ທຽວຍາກທາງ 13 ເໜືອສີເກີດ-ວັງວຽງ ດ້ານລັດຖະມົນຕີ ຍທຂ ລົງຊຸກຍູ້ການສ້ອມແປງ

  ໃນວັນທີ 6 ຕຸລາຜ່ານມາທ່ານ ບຸນຈັນ ສິນທະວົງ ລັດຖະມົນຕີກະຊວງໂຍທາທິການ ແລະຂົນສົ່ງ (ຍທຂ) ພ້ອມດ້ວຍຄະນະໄດ້ລົງເຄື່ອນໄຫວຕິດຕາມສະພາບການສ້ອມແປງທາງ 13 ເໜືອ ໂດຍສະເພາະແມ່ນໄລຍະແຕ່ສີເກີດ-ໂພນໂຮງ ທີ່ມີຫາງສຽງຈົ່ມວ່າຂອງປະຊາຊົນກ່ຽວກັບສະພາບຄວາມຫຍຸ້ງຍາກໃນການສັນຈອນໄປ-ມາ ແລະການເປ່ເພຂອງເສັ້ນທາງດັ່ງກ່າວ.

 ໂອກາດລົງເຄື່ອນໄຫວຄັ້ງນີ້ ທ່ານ ລັດຖະມົນຕີ ແລະຄະນະໄດ້ເຂົ້າຮ່ວມປະຊຸມຢູ່ແຄ້ມຂອງບໍລິສັດ ຫູເປີຍ ຊາງຈຽງ ຂົວທາງ ຈຳກັດກິໂລແມັດທີ 47 ທາງ 13 ເໜືອພ້ອມທັງຮັບຟັງລາຍງານຄວາມຄືບໜ້າຂອງໜ້າວຽກ ແລະສະເໜີແຜນການກໍ່ສ້າງ ໄລຍະ1, ໄລຍະ 2 ແລະໄລຍະ 3 ພ້ອມທັງຂໍ້ສະດວກ, ຂໍ້ຫຍຸ້ງຍາກ ແລະ ຂໍ້ສະ ເໜີຈາກທ່ານ Yoon ISWS Team Leader ຕາງໜ້າບໍລິສັດ ຫູເປີຍ ຊາງຈຽງ ຂົວທາງ ຈຳກັດ ຈາກນັ້ນກໍ່ໄດ້ຮັບຟັງການລາຍງານກ່ຽວກັບສະພາບເສັ້ນທາງ ແລະມາດຕະການໃນການສ້ອມແປງໃນຕອນທາງທີ່ກຳລັງກໍ່ສ້າງ ແລະຕອນທາງທີ່ຍັງນອນໃນແຜນທີ່ຈະກໍ່ສ້າງໃນໄລຍະເວລາຂອງສັນຍາທີ່ຍັງເຫລືອຈາກ ທ່ານ ລັດສະ ໝີ ອາລິຍະວົງສິງ ຫົວໜ້າໂຄງການປັບປຸງ ແລະສ້ອມແປງທາງເລກ 13 ເໜືອຕື່ມອີກ.

  ໃນໂອກາດດຽວກັນນີ້ທ່ານລັດຖະມົນຕີກໍ່ໄດ້ມີຄວາມເຫັນ ແລະໃຫ້ທິດຊີ້ນຳຕໍ່ໂຄງການເຊິ່ງໄດ້ເນັ້ນໃຫ້ໂຄງການສືບຕໍ່ແກ້ໄຂການສ້ອມແປງທາງໃນລະດູແລ້ງຕາມແຜນ ການສ້ອມແປງທາງປີ 2020-2021 ໂດຍໃຫ້ແບ່ງເສັ້ນທາງອອກເປັນ 3 ໄລຍະເພື່ອແກ້ໄຂຄື: ໄລຍະທີ 1 ແຕ່ສີໄຄ-ສີເກີດ, ໄລຍະທີ 2 ແຕ່ສີເກີດ-ໂພນໂຮງ ແລະໄລຍະທີ 3 ແຕ່ໂພນໂຮງ-ວັງວຽງ ພ້ອມນັ້ນກໍ່ໃຫ້ມີລະບົບບໍລິການລະບາຍການສັນຈອນໃນໄລຍະທີ່ກຳລັງດຳເນີນການກໍ່ສ້າງເພື່ອໃຫ້ພາຫະນະຜ່ານໄປ-ມາໄດ້ສະດວກຂຶ້ນ.


   ຫຼັງຈາກນັ້ນທ່ານລັດຖະມົນຕີ ແລະຄະນະກໍ່ໄດ້ລົງເຄື່ອນໄຫວເພື່ອສຳຫຼວດເບິ່ງສະພາບທາງເລກທີ 13 ເໜືອ ທີ່ມີຈຸດເປ່ເພເພື່ອແກ້ໄຂໃຫ້ມີຄວາມສະດວກໃນການສັນຈອນໄປມາພ້ອມດຽວກັນນັ້ນຍັງໄດ້ໄປຕິດຕາມເບິ່ງສະພາບໂຄງການກໍ່ສ້າງທາງດ່ວນວຽງຈັນ-ວັງວຽງໃນນັ້ນທ່ານລັດຖະມົນຕີໄດ້ຊີ້ນຳໃຫ້ໂຄງການປັບປຸງແກ້ໄຂແຍກແຕ່ເມືອງຫີນເຫີບເຂົ້າໄປທາງເມືອງເຟືອງ ແຂວງວຽງຈັນ ເນື່ອງຈາກວ່າຈຸດດັ່ງກ່າວມີນໍ້າຂັງ, ເປັນຕົມ, ເຮັດໃຫ້ການສັນຈອນໄປມາບໍ່ສະດວກ ແລະໃຫ້ໂຄງການແກ້ ໄຂໄລຍະເສັ້ນທາງທີ່ບໍ່ໄດ້ມາດຕະຖານທີ່ນໍ້າຖ້ວມເມື່ອຝົນຕົກ ແລະຈຸດອື່ນໆອີກຈຳນວນໜຶ່ງ.

__________

ຂ່າວ: ກະຊວງ ຍທຂ

ຮູບພາບ: #ຫນັງສືພິມເສດຖະກິດສັງຄົມ

       

แชร์