ຄຳມ່ວນສຳເລັດກອງປະຊຸມຄົບຄະນະພັກແຂວງ

   ກອງປະຊຸມຄົບຄະນະບໍລິຫານງານພັກແຂວງຄຳມ່ວນຄັ້ງທີ 17 ສະໄໝທີ IX ໄດ້ສຳເລັດລົງໃນວັນທີ 8 ຕຸລາ 2020 ພາຍຫຼັງທີໄດ້ດຳເນີນມາເປັນເວລາ 2 ວັນທີ່ເຮືອນຮັບແຂກເລກ 1 ຂອງແຂວງຄໍາມ່ວນໂດຍພາຍໃຕ້ການເປັນປະທານຂອງສະຫາຍ ໂອໄດ ສຸດາພອນ ກຳມະການສູນກາງພັກ,ເລຂາພັກແຂວງ,ເຈົ້າແຂວງຄຳມ່ວນ, ມີບັນດາສະຫາຍໃນຄະນະປະຈຳ,ຄະນະບໍລິຫານງານພັກແຂວງ,ເລຂາພັກເມືອງ, ເລຂາຄະນະພັກຮາກຖານ, ຫົວໜ້າພະແນກການ ແລະບັນດາອົງການຈັດຕັ້ງຕ່າງໆອ້ອມຂ້າງແຂວງເຂົ້າຮ່ວມ.

  ຕະຫຼອດໄລຍະຂອງການດຳເນີນກອງປະຊຸມຄັ້ງທີ 17 ທ້າຍສະໄໝນີ້ແມ່ນໄດ້ຕີລາຄາເປັນເອກະພາບຫຼາຍບັນຫາ, ການລາຍງານ, ການປະກອບຄຳເຫັນຂອງບັນດາຈາກຫຼາຍພາກສ່ວນສາມາດຢັ້ງຢືນໄດ້ເຖິງຜົນສຳເລັດໃນຫຼາຍດ້ານໂດຍສະເພາະການຈັດຕັ້ງປະຕິບັດມະຕິກອງປະຊຸມຄົບຄະນະບໍລິຫານງານພັກແຂວງຄັ້ງທີ 16 ສະ ໄໝທີ IX,ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງແຂວງ ແລະການຈັດຕັ້ງປະຕິບັດແຜນງົບປະມານຂອງແຂວງ (ລາຍຮັບ-ລາຍຈ່າຍ ) ປະຈຳ 9 ເດືອນ 2020. ການລາຍງານໃນການກະກຽມຄວາມພ້ອມດ້ານຕ່າງໆ ເພື່ອດຳເນີນກອງປະຊຸມໃຫຍ່ຄັ້ງທີ X ຂອງອົງຄະນະພັກແຂວງທີ່ຈະໄດ້ໄຂຂຶ້ນໃນມໍ່ໆນີ້.

  ໃນໂອກາດນີ້ເພື່ອເປັນທິດໃນການສືບຕໍ່ວຽກງານໃນຕໍ່ໜ້າສະຫາຍ ໂອໄດ ສຸດາພອນ ຍັງໄດ້ກ່າວມີຄຳເຫັນໃຫ້ສືບຕໍ່ເສີມຂະຫຍາຍໄຊຊະນະ, ຜົນສຳເລັດອັນໃຫຍ່ຫຼວງ ແລະມີຄວາມໝາຍປະຫວັດສາດ. ທຸກພາກສ່ວນເອົາໃຈໃສ່ເພີ່ມທະວີການນຳພາວຽກງານປ້ອງກັນຊາດ-ປ້ອງກັນຄວາມສະຫງົບ, ຄຸ້ມຄອງການເຄື່ອນໄຫວອົງການຈັດຕັ້ງຕ່າງໆໃຫ້ຮັດກຸມ, ແທດເຖິງຕົວຈິງ,ສຸມໃສ່ການແກ້ໄຂປາກົດການຫຍໍ້ທໍ້ຂອງສັງຄົມ,ສຸມໃສ່ນຳພາໃນການຈັດຕັ້ງປະຕິບັດບັນດາໜ້າວຽກທີ່ໄດ້ກຳນົດໄວ້ໃນມະຕິກອງປະຊຸມຄົບຄະນະພັກແຂວງຄັ້ງທີ 16 ທີ່ເຫັນວ່າຍັງບໍ່ທັນໄດ້ຈັດຕັ້ງປະຕິບັດສຳເລັດ.

