ເມື່ອວັນທີ 8 ຕຸລາ 2020 ທີ່ນະຄອນຫຼວງວຽງຈັນ ສູນສື່ສານເພື່ອສຸຂະພາບ ແລະສຸຂະສຶກສາກະຊວງສາທາລະນະສຸກໄດ້ຈັດກອງປະຊຸມສ້າງຄວາມເຂົ້າໃຈເພີ່ມເຕີມໃຫ້ສື່ມວນຊົນກ່ຽວກັບການປ້ອງກັນໂຄວິດ-19 ແລະພະຍາດທີ່ມີການລະບາດອື່ນໆ ໂດຍການເປັນປະທານຂອງທ່ານ ດຣ ພອນປະເສີດ ອຸນາພົມ ຫົວໜ້າກົມອະນາໄມ ແລະສົ່ງເສີມສຸຂະພາບກະຊວງສາທາລະນະສຸກມີຜູ້ຕາງໜ້າສື່ມວນຊົນ ແລະພາກສ່ວນທີ່ກ່ຽວຂ້ອງເຂົ້າຮ່ວມ.

  ກອງປະຊຸມຄັ້ງນີແມ່ນແນໃສ່ເພື່ອສ້າງຄວາມເຂົ້າໃຈໃຫ້ແກ່ສື່ມວນຊົນກ່ຽວກັບຄວາມຄືບໜ້າການເຝົ້າລະວັງໂຄວິດ-19 ໃນສະພາບປະຈຸບັນຂອງລາວ ແລະເພື່ອເປັນການສົນທະນາເຖິງວິທີການ ແລະຂະບວນການໃນການໂຄສະນາຕໍ່ກັບສະພາບລະບາດໂຄວິດ-19 ໃນປະຈຸບັນລວມທັງພະຍາດອື່ນໆທີ່ຕ້ອງເຝົ້າລະວັງ ແລະສຸມໃສ່ການໂຄສະນາເປັນຕົ້ນແມ່ນພະຍາດໄຂ້ຍຸງລາຍ, ພະຍາດທີ່ມາກັບນໍ້າ ແລະພະຍາດທີ່ກັນໄດ້ດ້ວຍວັກຊິນ.

 ນອກນັ້ນບັນດາຜູ້ເຂົ້າຮ່ວມຍັງໄດ້ແລກປ່ຽນຄວາມຄິດເຫັນ ແລະຮັບຟັງການສະເໜີການເຝົ້າລະວັງພະຍາດໂຄວິດ-19 ໃນສະພາບປະຈຸບັນຂອງ ສປປ ລາວ, ແນະນຳພະຍາດອື່ນໆທີ່ຕ້ອງເຝົ້າລະວັງ ແລະເຮັດການໂຄສະນາຈາກນັ້ນກໍ່ໄດ້ມີການແລກປ່ຽນສົນທະນາເຊິ່ງກັນ ແລະກັນແນໃສ່ເພື່ອເຮັດແນວໃດເພື່ອກ້າວໄປໃນການໂຄສະນາໃຫ້ສັງຄົມໄດ້ຮັບຮູ້ ແລະເຂົ້າໃຈວິທີການປ້ອງກັນກ່ຽວກັບພະຍາດໂຄວິດ-19 ແລະພະຍາດອື່ນໆ.

แชร์