນ ເທບພະຈັນ ຄະນະປະຈຳພັກແຂວງຜູ້ຊີ້ນຳວຽກງານຂົງເຂດວັດທະນະທຳ-ສັງຄົມ ພ້ອມດ້ວຍຄະນະຈຶ່ງໄດ້ເດີນທາງລົງມາຕິດຕາມເບິ່ງສະພາບການນໍ້າຖ້ວມຢ່າງເລັ່ງດ່ວນພ້ອມທັງມອບເຄື່ອງຊ່ວຍເຫຼືອແກ່ປະຊາຊົນທີ່ໄດ້ຮັບຜົນກະທົບຈາກນໍ້າຖ້ວມໃນຄັ້ງນີ້ໂດຍໄດ້ຮັບການຕ້ອນຮັບຈາກທ່ານ ວົງສະຫວັນ ວຽງມະນີ ເຈົ້າເມືອງເຊໂປນ.

ໂອກາດນີ້, ທ່ານ ວຽງທະວີສອນ ເທບພະຈັນ, ທ່ານເຈົ້າເມືອງເຊໂປນພ້ອມຄະນະກໍ່ໄດ້ຂີ່ເຮືອລົງສຳຫຼວດເບິ່ງພື້ນທີ່ທີ່ຖືກນໍ້າຖ້ວມພ້ອມທັງນຳເຄື່ອງບໍລິໂພກ-ອຸປະໂພກ ທີ່ຈຳເປັນໄປມອບຊ່ວຍເຫຼືອແກ່ປະຊາຊົນບ້ານເຊໂປນເກົ່າ ແລະບ້ານຫ້ວຍສານທີ່ໄດ້ຮັບຜົນກະທົບໜັກຈາກນໍ້າຖ້ວມໃນຄັ້ງນີ້.

  ປະຈຸບັນ, ຝົນແມ່ນຍັງສືບຕໍ່ຕົກຢ່າງຕໍ່ເນື່ອງຊຶ່ງຕາມການລາຍງານສະຖານະການຫຼ້າສຸດໃນຕອນເຊົ້າວັນທີ 9 ຕຸລານີ້ ນໍ້າໄດ້ໄຫຼຖ້ວມເສັ້ນທາງເລກທີ 9 ເຂດເຊໂປນຫາຊາຍແດນລາວ-ບາວ ເຮັດໃຫ້ການໄປ-ມາພົບຄວາມຫຍຸ້ງຍາກ ແລະບາງຈຸດຖືກຕັດຂາດ, ສ່ວນສະພາບການນໍ້າຖ້ວມ ແລະຜົນກະທົບອື່ນໆພາຍໃນແຂວງສະຫວັນນະເຂດທາງໜັງສືພິມພວກເຮົາຈະມານຳສະເໜີຕື່ມອີກຕາມພາຍຫຼັງ.

  ຕາມການລາຍງານຂໍ້ມູນການເປີດເຜີຍຈາກຫ້ອງການ ຖວທ ເມືອງນເຊໂປນທ່ຽງວັນທີ 9 ຕຸລາ 2020 ສະພາບນໍ້າແມ່ນໄດ້ຖ້ວມສູງໃນລະດັບວິກິດລະດັບນໍ້າໃນປະ ຈຸບັນແມ່ນໄດ້ຖ້ວມໄມ້ຫຼາວັດແທກສູງກວ່າ 18 ແມັດ ເຂດກໍານົດອັນຕະລາຍແມ່ນ 17 ແມັດ ເບື້ອງຕົ້ນແມ່ນໄດ້ຮັບຜົນກະທົບໜັກຫຼາຍກວ່າ 30 ບ້ານ ເຮືອນຊານປະຊາຊົນຖ້ວມແລ້ວ 869 ຫຼັງຄາໃນ 21 ບ້ານ ເນື້ອທີ່ທໍາການຜະລິດກະສິກໍາ 1.973 ເຮັກຕ້າ ຫຼາຍຈຸດໄດ້ຖືກຕັດກະແສໄຟຟ້າເພື່ອຄວາມປອດໄພນໍ້າຍັງເພີ່ມລະ ດັບຂື້ນຢ່າງຕໍ່ເນື່ອງ.

ນອກຈາກນີ້ກໍຍັງມີຫຼາຍຈຸດຢູ່ເມືອງນອງ, ວິລະບູລີຂອງແຂວງສະຫວັນນະເຂດຮັບຜົນກະທົບຈາກນໍ້າຖ້ວມໜັກເຊັ່ນດຽວກັນ.

____________

ຂ່າວ: ສະຫວັນ, ຮູບພາບ: #ຫນັງສືພິມເສດຖະກິດສັງຄົມ

แชร์