  ຂົງເຂດເສດຖະກິດເອົາໃຈໃສ່ດຶງດດູດການລົງທຶນ ແລະແກ້ໄຂໜີ້ສິນ,ຊຸກຍູ້ການປະຕິບັດໂຄງການລົງທຶນ,ການກໍ່ສ້າງສ້ອມແປງຂົວທາງໂດຍສະເພາະທຶນທີໄດ້ຮັບການອະນຸມັດຊ່ວຍເຫລືອຈາກຕ່າງປະເທດ,ໂຄງການແກ້ໄຂໄພພິບັດທີ່ສະພາປະຊາຊົນຮັບຮອງ, ຂົງເຂັດວັດທະນະທຳ-ສັງຄົມສືບຕໍ່ຊຸກຍູ້ໃສ່ປະຕິບັດເປົ້າໝາຍການພັດທະນາທີຍືນຍົງຂອງຂະແໜງການສຶກສາ ແລະ ຂະແໜງສາທາລະນະສຸກແຂວງໃຫ້ບັນລຸເພື່ມຂຶ້ນພ້ອມນັ້ນກໍ່ສຸມໃສ່ຕິດຕາມຮັບມືແກ້ໄຂບັນຫາການລະບາດຂອງພະຍາດຕາມ ລະດູການ ແລະເອົາໃຈໃສ່ໃນການປະຕິບັດມາດຕະການປ້ອງກັນ, ຄວບຄຸມ, ສະກັດກັ້ນພະຍາດໂຄວິດ 19 ທີ່ລັດຖະບານວາງອອກຢ່າງເຂັ້ມງວດ.

 ຄຽງຄູກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມນັ້ນຕ້ອງໄດ້ສືບຕໍ່ຊີ້ນຳຊຸກຍູ້ການດຳເນີນກອງປະຊຸມໃຫຍ່ຄັ້ງທີ X ຂອງອົງຄະນະພັກແຂວງທີ່ຈະເປີດຂຶ້ນໃນຕົ້ນເດືອນພະຈິກ 2020 ນີ້ເພື່ອຮັບປະກັນໃນການກຽມຄວາມພ້ອມທຸກດ້ານເປັນຕົ້ນ: ສືບຕໍ່ຍູ້ແຮງວຽກງານສ້າງຂະບວນການຕ່າງໆ ຢ່າງເປັນຂະບວນຟົດຟື້ນ, ສຸມໃສ່ກວດກາຄືນດ້ານກະກຽມດ້ານເນື້ອໃນໃຫ້ສຳເລັດ, ກະກຽມດ້ານໂຄງປະກອບບຸກຄະລາກອນຕາມຄຳແນະນຳຂອງຂັ້ນເທິງ, ການທາບທາມບຸກຄະລາກອນຮອບ 3 ແລະການກະກຽມຜູ້ແທນສົມບູນໃຫ້ກວດກາແນະນຳຕື່ມຕະຫຼອດຮອດວຽກງານການບໍລິຫານຮັບໃຊ້ ແລະວຽກງານປ້ອງກັນດ້ານຕ່າງໆໃຫ້ມີຄວາມຖືກຕ້ອງສອດຄ່ອງກັບສະພາບຕົວຈິງ, ສອດຄ່ອງຕາມຄຳສັ່ງ-ຄໍາແນະນຳຂອງຂັ້ນເທິງ ແລະໄດ້ຮັບຜົນສຳເລັດຕາມຄາດໝາຍ.

_________

ຂ່າວ: ມະນີວັນ,  ຮູບພາບ: #ຫນັງສືພິມເສດຖະກິດສັງຄົມ

     

แชร์